އިނގެރޭސިވިލާތުގެ 5 މިސްކިތަކަށް ގެއްލުންދީފި

އިނގެރޭސިވިލާތުގެ ބަރމިންގހަމްގެ 5 މިސްކިތަކަށް ގެއްލުންދިން މައްސަލައެއް ބަލަންފަށައިފިއެވެ.

ބުރާސްފަތި ދުވަހުގެ ހެނދުނު ދިން މި ހަމަލާ ބަލަމުންދާ އިނގެރޭސިވިލާތުގެ ކައުންޓަރ ޓެރަރިޒަމް ފުލުހުންގެ ޓީމުން ބުނީ، މިސްކިތްތަކަށް ގެއްލުންދީފައިވަނީ ސްލެޖްހެމަރ (ބޮޑު މަރުތެޔޮ) އިން ކަމަށާއި، 5 މިސްކިތައް ގެއްލުންދިން މައްސަލަ ތަޙުޤީޤު ކުރަމުންދަނީ ގުޅިފައިވާ އެއް މައްސަލައިގެ ގޮތުގައި ކަމަށެވެ. މައްސަލައިގެ ތަޙުޤީޤު ވަރަށް ބާރަށް ކުރިއަށްދިޔަ ނަމަވެސް މި ހަމަލާ ދީފައިވަނީ ކޮން ސަބަބަކާއި ހުރެކަން މިހާތަނަށް ކަށަވަރު ކުރެވިފައި ނުވާކަމަށް ފުލުހުން ބުނެއެވެ.

ބަރމިންގްހަމްގެ މިސްކިތްތަކަކަށް ގެއްލުންދިން މި ދަނޑިވަޅަކީ، ނިއުޒިލޭންޑްގެ ދެ މިސްކިތަކަށް ބަޑީގެ ހަމަލާއެއްދީ 50 މީހުން ޝަހީދުކޮށްލުމާއި ގުޅިގެން، އިނގެރޭސިވިލާތުގައި ދިރިއުޅޭ މުސްލިމުންނަށް އެފަދަ ހަމަލާއެއް ކުރިމަތިވިޔަ ނުދިނުމަށް ކުރެވެންހުރި ހުރިހާ ކަމެއް ކުރަމުންދާކަމުގެ ޔަޤީންކަން އެ ޤައުމުގެ ވެރިން ރައްޔިތުންނަށް ދެމުންދާ ދަނޑިވަޅެކެވެ.

އިނގެރޭސިވިލާތުގެ މިސްކިތަކަށް ގެއްލުންދިނުމާއި ގުޅިގެން އެ ޤައުމުގެ ހޯމް ސެކްރެޓަރީ ސާޖިދު ޖާވިދު ވިދާޅުވީ މި އަމަލާއިމެދު ވަރަށް ބޮޑަށް ކަންބޮޑުވާ ކަމަށާއި، ހަތުރުވެރި އަމަލުތަކާއި ނަފުރަތަކީ އިނގެރޭސި މުޖުތަމަޢުގައި ޖާގައެއް އޮތް ކަމެއް ނޫން ކަމަށާއި، އެފަދަ ކަންކަން ބަލައި ނުގަންނާނެ ކަމަށެވެ.

ނިއުޒިލޭންޑްގައި މުސްލިމުންނަށް އަމާޒުކޮށް ދިން ހަމަލާ އާއި ގުޅިގެން މުސްލިމުންނާއި ދެކޮޅަށް ހަރުކަށި ފިޔަވަޅު ގެންގުޅޭ އެހެން ފަރާތްތަކަށް ހިތްވަރު ލިބި، އެފަދަ ހަމަލާއެއް ދީފާނެކަމަށް ބަލައި ދުނިޔޭގެ އެކި ޤައުމުތަކުގައި ކަމާއިބެހޭ ފަރާތްތަކާއި މުޖުތަމަޢުގައި ހިމެނޭ އެކި ފަރާތްތައް ދަނީ މުސްލިމުންނަށް ހިމާޔަތްދީ މިސްކިތްތަކާއި މުސްލިމުންގެ އިޖުތިމާޢީ ސެންޓަރުތައް ކައިރީ ފޯރިމަރަމުންނެވެ.