ފަތުރުވެރިކަމުގެ ދާއިރާގައި މަސައްކަތް ކުރާ މުއައްޒަފުންނަށް ސާވިސް ޗާޖު ލިބެންޖެހޭ ކަމަށާއި، ނުލިބޭ ނަމަ ފިޔަވަޅު އެޅެންޖެހޭ އުސޫލެއް އެކުލަވާލަންޖެހޭ ކަމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.

ކުރިއަށް އޮތް ރައްޔިތުން މަޖިލީހުގެ އިންތިޚާބުގައި އެމްޑީޕީން ހުށަހަޅާ ބަރުލަމާނީ ވައުދުތައް ތެރެއިން ޓުއަރިޒަމްއާ ގެސްޓްހައުސް ފުޅާ ކުރުމާ ބެހޭ ގޮތުން މައުލޫމާތު ފޯރުކޮށްދިނުމަށް ބުދަ ދުވަހުގެ ރޭ ބޭއްވި ޕެނަލްގައި ވާހަކަދައްކަވަމުން މެންބަރު ރޮޒެއިނާ ވިދާޅުވީ މިހާރު ވެސް މިއޮންނަ ޓޫރިޒަމާ ބެހޭ ގާނޫނުގައި މުސާރާ އާއި ސާވިސް ޗާޖް ދޭންޖެހޭ ކަމަށް ބަޔާންކޮށްފައިވާ ކަމަށާއި، މުއައްޒަފުންނަށް ސާވިސް ޗާޖު ނުދޭ މައްސަލަ ބޮޑު ކަމަށެވެ.

ރޮޒެއިނާ ވިދާޅުވީ ރިސޯޓުތަކުން މި އަމަލުކުރާ ގޮތް ވަރަށް ގާތުން ބަލަންޖެހޭ ކަމަށާއި، ސާރވިސް ޗާޖް ނުދެނީ ކޮން ރަށްތަކަކުންތޯ ފާހަގަކުރެވެންޖެހޭ ކަމަށެވެ. އަދި ނުދިނުމުން އަމަލުކުރަންޖެހޭ ވަކި އުސޫލެއް ވެސް އޮންނަން ޖެހޭ ކަމަށް ރޮޒެއިނާ ވިދާޅުވިއެވެ. އަދި ވިދާޅުވީ ގާނޫނުގެ ތެރެއިން ފިޔަވަޅު އަޅަން ޖެހޭ ކަމަށެވެ.

ސާވިސް ޗާޖު ނުދޭ މައްސަލަ އެންމެ ގިނައިން ދިމާވަނީ ލޯކަލް ބްރޭންޑްގެ ރިސޯޓުގައިކަން ފާހަގަކުރައްވައި ރޮޒެއިނާ ވިދާޅުވީ ބޭރުގެ ބްރޭންޑްތަކުން ހިންގާ ރިސޯޓުތަކުގައި މިފަދަ މައްސަލަތައް ދިމާވުން ވަރަށް ކުޑަ ކަމަށެވެ.

"ސާވިސް ޗާޖެއް އެކަންޏެއް ނޫން. އޭގެ އިތުރުން ވެސް އަޅުގަނޑުމެންނަށް ވެސް ހަމަ އެހެން ދަތިތަކުގެ ވާހަކަ އެބޭފުޅުން ފާހަގަކުރައްވާ. މިސާލަކަށް ތަފާތުކުރުންތަކުގެ ވާހަކަ. ހަމައެއް ޕޮޒިޝަންއެއްގައި ހުންނަ ދެމީހަކަށް ވެސް ޔޫރަޕްގައި ހުންނަ މީހާއަށް ލިބޭ މުސާރަ ދިވެހި މިހާއަށް ނުލިބޭ،" ރޮޒެއިނާ ވިދާޅުވިއެވެ.

ރޮޒެއިނާ ވިދާޅުވީ އެޖެންޑާ19 އިން ހުށަހަޅަނީ ގާނޫނުގެ ތެރެއިން މިހެން ހުރި ތަފާތު ކުރުންތައް ނައްތާލާ ރިސޯޓުތަކުގެ މެނޭޖްމެންޓްގެ ލެވަލްގައި ގިނަ ދިވެހިންނަށް ފަހި ފުރުސަތުތައް ހޯދައިދިނުމަށް ކަމަށެވެ.

ގެސްޓް ހައުސް ވިޔަފާރިއާ ގުޅޭ ތަޖުރިބާކާރެއް ކަމަށްވާ އަބްދުﷲ ރަޝީދު ވިދާޅުވީ އެއީ މުއައްޒަފަށް ލިބެންޖެހޭ ކަމަށާއި، އެ ނުދޭ ނަމަ އެއީ ކުރެވޭ ވައްކަމެއް ކަމަށެވެ.

ރަޝީދު ވިދާޅުވީ ސާވިސް ނުދޭ ނަމަ ސަރުކާރުން ވެސް މި މައްސަލަ ސީރިއަސް މައްސަލައެއް ގޮތުގައި ބަލައި، އެ ނުލިބޭ ނަމަ ސަރުކާރުގެ މުއައްސަސާއަކުން އެރިސޯޓަށް ގޮސް އެ ސާވިސް ޗާޖަށް ހެދި ގޮތް ވެސް ބަލަންޖެހޭ ކަމަށް އޭނާ ވިދާޅުވިއެވެ.

ރަޝީދު ވިދާޅުވީ ގެސްޓް މީހާ ފުރައިގެން ދަނީ ރިސޯޓަށް ދައްކަންޖެހޭ ފައިސާ ދެއްކުމަށް ފަހު ކަމަށާއި، މުއައްޒަފުންގެ ހައްގެއް ނުދީ ނުހިފެހެއްޓޭނެ ކަމަށެވެ. އަދި މުއައްޒަފުން ވެސް ސާވިސް ޗާޖު ހޯދުމަށް މަސައްކަތް ކުރަންޖެހޭ ކަމަށައި އެ ނުލިބޭ ނަމަ ޕޮލިހަށް ރިޕޯޓުކޮށްގެން އެ ހޯދުން އެއީ މުއައްޒަފުން ވެސް ކުރަންޖެހޭ ކަމެއް ކަމަށެވެ.

ރަޝީދު ވިދާޅުވީ އެޖެންޑާ19އަކީ ދިވެހި ރައްޔިތެއްގެ މުއްސަންދި ކަމުގެ ހިއްސާ ފުރަތަމަ ފަހަރަށް ގެނެސްދޭ ސިޔާސަތު ކަމަށެވެ.

ބިލެއްދޫ ދާއިރާގެ އެމްޑީޕީ ކެންޑިޑޭޓް އަހުމަދު ހަލީމް (ދޮންބިލެއް) ވިދާޅުވީ ފަތުރުވެރިކަމުގެ ސިނާއަތުގައި ގެސްޓުހައުސް ވިޔަފާރިއަކީ ވަރަށް މުހިންމު އެއް ހިއްސާ ކަމަށާއި، ގެސްޓު ހައުސްތަކުގެ ސަބަބުން އިތުރު ވިޔަފާރިތައް ހުޅުވިގެންދާ ކަމަށެވެ.

''ގެސްޓުހައުސްއާއެކު އެހެން ވިޔަފާރިތައް އުފެދޭ. މިހާރު ލޯންޑަރިންގެ ޚިދުމަތްދޭ ތަންތަނުގެ އިތުރުން ބޭކަރީގެ ޚިދުމަތް ރެސްޓައުރެންޓްތައް އެބަހުޅުވާ. މިސާލަކަށް މާފުށީގައި މިހާރު އެފެންނަނީ އާންމު ފަރާތްތައް ހިންގާ ވިޔަފާރިތައް'' ހަލީމް ވިދާޅުވިއެވެ.

ހަލީމް ވިދާޅުވީ މީގެ ތިރީސް ވަރަކަށް އަހަރު ކުރިން ފަތުރުވެރިކަމުގެ ސިނާއަތް އޮތީ ދެތިން މީހެއްގެ އަތްމަތީގައި ކަމަށާއި، ނަމަވެސް މިއަދު މިއުސޫލު ބަދަލުވެ ހުރިހާ ރައްޔިތުންނަށް ހުޅުވާލެވިފައިވާ ކަމަށެވެ.