ވަރާން ހޯދުމަށް ޔުވެންޓަސްއިން މަސައްކަތް ފަށައިފި

ރެއާލް މެޑްރިޑަށް ކުޅެމުން އަންނަ ފްރާންސްގެ ޑިފެންޑަރ ރަފައެލް ވަރާން ހޯދުމަށް ޔުވަންޓަސްއިން މަސައްކަތް ފަށައިފިއެވެ.

އިޓަލީގެ ނޫސްތަކުން ބުނީ، ކުރިޔަށް އޮތް ސީޒަނަށް އާމަޒުކޮށް ވަރާން ހޯދުމަށް ޔުވަންޓަސްއިން މަސައްކަތް ކުރަމުން އަންނަ ކަމަށާއި، އެކަމަށް ވާންޖެހޭ ތައްޔާރީތައް އެ ކްލަބުން ވަމުން އަންނަ ކަމަށެވެ.

ވަރާން ހޯދުމަށް ޔުވަންޓަސްއިން މަސައްކަތް ކުރަމުން އަންނަ ކަމަށް ރިޕޯޓްތައް ބުނަން ފަށާފައި ވަނީ މި ސީޒަނަށްފަހު އޭނާ ރެއާލް ދޫކޮށްލާނެ ކަމަށް އަޑުތައް ފެތުރެން ފަށާފައިވާ ދަނޑިވަޅެއްގައެވެ.

ރެއާލްގެ އާ ކޯޗު ޒައިނުއްދީން ޒިދާން އާއި ވަރާންއާ ދެމެދު ވަރުގަދަ ގުޅުމެއް އޮތް ނަމަވެސް ރިޕޯޓްތައް ބުނާ ގޮތުން މި ސީޒަނުގައި ރެއާލްގެ ހާލަތާމެދު ވަރާން ވަނީ ވަރަށް ބޮޑަށް މާޔޫސްވެފައެވެ.

ވަރާން ވަނީ ރެއާލްއާއެކު ހަދާފައިވާ އެއްބަސްވުން 2017 ވަނަ އަހަރު އިތުރުކޮށްފައެވެ. އެގޮތުން އޭނާ 2022 ވަނަ އަހަރުގެ ނިޔަލަށް އެ ކްލަބުގައި މަޑުކުރަން ޖެހޭނެއެވެ.

ފްރާންސްގެ ލެންސްއިން 2010 ވަނަ އަހަރުގެ ސީޒަނުގައި ކެރިޔަރު ފެށި ވަރާން ވަނީ އެ ކްލަބަށް ކުޅުނު 24 މެޗުގައި ދެ ލަނޑު ޖަހާފައެވެ. އެއަށް ފަހު ވަރާން 2011 ވަނަ އަހަރުގެ ސީޒަނުގައި ބަދަލުވީ ރެއާލްއަށެވެ.

އުމުރުން 25 އަހަރުގެ ވަރާން ވަނީ ރެއާލްއަށް މިހާތަނަށް ކުޅުނު 268 މެޗުގައި 12 ލަނޑު ކާމިޔާބުކޮށް، އެޓީމާއެކު ދެ ލަލީގާ، އެއް ކޮޕަޑެލްރޭ، ދެ ސްޕެނިޝް ސުޕަކަޕް، ހަތަރު ޗެމްޕިއަންސް ލީގު، ތިން ޔުއެފާ ސުޕަކަޕް އަދި ހަތަރު ކްލަބް ވޯލްޑް ކަޕް ކާމިޔާބު ކޮށްފައެވެ.

ފްރާންސް ގައުމީ ޓީމާއެކު މިދިޔަ އަހަރު ވޯލްޑް ކަޕް ކާމިޔާބުކުރި ވަރާން ވަނީ ގައުމީ ޓީމަށް މިހާތަނަށް ކުޅުނު 55 މެޗުގައި ހަތަރު ލަނޑު ކާމިޔާބު ކޮށްފައެވެ.