"އަމީނީ ސަންދަރެސް" ގެ ނަމުގައި ޖިމެއް ހުޅުވުމަށް ހަމަޖެހިފައިވާ ކަމަށް މިނިސްޓްރީ އޮފް ޔޫތު ސްޕޯރޓްސް އެންޑް ކޮމިއުނިޓީ އެންޕަވަރމެންޓްގެ ޑެޕިއުޓީ މިނިސްޓަރ މުހައްމަދު އަޒްމީލް ވިދާޅުވެއްޖެއެވެ.

ރައީސް އިބްރާހިމް މުހައްމަދު ސޯލިހުގެ 100 ދުވަހުގެ ވައުދުތަކުގެ ދަށުން ހުޅުވުމަށް ހަމަޖެހިފައިވާ "އަމީނީ ސަންދަރެސް" ޖިމާއި ބެހޭގޮތުން ރާއްޖެޓީވީއާއި ވާހަކަ ދައްކަވަމުން އަޒްމީލް ވިދާޅުވީ ރައްޔިތުން ހަށިހެޔޮ ދުޅަހެޔޮ ސިއްހަތެއްގައި ބޭތިއްބުމަކީ ސަރުކާރުން ވަރަށްބޮޑު އިސްކަމެއް ދޭ ކަމެއް ކަމަށްވާއިރު އާންމު ރައްޔިތުންނަށް މިފަދަ ޚިދުމަތެއް ހިލޭ ފޯރު ކޮށްދެވިގެން ދިއުމަކީ އެތައްބަޔަކަށް އެކަމުގެ ފައިދާ ކުރާނެ ކަމެއްކަމަށެވެ.

"މާލޭގައި ގިނަ ޖިމްތަކެއް އެބަހުރި. ނަމަވެސް ކޮންމެ ކޮންމެ މީހަކަށް ބޮޑުއަގެއް ދައްކާފައި އެ ޖިމްތަކަށް ދިއުމަކީ އުނދަގޫ ކަމަކަށް ވާނެ. ނަމަވެސް އަމީނީ ސަންދަރެސް ޖިމަށް އެއްވެސް ފައިސާއެއް ދައްކާކަށް ނުޖެހޭނެ. 24 ގަޑިއިރު މި ޖިމުން ޚިދުމަތް ލިބޭނެ" އަޒްމީލް ވިދާޅުވިއެވެ. 

ކުރިއަށް އޮތްތަނުގައިވެސް އައުޓްޑޯ ޖިމްތައް ހުޅުވުމަށް ހަމަޖެހިފައިވާ ކަން ފާހަގަ ކުރަށްވާ އޭނާ ވިދާޅުވި ސަލާހުއްދީން ބިލްޑިންގު ކައިރި ހުޅުވިގެންދާ " އަމީނީ ސަންދަރެސް" ގެ އިތުރުން ގަލޮޅު ސިޓީޕާކް ސަރަހައްދު ކައިރި އައުޓްޑޯ ޖިމެއް ހުޅުވުމަށް ހަމަޖެހިފައިވާއިރު މަޖީދީމަގު ބޮނޑިބަތް ޕާކާއި، ބުރިޖު ސަރަހައްދުގެ އިތުރުން ކުރީގެ ވެސްޓްޕާކް ސަރަހައްދުގައިވެސް ޖިމް ހުޅުވުމަށް ހަމަޖެހިފައިވާ ކަމަށެވެ.

"އަމީނީ ސަންދަރެސް" މާރިޗު މަހުގެ 24 ވަނަ ދުވަހުގެ 04:00 ގައި ކުލަ ގަދަ ރަސްމިއްޔާތަކާއި އެކު ޖިމް ހުޅުވުމަށް ހަމަޖެހިފައިވާއިރު މި ޖިމް 24 ގަޑިއިރު ހުޅުވިފައި ހުންނާނެ ކަމަށް ޔޫތުމިނިސްޓްރީން މައުލޫމާތު ދެއެވެ.