އެމްއެމްޕީއާރުސީން ނަގުދު ފައިސާ ލިބުނު ކަމަށް ބުނާ ބައެއްގެ ލިސްޓެއް އާންމުކުރަން އުޅޭ ކަމަށް ޕީއެންސީން ތުހުމަތުކޮށްފި
26 މާރިޗު 2019 | އަންގާރަ 09:51ލިސްޓްގައި ހިމަނާނެ ކަމަށް ވަނީ އަޅުގަނޑުމެންގެ ކެންޑިޑޭޓުންގެ ނަންތައް
އަބްދުއްރަހީމް
އެމްއެމްޕީއާރްސީގެ ބޮޑު ހިޔާނާތުގައި ނަގުދު ފައިސާ ލިބުނު މީހުންގެ ލިސްޓެއް ސަރުކާރުން އާއްމުކުރަން އުޅޭ ކަމުގެ ތުހުމަތުތަކެއް ޕްރޮގްރެސިވް ކޯލިޝަނުން ކޮށްފިއެވެ.
އަންގާރަ ދުވަހު ޕްރޮގްރެސިވް ކޯލިޝަން އިން ބޭއްވި ޕްރެސް ކޮންފަރެންސްގައި ވާހަކަ ދައްކަމުން ރައްޔިތުން މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ (އަދުރޭ) ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް އުފައްދާފައިވާ ރިޔާސީ ކޮމިޝަނުން އެ ލިސްޓް ނެރުމަށް މަސައްކަތް ކުރަމުން އަންނަކަން އެނގިފައިވާ ކަމަށެވެ. އަދި އެ ކޯލީޝަންގެ ފަރާތުން މަޖިލީހުގައި ވާދަކުރާ ކެންޑިޑޭޓުންގެ ނަންތައް އެ ލިސްޓްގައި އެ ކޮމިޝަނުން ހިމަނާނެކަން އެނގިފައިވާ ކަމަށް ވެސް އަބްދުއްރަހީމް ވިދާޅުވިއެވެ.
'އޭގެ ތެރޭގައި ރައީސް ޔާމީނާއި، މެޑަމް ފާތުންނާ އަޅުގަނޑުމެންގެ ވަރަށް ގިނަ ކެންޑިޑޭޓުންގެ ނަން ހިމަނާނެ ކަން އެނގިގެން މިދަނީ،'' އަބްދުއްރަހީމް ވިދާޅުވިއެވެ.
އެ ލިސްޓް އާއްމުކުރުމަށް އޮޑިޓާ ޖެނެރަލް އާއި ޕްރްސެކިއުޓާ ޖެނެރަލް އިނގިރޭސިވިލާތުގައި މަޝްވަރާތަކެއް ކުރައްވަމުން ގެންދަވާކަމުގެ މައުލޫމާތު ލިބިފައިވާ ކަމަށް ވެސް އަބްދުއްރަހީމް ވިދާޅުވިއެވެ. އެންޓި ކޮރަޕްޝަން ކަމިޝަނުން މިހާތަނަށް އާންމުކޮށްފައި ވަނީ އެމްއެމްޕީއާރުސީގެ ފައިސާ ޖަމާވި އެކައުންޓްތަކެވެ.
އަބްދުއްރަހީމް ވިދާޅުވީ، މަޖިލީހުގެ މެޖޯރިޓީ އެމްޑީޕީއަށް ނުލިބިދާނެތީ މި ސަރުކާރުން ސިޔާސީ ގޮތުން އިދިކޮޅު ފަރާތްތަކަށް ޖެއްސުން ކުރަމުންދާ ކަމަށެވެ.
ރާއްޖެއެމްވީ އިން ކުރި ސުވާލަކަށް ޖަވާބު ދެއްވަމުން އަބްދުއްރަހީމް ވިދާޅުވީ، މަޖިލީސް އިންތިހާބަށް ކެމްޕޭނު ކުރުމަށް އެންމެ ބޮޑަށް ދަތިވެފައިވަނީ ކުރީގެ ރައީސް އަބްދުﷲ ޔާމިން ހައްޔަރު ކުރުން ކަމަށާއި، ކެމްޕޭނަށް ބޭނުންވާ ފައިސާތައް ހުރި ފްރީޒް ކޮށްފައިވާ ޔާމީންގެ އެކައުންޓްތަކުގައި ކަމަށެވެ. އަދި އިލެކްޝަނުން އެ ޕާޓީ އަށް ދޭންޖެހޭ ފައިސާ ނުލިބޭ ކަމަށް އަބްދުއްރަހީމް ވިދާޅުވިއެވެ
''ކެމްޕޭނަކީ އެނގިވަޑައިގަންނަވާނެ ފައިސާއާ ނުލައި ކުރެވޭނެ ކަމެއް ނޫން. އެގޮތުން އަޅުގަނޑުމެންގެ ޕާޓީއަށް 2017 ވަނަ އަހަރުގެ ފައިސާ އާއި 2018 ވަނަ އަހަރު ފައިސާ ނުލިބި މިހިރީ. އެއީ ގާތްގަނޑަކަށް 18 ވަރަކަށް 20 ވަރަކަށް މިލިއަން ރުފިޔާގެ ވާހަކަ މި ދައްކަނީ. އެއިން އެއްވެސް ފައިސާއެއް އަޅުގަނޑުމެންނަކަށް ނުލިބޭ،'' އޭނާ ވިދާޅުވިއެވެ.
އަބްދުއްރަހީމް ވިދާޅުވީ، ޕީޕީއެމް އިން މޯލްޑިވިއަން އަށް ދައްކަން ޖެހޭ ފައިސާ ނުދެއްކިގެން އުޅެނީ ވެސް އެ ސަބަބާ ހުރެ ކަމަށެވެ.
ރިޔާސީ ކެމްޕޭން ދަތުރުތައް ކުރުމަށް ފަހު ޕީޕީއެމުން، ޤައުމީ އެއާލައިން މޯލްޑިވިއަން ހިންގާ އައިލެންޑް އޭވިއޭޝަނަށް ނުދައްކާ އޮތް 3.8 މިލިއަން ރުފިޔާ ހޯދުމަށް އެ ކުންފުނިން ކޯޓަށް ހުށަހަޅާފައި ވަނީ މިދިޔަ އަހަރުގެ ޑިސެމްބަރު މަހުއެވެ. އެ ފައިސާ ދެއްކުމަށް ކޯޓުން ވަނީ ޕީޕީއެމްގެ މައްޗަށް ހުކުމް ކޮށްފައެވެ.
ފައިސާ ހަމަޖައްސައިދޭން ފިނޭންސް މިނިސްޓްރީގައި ވެސް އެދިފައިވާ ވާނެ ކަމަށާއި، ފައިސާ ނުލިބިއްޖެ ނަމަ ކޯޓަށް މައްސަލަ ވައްދާނެ ކަމުގެ އިޝާރާތެއް އަދުރޭ ވަނީ ދެއްވާފައެވެ.
