އަދީބު ގޭ ބަންދަށް ބަދަލުކޮށްފި
27 މާރިޗު 2019 | ބުދަ 06:19އަދީބު ގޭ ބަންދަށް ބަދަލުކުރީ، ޝަރުތުތަކާއި އެކުގައި
ކުރީގެ ނައިބުރައީސް އަހުމަދު އަދީބު
ކުރީގެ ނައިބުރައީސް އަހުމަދު އަދީބު ގޭ ބަންދަށް ބަދަލު ކޮށްފިއެވެ.
އަދީބު ގޭ ބަންދަށް ބަދަލު ކޮށްފައިވަނީ، އައިޖީއެމް ހޮސްޕިޓަލްގައި ފަރުވާދެއްވަމުންގެންދާތާ ގިނަ ދުވަސްތަކަކަށް ފަހު އަންގާރަ ދުވަހުގެރޭ މެންދަމު 1.30 ގައެވެ.
ރާއްޖެއެމްވީއަށް މައުލޫމާތު ދެއްވަމުން ކަރެކްޝަންސް އިންފޮމޭޝަން އޮފިސަރު އަހުމަދު ލުގުމާނު ވިދާޅުވީ އަދީބު ގޭ ބަންދަށް ބަދަލުކުރީ، ޝަރުތުތަކާއި އެކުގައި ކަމަށެވެ. އެހެން ނަމަވެސް އެއީ ކޮން ޝަރުތުތަކެއް ކަމެއް އޭނާ ވިދާޅެއް ނުވެެއެވެ.
އަދީބު ޖަލަށްލީފަހުން އެކި ފަހަރުމަތިން ހާލު ގޯސްވެ ހޮސްޕިޓަލްގައި ފަރުވާ ދީފައިވާއިރު، ރޭ ގޭ ބަންދަށް ބަދަލުކުރީ ޑޮކްޓަރުންގެ ލަފާގެ މަތިންކަން ނުވަތަ ނޫންކަން އަދި ވަނީ ސާފުވާ ގޮތް ނުވެފައެވެ.
ރިޔާސީ ލޯންޗުކޮޅުގައި އެއްޗެއް ގޮއްވާލި މައްސަލަ އާއި އެމްއެމްޕީއާރުސީގެ ހިޔާނާތުގެ މައްސަލާގައި 33 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ އަދީބުގެ ސިއްހީ ހާލަތު ގޯސްވެ އައިޖީއެމްއެޗުގައި ކިޑްނީގެ އޮޕަރޭޝަނެއް ކުރުމަށް ފަހު މީގެ ކުރިން ވެސް ގެއަށް ބަދަލު ކުރިއެވެ. ނަމަވެސް ފަހުން އޭނާ އަނބުރާ ޖަލަށް ބަދަލުކުރީ އެވެ.
އޭގެ ފަހުން ވެސް އަދީބުގެ ސިއްހީ ހާލަތު ގޯސްވެ އެކި ފަހަރުމަތިން ހޮސްޕިޓަލުގައި ފަރުވާދީފައިވެއެވެ.
