މޯލްޑިވްސް އިސްލާމިކް ބޭންކްގެ އައު ހެޑް އޮފީސް ރަސްމީކޮށް ހުޅުވައިފި

މޯލްޑިވްސް އިސްލާމިކް ބޭންކުގެ ޚިދުމަތް ފުޅާ ދާއިރާއެއްގައި ކަސްޓަމަރުންނަށް ފޯރުކޮށްދިނުމަށްޓަކައި އެ ބޭންކުގެ އައު ހެޑް އޮފީސް ރަސްމީކޮށް ހުޅުވައިފިއެވެ.

މިކަމަށްޓަކައި ބުދަ ދުވަހު ހަވީރު ބޭއްވި ރަސްމިއްޔާތެއްގައި ބޭންކް ހުޅުވައިދެއްވީ މިނިސްޓަރ އޮފް ފިނޭންސް އެންޑް ޓްރެޒަރީ އިބްރާހިމް އަމީރުއެވެ.

އެމްއައިބީ ހެޑް އޮފީސް ހުޅުވައިދެއްވުމަށް ފަހު ވާހަކަފުޅު ދައްކަވަމުން މިނިސްޓަރ އަމީރު ވިދާޅުވީ 2011 ވަނަ އަހަރު ރާއްޖެއަށް ތަޢާރަފްވި އިސްލާމިކް ބޭންކަކީ ބޭންކިން ނިޒާމަށް ލިބިގެންދިޔަ ވަރަށް ބޮޑު ކުރިއެރުމެއް ކަމަށެވެ.

މިއަދާ ހަމައަށް އިސްލާމިކް ބޭންކުން ހޯދައިވާ ކުރިއެރުމަށް ތައުރީފްކުރައްވަމުން މިނިސްޓަރު އަމީރު ވިދާޅުވީ މިހާރުގެ ސަރުކާރުން ބޭނުންވަނީ މި ސަރަހައްދުގެ އިސްލާމިކް ފައިނޭންސިން ހަބަކަށް ރާއްޖެ ހެދުމަށް ކަމަށެވެ. އަދި އެ މިސްރާބަށް ވާސިލްވުމަށް ސަރުކާރުގެ ފުރިހަމަ އެއްބާރުލުން އަބަދުވެސް ލިބިގެންދާނެ ކަމަށް މިނިސްޓަރ ވިދާޅުވިއެވެ.

މޯލްޑިވްސް އިސްލާމިކް ބޭންކުގެ ޙިދުމަތް މީގެ ކުރިން ދެމުން އައީ ދެ އިމާރާތަކުންނެވެ. އެ ބޭންކުން ބުނީ، އެކަމުގެ ސަބަބުން ކަސްޓަމަރުންނަށް ދަތިތަކެއް ކުރިމަތިވަމުން އައިސްފައިވާއިރު އަލަށް ހުޅުވި ހެޑް އޮފީހުން އެބޭންކުގެ ހުރިހާ ޚިދުމަތެއް އެއް ބްރާންޗަކަށް ބަދަލުވެގެންދާނެ ކަމަށެވެ. އެގޮތުން ބޭންކުގެ އެކައުންޓް ހުޅުވުމާއި، ފައިސާ ޖަމާކުރުމުގެ ޙިދުމަތް (ކްރެޑިޓް އެޑްމިނިސްޓްރޭޝަނާއި ޓްރޭޑް ފިނޭންސް ސާވިސްގެ ޚިދުމަތް) ހެޑް އޮފީހުގެ ލިބޭނެއެވެ.

އިސްލާމިކް ބޭންކް ހިންގާ އިމާރާތް ހުންނަނީ މުލިއާގެ ކައިރިން ހެންވޭރު މެދުޒިޔާރާތްދޮށުގޭގަ އެވެ.

މި ރަސްމިއްޔާތުގައި އެމްއައިބީގެ މެނޭޖިން ޑިރެކްޓަރ އަބްދުލް މުހައިމިން އާއި ރައްޔިތުންގެ މަޖިލީހުގެ ރައީސް ޤާސިމް އިބްރާހިމްގެ އިތުރުން ސަރުކާރުގެ ވުޒާރާތަކުގެ އިސްވެރިން ބައިވެރިވެވަޑައިގެންނެވިއެވެ.