އުތުރު ކޮރެއާގެ އެމްބަސީއަށް ހަމަލާދިނުމުގެ ޒިންމާ ކިއޮލީމާ ސިވިލް ޑިފެންސުން ނަގައިފި

ސްޕެއިންގައި ހުންނަ އުތުރު ކޮރެއާގެ އެމްބަސީއަށް ދިން ހަމަލާގެ ޒިންމާ، އުތުރު ކޮރެއާގެ މިނިވަންކަމަށް މަސައްކަތް ކުރާ ކިއޮލީމާ ޑިފެންސް ސިވިލް ޑިފެންސް ކިޔާ ގްރޫޕަކުން ނަގައިފިއެވެ.

މިދިޔަ މަހުގެ ތެރޭގައި ދިން ހަމަލާގައި އެމްބަސީގެ ކޮމްޕިއުޓަރުތަކާއި، ފޯނަކާއި އަދި ހާޑް ޑިސްކުތަކެއް ވެސް ވަގަށް ނަގާފައިވެއެވެ. މިކަން ހިނގާފައި ވަނީ އެމެރިކާގެ ރައީސް ޑޮނަލްޑް ޓްރަމްޕާއި އެކު އުތުރު ކޮރެއާގެ ލީޑަރު ކިމް ޖޮން-އުން ވިއެޓްނާމުގައި ބޭއްވި ބައްދަލުވުން ބާއްވަން ކުޑަތަން ވެފައި ވަނިކޮށެވެ.

އެ ގްރޫޕުން މިކަމާއި ގުޅިގެން ނެރުނު ބަޔާނެއްގައި، އެއީ ހަމަލާއެއް ކަމަށް ނުބުނެވޭނެ ކަމަށް ވަނީ ބުނެފައެވެ. އަދި އެމްބަސީއަށް ވަދެ ބާރުގެ ބޭނުން އެއްވެސް ވަރަކަށް ކޮށްފައި ނުވާނެ ކަމަށް ވެސް އެ ގްރޫޕުން ވަނީ ބުނެފައެވެ. ނަމަވެސް ހަމަލާދިން ވަގުތު އެމްބަސީގައި މަސައްކަތް ކުރާ މުއައްޒަފުން ބަނދެ، އަނިޔާކޮށް، އެމީހުން ފުށުން މައުލޫމާތު ހޯދަން މަސައްކަތް ކޮށްފައިވާ ކަމަށް މި މައްސަލަ ބައްލަވާ ސްޕެއިންގެ ހައިކޯޓުގެ ޖަޖަކު ވަނީ ވިދާޅުވެފައެވެ.

އެމްބަސީއަށް ދިން ހަމަލާގައި ދިހަ މީހަކު ބައިވެރިވެފައިވާ އިރު، އެ ގްރޫޕުން ބުނެފައިވަނީ ހަމަލާދިނީ އެމްބަސީގައި ދިމާވި "ކުއްލި ހާލަތެއްގެ" ރައްދުގައި ކަމަށެވެ. އަދި މި ހަމަލާގައި ލިބުނު މައުލޫމާތު، އެމެރިކާގެ އެފް.ބީ.އައިއާ ހިއްސާކޮށްފައިވާ ކަމަށް ވެސް އެ ގްރޫޕުން ވަނީ ބުނެފައެވެ.

"ފްރީ ހޮސެއޮން" ގެ ނަމުން ވެސް ނަންދެވިފައިވާ ކިއޮލީމާ ސެލްފް ޑިފެންސަކީ، އުތުރު ކޮރެއާގެ ލީޑަރުކަމުން ކިމް ޖޮން-އުން ދުރުކުރަން މަސައްކަތް ކުރާ ގްރޫޕެކެވެ. އެ ގްރޫޕަށް މީޑިއާގެ ސަމާލުކަން ފުރަތަމަ ލިބުނީ މެލޭޝިޔާގައި މަރާލި ކިމް ޖޮން-އުންގެ ބޭބެ، ކިމް ޖޮން-ނާމްގެ ދަރިފުޅު މަކާއޯއިން ސަލާމަތްކުރަން ކުރި މަސައްކަތުންނެވެ.