މުޣުނީގެ މައްސަލައަށް ނަޝީދުގެ ޖަވާބު: އާންމު މެމްބަރުންގެ ކެންޑިޓަކީ އަޅުގަނޑުގެ ކެންޑިޑޭޓް!
ސީދާ ޖަވާބެއް ނަޝީދު ނުދެއްވާ
ކުރީގެ ރައީސް މުހައްމަދު ނަޝީދު ތިނަދޫ އުތުރު ދާއިރާގެ ކެންޑިޑޭޓް އަބްދުލް މުޣުނީ (ކ)ގެ ކަރުގައި ޝޭޝް އަޅުވައި ދެއްވަނީ
ގެވެށި އަނިޔާގެ މައްސަލައެއް ފެންމަތިވެ، އެމްޑީޕީން ތާއިދު އަނބުރާ ގެންދިޔަ ތިނަދޫ އުތުރު ދާއިރާގެ ކެންޑިޑޭޓް އަބްދުލް މުޣުނީގެ މައްސަލައާ ގުޅޭ ގޮތުން ފުރަތަމަ ފަހަރަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވާހަކަފުޅު ދައްކަވައިފިއެވެ.
ރާއްޖޭގެ އެންމެ ބޮޑު އަތޮޅު، ހުވަދޫއިން މަޖިލީހަށް ވާދަކުރާ އެމްޑީޕީގެ އަށް ކެންޑިޑޭޓުންނަށް ތާއިދު ހޯދުމަށް ބޭއްވި ކެމްޕެއިން ޖަލްސާގައި ވާހަަކަފުޅު ދައްކަވަމުން ނަޝީދު ވިދާޅުވީ "މިވެނި އެވެނި ކެންޑިޑޭޓަކީ" މަނިކުފާނު ތާއިދު ކުރައްވާ ކެންޑިޑޭޓެއްތޯ މީހުން ސުވާލު ކުރަމުންދާ ކަމަށެވެ. އެ ސުވާލަށް ދެއްވަން އޮތް ޖަވާބަކީ އާންމު މެމްބަރުން ނިންމަވައި، ހޮއްވަވާފައިވާ ކެންޑިޑޭޓަކީ އެމަނިކުފާނުގެ ކެންޑިޑޭޓް ކަމަށާއި އެ ކެންޑިޑޭޓަކީ ޕާޓީގެ ލީޑާޝިޕްގައި ތިއްބަވާ އެހެން ބޭފުޅުންގެ ވެސް ކެންޑިޑޭޓް ކަމަށް ނަޝީދު ވިދާޅުވިއެވެ.
އެމްޑީޕީ އާންމު މެމްބަރުން ވޯޓު ދެއްވައިގެން ހުވަދޫއިން ހޮއްވެވި އަށް ކެންޑިޑޭޓުންނަކީ ރަދުންގެ ކެންޑިޑޭޓުން ނޫން ކަމަށާއި އެއީ ހުވަދޫ ރައްޔިތުންގެ ކެންޑިޑޭޓުން ކަމަށް ނަޝީދު ވިދާޅުވިއެވެ.
މުޣުނީއަށް ކުރި ތާއިދު އެމްޑީޕީން އަނބުރާ ގެންދިޔަ މައްސަލާގައި ނަޝީދު ސީދާ ޖަވާބެއް ނުދެއްވައެވެ. އެ މައްސަލާގައި ނުސީދާކޮށް ނަޝީދު ތަކުރާރުކޮށް ވިދާޅުވީ "އަލިފަކު ނުކުތާއެއް ނެތް، ބާ ތިރީގައި އެއް ނުކުތާ" ކަމަށެވެ.
""އަޅުގަނޑު ގާތުގައި އަދިވެސް އެބަ އަހާ ބައެއް ބޭފުޅުން މިވެނި ބޭފުޅެއް އެއީ އަޅުގަނޑުގެ ކެންޑިޑޭޓްތޯ އޭ. އަޅުގަނޑު ހިތުގައި އުފެދެނީ އަލިފަކު ނުކުތާއެއް ނެތޭ، ބާ ތިރީ އެއް ނުކުތާއޭ، އަލުން އަނބުރާ އަނެއްކާ އަލިފުބާ އޮޅުން ފިލުވާން ޖެހެނީ ހެއްޔޭ؟... އަޅުގަނޑުމެންގެ އެތެރޭގެ އިމްތިޒާމުތަކުން ނިންމަނީ އަޅުގަނޑުމެންގެ ކެންޑިޑޭޓުންނަކީ ކޮބައިކަން. އެ ކެންޑިޑޭޓުން ނިންމީމާ، އެއީ އަޅުގަނޑުމެން އެންމެންގެ ކެންޑިޑޭޓް އެއީ ރައީސް ނަޝީދުގެ ވެސް، ރައީސް އިބްރާހިމް މުހައްމަދު ސޯލިހުގެ ވެސް އަޅުގަނޑުމެންގެ ނައިބު ރައީސް ޝިފާޒުގެ ވެސް އަދި އަޅުގަނޑުމެންގެ އެމްޑީޕީގެ ހުރިހާ މެމްބަރުންގެ ވެސް ކެންޑިޑޭޓު އެކަމާ މެދު އެއްވެސް ޝައްކެއް ނެތް،" ނަޝީދު ވިދާޅުވިއެވެ.
ނަޝީދު ވިދާޅުވީ ގިނަ ޕާޓީ އެކުލެވޭ ޕާޓީ ނިޒާމެއް ހޯދީ އެއް އަމާޒެއްގައި މަސައްކަތް ކުރާނެ އާއިލާއެއް ހޯދުމަށް ކަމަށާއި ރާއްޖެ ތަރައްޤީ ކުރަންޖެހޭނީ ޖަޒީރާ ރާއްޖެއެއްގެ ގޮތަށްކަން އެނގި ތިބެ ކަމަށެވެ. ރާއްޖެއަކީ ދުބާއީ ނުވަތަ ސިންގަޕޫރެއް ނޫން ކަމަށާއި މިއީ "ދިވެހިރާއްޖެ" ކަމަށް ނަޝީދު ވިދާޅުވިއެވެ.
ތިނަދޫގައި ގެދޮރު ނެތް މީހުންގެ ލިސްޓުގައި 190 އަށްވުރެ ގިނަ މީހުން ތިބި ކަމަށާއި އެމްޑީޕީގެ އަމާޒަކީ ހުރިހާ އެންމެންނަށް ބޯހިޔާވަހިކަން ފޯރުކޮށްދިނުމަށް ކަމަށް ނަޝީދު ވިދާޅުވިއެވެ. ކުރީގެ ރައީސް ޔާމީން ރިޝްވަތުގެ ގޮތުގައި ދެއްވީ ވެސް އެމްޑީޕީގެ ވެރިކަމުގައި އަޅާފައިވާ ފްލެޓްތައް ކަމަށް ނަޝީދު ތުހުމަތު ކުރެއްވިއެވެ.
ރާއްޖެއަކީ އިޤްތިސާދީ ވަސީލަތްތައް ގިނަ ތަނަވެސް ޤައުމެއް ކަމަށް ވިދާޅުވެ ނަޝީދު ވިދާޅުވީ އެމްޑީޕީ އަކީ "މޮޅު" މީހުން ތިބި ޕާޓީއެއް ކަމަށެވެ. އެމްޑީޕީގެ ހުވަފެނަކީ ރާއްޖޭގެ ރައްޔިތުންގެ ހުވަފެން ކަމަށާއި އެ ރައްޔިތުންގެ އުންމީދުތައް ފުރިހަމަ ކޮށްދިނުމަކީ އެމްޑީޕީގެ އަމާޒު ކަމަށް ނަޝީދު ތަކުރާރު ކުރެއްވިއެވެ.
އެޖެންޑާ 19އަކީ ޤާނޫނީ ތަރަހައެއްކަން ފާހަގަކުރައްވައި ނަޝީދު ވިދާޅުވީ އެޖެންޑާ 19ގެ އަމާޒަކީ ރާއްޖެ ތަރައްޤީ ކުރުން ކަމަށެވެ.
އެޖެންޑާ 19 ކަށަވަރުކޮށްދޭނީ ރައްުޔިތުން ބާނާ މަހަށް ރުފިޔާ ލިބުމުގެ ބަދަލުގައި ޑޮލަރު ލިބޭނެ ވަރަށް، އެ ސިނާއަތް ކުރިއަރުވުން ކަމަށާއި ތިނަދޫގައި މަސް ބަންދުކުރާ ކާރުހާނެއް ހުޅުވުމަކީ އުންމީދު ކަމަށް ނަޝީދު ވިދާޅުވިއެވެ.
