ޗެލްސީއަށް ކުޅެމުން އަންނަ އެޑެން ހަޒާޑްއާއެކު ރެއާލް މެޑްރިޑަށް ކުޅެން ބޭނުންވާ ކަމަށް ރެއާލްގެ ކީޕަރު ތިބޯޓް ކޯޓުއާ ބުނެފިއެވެ.

ސްޕެއިންގެ ރޭޑިއޯއަކަށް ދިން އިންޓަވިއުއެއްގައި ކޯޓުއާ ބުނީ، ހަޒާޑްއަކީ ދުނިޔޭގެ އެންމެ މޮޅު ކުޅުންތެރިންގެ ތެރޭގައި ހިމެނޭ ކުޅުންތެރިޔެއް ކަމަށާއި، އޭނާ ރެއާލްއިން ފެނުމަކީ ވަރަށް ބޮޑަށް އެދޭ ކަމެއް ކަމަށެވެ.

ކޯޓުއާ ބުނީ، ރެއާލްއަށް ހަޒާޑް ސޮއިކުރާނެ ކަން އޭނާއަށް ނޭނގޭ ކަމަށާއި، ކްލަބުންވެސް ހަޒާޑް ބޭނުންވާ ކަމެއް ނޭނގޭ ކަމަށެވެ.

ހަޒާޑްއާއެކު ބެލްޖިއަމްއަށް ކުޅެމުން އަންނަ ކޯޓުއާ މިހެން ބުނެފައިވާއިރު، މި ސީޒަނަށް ފަހު ހަޒާޑް ޗެލްސީ ދޫކޮށްލާނެ ކަމަށް ރިޕޯޓްތައް ބުނެއެވެ. އަދި ބައެއް ރިޕޯޓްތައް ބުނާ ގޮތުން އޭނާ ރެއާލް މެޑްރިޑަށް ބަދަލުވާނެއެވެ.

ނަމަވެސް އެއްވެސް ކްލަބަކަށް ހަޒާޑްއާއެކު އެއްބަސްވުމަކަށް އާދެވިފައި ނުވާ ކަމަށް ރިޕޯޓްތައް ބުނެއެވެ. ޗެލްސީއާއެކު ހަޒާޑް ހަދާފައިވާ އެއްބަސްވުން ހަމަވާނީ 2020 ވަނަ އަހަރެވެ.

ދާދި ފަހުން ނޫސްވެރިންނަށް މައުލޫމާތު ދެމުން ހަޒާޑް ބުނީ އެއްބަސްވުން ކުރިޔަށް އޮތް ދުވަސްތަކުގައި އާނުކުރެވިއްޖެ ނަމަ އެހެން ކްލަބަކަށް ބަދަލުވުމުގެ ފުރުސަތު އެބަ އޮތް ކަމަށާއި، އަމިއްލަ އަށް ކްލަބް ދޫކޮށްލުމުގެ ވިސްނުމެއް އަދި ނެތް ކަމަށެވެ.

ފްރާންސްގެ ލިއްލޭ އިން ކެރިޔަރު ފެށި ހަޒާޑް ވަނީ އެޓީމަށް ކުޅުނު 194 މެޗުގައި 50 ލަނޑު ކާމިޔާބު ކޮށްފައެވެ. އޭނާ ޗެލްސީއަށް ބަދަލުވީ 2012 ވަނަ އަހަރު އެވެ. އޭނާ ވަނީ ޗެލްސީއަށް މިހާތަނަށް ކުޅުނު 339 މެޗުގައި 105 ލަނޑު ކާމިޔާބު ކޮށްފައެވެ.

ޗެލްސީއާ އެކު ޔޫރޮޕާ ލީގު ކާމިޔާބު ކޮށްފައިވާ ހަޒާޑް ވަނީ އެޓީމާއެކު ޕްރިމިއާ ލީގު ދެ ފަހަރު އަދި ފުޓްބޯލް ލީގު ކަޕް ވެސް ކާމިޔާބު ކޮށްފައެވެ. އޭނާ ވަނީ ބެލްޖިއަމް ގައުމީ ޓީމަށް ކުޅުނު 100 މެޗުގައި 30 ލަނޑު ކާމިޔާބު ކޮށްފައެވެ.