މާލެ ތެރޭގައި ތެޔޮ ވިއްކުން ހުއްޓުމަކަށް ގެނެސް، ޕެޓްރޯލް ޝެޑްތައް އިންޑަސްޓްރިއަލް ވިލެޖަށް ބަދަލުކުރަނީ
19 މާރިޗު 2019 | އަންގާރަ 06:31ހުސްކުރާ ބިންތަކުގެ ތެރެއިން ބައެއް ބިންތައް ޕަބްލިކް ޓްރާންްސްޕޯޓަށް ބޭނުންކުރެވޭނެ
މާލެ އިންޑަސްޓްރިއަލް ވިލެޖް ސަރަހައްދު
މާލޭ ތެރޭގައިި ތެޔޮ ވިއްކުން ހުއްޓުމަކަށް ގެނެސް، ޕެޓްރޯލް ޝެޑްތައް އިންޑަސްޓްރިއަލް ވިިލެޖަށް ބަދަލުކުރުމަށް ނިންމާފައިވާ ކަމަށް މާލެ ސިޓީ ކައުންސިލްގެ މޭޔަރު ޝިފާ މުހައްމަދު ވިދާޅުވެއްޖެއެވެ.
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ސަރަހައްދު، ދަރުމަވަންތަ ބިލްޑިންގއާ އިންވެގެން ހުރި ޕެޓްރޯލް ޝެޑްތައް ނަގައި، އެ ސަރަހައްދު ހުސްކުރުމުގެ މަސައްކަތް އަންނަނީ ކުރިއަށްގެންދަމުންނެވެ.
ރާއްޖެއެމްވީއަށް މައުލޫމާތު ދެއްވަމުން މޭޔަރު ޝިފާ މުހައްމަދު ވިދާޅުވީ މާލެ ތެރޭގައި ޕެޓްރޯލާއި، ތެޔޮ ވިއްކުމަކީ ރައްކާތެރިކަމެއް ވެސް ނޫން ކަމަށާއި، އާންމު ރައްޔިތުންގެ ވެސް ބޮޑު ޝަކުވާއެއް އެކަމާ ގުޅިގެން ލިބޭ ކަމަށެވެ. އެކަމުގައިި މަޝްވަރާތައް ކުރުމަށް ފަހު ނިންމާފައި ވަނީ ޕެޓްރޯލްް ޝެޑްތައް އިންޑަސްޓްރިއަލް ވިލެޖަށް ބަދަލުކުރުމަށް ކަމަށް ޝިފާ ވިދާޅުވިއެވެ.
އޭގެ އިތުރުން ތެޔޮ ވިއްކޭނެ ވަކި ސަރަހައްދުތަކެއް ކަނޑައެޅުމަށް މަޝަަވްރާތައްކޮށް، މަސައްކަތްތައްކުރާ ކަމަށާއި، ފުޅި ފުޅިޔާއި، ހަންހަމުގައި މާލެ ތެރޭގައި ޕެޓްރޯލް ވިއްކުން ވެސް ހުއްޓުމަކަށް ގެނައުމުގެ މަސައްކަތްކުރާ ކަމަށް ޝިފާ ވިދާޅުވިއެވެ.
ޕެޓްރޯލް ޝެޑްތައް ނެގުމަށް ފަހު އެ ސަރަހައްދު ބޭނުންކުރުމަށް ހަމަޖެހިފައި ވަނީ ކޮންކަމަކަށް ތޯ ސުވާލުކުރުމުން ޝިފާ ވިދާޅުވީ ޕަބްލިކް ޓްރާންސްޕޯޓެއް އަންނައިރު، އެކަމަށް ހާއްސަ ސަރަހައްދުތަކެއް ވެސް ހުންނަންޖެހޭ ކަމަށެވެ. އެހެންކަމުން ހުސްކުރެވޭ ބައެއް ބިންތައް ޕަބްލިކް ޓްރާސްޕޯޓަށް ބޭނުންކުރެވޭނެ ކަމަށް ޝިފާ ވިދާޅުވިއެވެ.
"ބައެއް ބޭފުޅުން އެބަ ވިދާޅުވޭ، ޕާކިން ޒޯނުތައް ހެދުމަށްވެސް. ނަމަވެސް މާލެއަށް އެބަ ބޭނުންވޭ ޕަބްލިކް ޓްރާންސްޕޯޓްގެ ނިޒާމެއް. އެ ނިޒާމު އަންނައިރު، އެކަމަށްވެސް ބައެއް ސަރަހައްދުތައް އެބަ ބޭނުންކުރެވެންޖެހޭ،" ޝިފާ ވިދާޅުވިއެވެ.
މާލޭގައި ޕަބްލިކް ޓްްރާންސްޕޯޓްގެ ހިދުމަތް ދިނުމަށް، އެމްޓީސީސީއާ ހަވާލުކުރެވި މަސައްކަތްތައް ވަނީ ފަށައިފައެވެ. އެގޮތުން މާލެއަށް ހާއްސަ މިނީ ބަސްތައް ގެނައުމުގެ މަސައްކަތްތައް މިހާރު އަންނަނީ ކުރަމުންނެވެ.
އެންމެ ފަހުން މާލޭގައި ޕަބްލިކް ޓްރާންސްޕޯޓްގެ ހިދުމަތްދީފައި ވަނީ 2008 ވަނަ އަހަރު އުފެދުނު އެމްޑީޕީ ސަރުކާރުގައެވެ. އޭގެ ފަހުން އެ ހިދުމަތް ހުއްޓާލިގޮތަށް، މާލޭގައި ޕަބްލިކް ޓްރާންސޕޯޓްގެ ހިދުމަތެއް ފޯރުކޮށްދީފައެއް ނުވެއެވެ. ޕަބްލިކް ޓްރާންސްޕޯޓެއް ޤާއިމްކުރުމުގެ މައިގަނޑު މަޤްސަދަކީ، ރައްޔިތުންނަށް ހެޔޮ އަގުގައިި ދަތުރުކުރެވޭނެ މަގު ފަހިކޮށްދިނުމެވެ.
