ރިޔާސީ ކޮމިޝަންތަކުގެ ބިލް އަންނަ މަހު 15 ގެ ކުރިން މަޖިލީހުގެ ތަޅުމަށް ފޮނުވާނަން: ރިޔާޒް ރަޝީދު

ރިޔާސީ ކޮމިޝަންތަކުގެ ބިލް އަންނަ މަހު 15 ގެ ކުރިން މަޖިލީހުގެ ތަޅުމަށް ފޮނުވާނެ ކަމަށް މިނިވަން މުއައްސަސާތަކާ ބެހޭ ކޮމިޓީގެ މުގައްރިރު ރިޔާޒް ރަޝީދު ވިދާޅުވެއްޖެއެވެ.

ރިޔާޒް ވިދާޅުވީ ބިލްގެ ސުންގަނޑި ހަމަވާނީ އަންނަ މަހު 15 ގައި ކަމަށާއި، ސުންގަނޑި ހަމަވުމުގެ ކުރިން ބިލްގެ މަސައްކަތް ނިންމާލުމަށް ފަހު، މަޖިލީހުގެ ތަޅުމަށް ފޮނުވާނެ ކަމަށެވެ.

ކޮރަޕްޝަނާއި ފަސާދައިގެ އަމަލުތައް ތަހުގީގު ކުރުމަށް ރައީސުލްޖުމްހޫރިއްޔާ އުފައްދާފައިވާ ރިޔާސީ ކޮމިޝަނާއި މަރުތައް ބެލުމަށް އުފައްދާފައިވާ ރިޔާސީ ކޮމިޝަނަށް ބާރު ދިނުމަށް ހުށަހަޅާފައިވާ ބިލް ހަތަރު ފަހަރަށް އެޖެންޑާ ކުރުމަށް ފަހު ވެސް ބިލް ވަނީ ފާސްނުވެފައެވެ.

ތިން ފަހަރަށް މަޖިލިސް ޖަލްސާއަށް ބިލް އެޖެންޑާކޮށް، ފާސްވެފައި ނުވަނީ ބިލް ފާސްކުރަން ބޭނުންވާ ކޯރަމް މަޖިލީހުގެ ތަޅުމުގައި ނެތުމުގެ ސަބަބުންނެވެ. ރައްޔިތުން އަމަލުކުރަން ލާޒިމު ކުރާ ގާނޫނެއް ފާސްކުރާ ނަމަ، މަޖިލީހުގެ ތަޅުމުގައި ވޯޓަށް އަހާ ވަގުތު 43 މެމްބަރުން ތިބެންޖެހެއެވެ.

ހަތަރު ވަނަ ފަހަރަށް ބިލް އެޖެންޑާކުރުމަށް ފަހު، ބިލް އެޖެންޑާއިން ވަނީ ނަގާފައެވެ. ބިލް އެޖެންޑާ އިން ނަގަމުން މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް ގާސިމް އިބްރާހީމް ވަނީ އެ ބިލް ދިރާސާ ކުރި ކޮމިޓީގެ މައްސަލައެއް ފާހަގަކުރެވިގެން އެ މައްސަލަ ބަލަމުން ދާތީ އެ ބިލަށް ވޯޓަށް ނާހަން ރިޔާސަތުން ނިންމާފައިވާ ކަމަށް ވިދާޅުވެފައެވެ.

ބިލް ދިރާސާކުރިއިރު ކޮމިޓީގެ މުގައްރިރުކަން ކުރެއްވި އައްޑޫމީދޫ ދާއިރާގެ އެމްޑީޕީގެ މެމްބަރު ރޮޒައިނާ އާދަމް ވަނީ ރިޔާސަތުން ފާހަގަކުރީ ދޮގު ވާހަކަތަކެއް ކަމަށާއި ކޮމިޓީން ނުނިންމާ އެއްވެސް ކަމެއް އެ ބިލްގައި ނުހިމެނޭނެ ކަމަށް މީގެ ކުރިން ވިދާޅުވެފައެވެ. އަދި ވޯޓަށް ނޭހުމަށް ނިންމީ މަޖިލީހުގެ ގަވާއިދާ ޚިލާފަށް ކަމަށާއި އެ ގޮތަށް އަމަލުނުކުރެއްވޭނެ ކަމަށް ވިދާޅުވެފައެވެ. އެ ބިލް ފާސްކުރަން ބޭނުން ނުވަނީ މަރުތަކާއި ކޮރަޕްޝަންގެ ކަންކަމުގައި ބައިވެރިވާ ބަޔަކު މަޖިލީހުގައި ތިބުމުން ކަމަށް ގަބޫލުކުރެއްވޭ ކަމަށް ވެސް ރޮޒައިނާ ވިދާޅުވިއެވެ.

ސަރުކާރުގެ ފަރާތުން ހުށަހެޅި އެ ބިލު ފާސްކުރަން އެންމެ ފުރަތަމަ އެޖެންޑާ ކުރީ މިދިޔަ އަހަރުގެ ޑިސެމްބަރު މަހުގެ 15 ވަނަ ދުވަހުއެވެ. ސަރުކާރު ކޯލިޝަންގެ މެޖޯރިޓީ މަޖިލީހުގައި އޮވެ، ބިލް ފާސްނުކުރެވިވާތީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ އެކަމުގެ ކަންބޮޑުވުން ފާޅުކޮށްފައެވެ. ގުޅިފައިވާ ޕާޓީތަކުގެ ޕާލަމެންޓްރީ ގްރޫޕުގެ މެމްބަރުންގެ އަދަދު 47 އަށް އަރައެވެ.