ރޫމް ބޯއީންނަށް ނިސްބަތްކޮށް އޭދަފުށީ ދާއިރާގެ މެމްބަރު އަހުމަދު ސަލީމް (ރެޑްވޭވް ސަލީމް) ދެއްކެވި ވާހަކަތައް މޯލްޑިވްސް ލޭބަރ އެންޑް ސޯޝަލް ޑިމޮކްރަޓިކް ޕާޓީން ކުށްވެރިކޮށްފިއެވެ. 

ލޭބާ ޕާޓީން ހޯމަ ދުވަހު ނެރުނު ނޫސްބަޔާނުގައި ބުނީ 19 ވަނަ ރައްޔިތުންގެ މަޖިލީހުގެ އިންތިޚާބުގައި ވާދަކުރާ ކެންޑިޑޭޓުންގެ މެދުގައި ޕަބްލިކް ސާރވިސް މީޑިއާ އިން އިންތިޒާމްކޮށްގެން ބޭއްވި ބަހުސްގައި އޭދަފުށީ ދާއިރާއަށް ވާދަކުރާ ވިޔަފާރިވެރިޔާ ސަލީމު ވާދަވެރި ކެންޑިޑޭޓަކަށް ނިސްބަތްކޮށް ރޫމް ބޯއީން މަޖިލީހަށް ވާދަކުރުން ކުފޫހަމަނުވާ ކަމަށް ދޭހަވާ މޭރުމަކުން ވާހަކަ ދައްކާފައިވާ ކަމަށެވެ.

ލޭބާ ޕާޓީން ބުނީ ސަލީމް ނުސީދާކޮށް އިޝާރާތްކުރި ކެންޑިޑޭޓަކީ އެ ޕާޓީގެ ކެންޑިޑޭޓެއް ކަމުގައި ގަބޫލުކުރެވޭ ކަމަށާއި، އޭނާގެ މި އަމަލަކީ ރާއްޖޭގެ އެންމެހާ މަސައްކަތްތެރިންނަށް މަލާމާތާއި ފުރައްސާރަ ރައްދުވާ، ދަށުދަރަޖަގެ އަމަލަކަށް ވާތީ ވަރަށް ހަރުކަށި އިބާރާތުން މި ނާތަހުޒީބު އަމަލު ކުށްވެރި ކުރާ ކަމަށެވެ.

ސަލީމްއަށް ތާއީދުނުކުރާކަން ހާމަކޮށް ލޭބާ ޕާޓީން ބުނީ އޭދަފުށި ދާއިރާގެ އެންމެހާ މަސައްކަތްތެރިންނާއި، އާއިލާތަކުން އަދި މަސައްކަތްތެރިންނަށް ހެޔޮއެދޭ އެންމެހާ ފަރާތްތަކުން މަސައްކަތްތެރިން، އޭނާގެ ނާތަހުޒީބު އަމަލު އަމަލަށް މައާފަށް ނޭދޭ ނަމަ އޭނާގެ ވިޔަފާރިތައް ބައިކޮޓް ކުރުމަށް އެދޭ ކަމަށެވެ. 

ލޭބާ ޕާޓީން ބުނީ މަސައްކަތްތެރިންނަށް އިހާނެތި ބަސްބުނުމާއި އެފަދަ އަމަލެއް އެ ޕާޓީ ވުޖޫދުވެފައިވާއިރު، ތަހައްމަލު ނުކުރާނެ ކަމަށެވެ.

މީގެ އިތުރުން ލޭބާ ޕާޓީން ބުނީ ސަލީމު ފަދަ ރާއްޖޭގެ މަދު ބަޔަކު މަހުޖަނުން އިންތިހާއަށް ފައިސާގެ ބޭނުން ނަހަމަ ގޮތުގައި ހިފައިގެން ދައުލަތުގެ ބާރުތައް ފިރުކާލައިގެން ދައުލަތުގެ ވަސީލަތްތަކުގެ މައްޗަށް އަތްގަދަ ކުރުމަށް ކުރަމުންދާ މަސައްކަތަކީ އެ ޕާޓީން ނުހަނު ކަންބޮޑުވާ ކަމެއް ކަމަށާއި، މި ކަމާ މެދު ރައްޔިތުން ފުންކޮށް ވިސްނުމަށް އެދޭ ކަމަށެވެ.

އެ ގޮތުން އަންނަ މަހު 6 ވަނަ ދުވަހު ބާއްވާ މަޖިލިސް އިންތިޚާބުގައި ގައުމުގެ ކުރިމަގާ މެދު ވިސްނައި، މަހުޖަނުން ފައިސާއަށް ވޯޓު ނުވިއްކުމަށާއި، މަސައްކަތްތެރިން ބާރުވެރިކުރުވައި، ރައްޔިތުންގެ ހައްގުތައް ހޯދުމަށް މަސައްކަތް ކުރާ ކެންޑިޑޭޓުންނަށް ވޯޓު ދިނުމަށް ލޭބާ ޕާޓީން ވަނީ އިލްތިމާސްކޮށްފައެވެ.

ލޭބާ ޕާޓީން ސަލީމުގެ މިއަމަލު ކުށްވެރިކޮށްފައިވާއިރު، ސަލީމުގެ މިވާހަކަތަކުން ގިނަ ބައެއްގެ ފާޑުކިޔުން އޭނާއަށް ވަނީ އަމާޒުވެފައެވެ. ހާއްސަކޮށް ރިސޯޓްތަކުގައި މަސައްކަތްކުރާ ގިނަ ބަޔަކު ދަނީ އޭނާގެ ވިޔަފާރިތައް ބޮއިކޮޓްކުރުމަށް ވެސް ގޮވާލަމުންނެވެ. 

ސަލީމްގެ އިތުރުން އޭނާގެ ގާތް މެންބަރެއް ކަމަށްވާ ބާރަށު ދާއިރާގެ މެންބަރު އިބްރާހީމް ޝުޖާއު ވެސް މަސްވެރިންނާ ބެހޭ ގޮތުން ދެއްކެވި ވާހަކަތަކާ ގުޅިގެން އޭނާ އަށް ވެސް ވަނީ ވަރަށް ބޮޑަށް ފާޑުކިޔުން އަމާޒުވެފައެވެ. ޓީވީއެމްގެ ބަހުސްގައި ކައުންސިލްތަކުގައި ވެސް މަސްވެރިން އެބަ ތިބި ކަމަށާއި ޕާޓީއަށްޓަކައި "ތިލަފަތަށްޓަކައި" އެފަދަ މީހުން ހޮވައިގެން ކައުންސިލްތައް ހިންގާނީ ކިހިނެއްތޯ ޝުޖާއު ވަނީ ސުވާލުކުރައްވާފައެވެ.