ރާއްޖެ ޓީވީގެ ޓެލެތޯނުން މުޅި ދުނިޔެއަށް މިދިން މެސެޖަކީ ދިވެހިން މިތިބީ ކުޅިބަލަން ނޫންކަން: އަހުމަދު ސަލީމް
14 ސެޕްޓެމްބަރު 2017 | ބުރާސްފަތި 21:165.16 މިލިއަން ރުފިޔާއަކީ 27 މިލިއަން ޓާކާ
ރާއްޖެ ޓީވީގެ އެމްޑީ އަހުމަދު ސަލީމް: ދިވެހިންނަށް ރީތި ނަމެއް ހޯދައިދެވުނީތީ އުފާކުރައްވާ
ރޮހިންޖާ މުސްލިމުންނަށް އެހީވުމަށް "ދިވެހިން، ރޮހިންޖާ މުސްލިމުންނާއެކު" މިނަމުގައި ރާއްޖެ ޓީވީން ހިންގި ޓެލެތޯނުން މުޅި ދުނިޔެއަށް ދިން މެސެޖަކީ ދިވެހިން ތިބީ ރޮހިންޖާ މުސްލިމުންނަށް އަނިޔާކުރިމަތިވަމުންދާއިރު، ކުޅިބަލަން ނޫންކަމަށް ރާއްޖެ ޓީވީގެ މެނޭޖިންގ ޑިރެކްޓަރ އަހުމަދު ސަލީމް ވިދާޅުވެއްޖެއެވެ.
އަހުމަދު ސަލީމް މިހެން ވިދާޅުވީ ރާއްޖެ ޓީވީން ކުރިއަށް ގެންދިޔަ ޓެލެތޯނަށް ލިބުނު 5.16 މިލިއަން ރުފިޔާ ދިވެހި ރެޑްކްރެސެންޓާ ހަވާލު ކުރުމަށް ބުރާސްފަތި ދުވަހުގެރޭ ބޭއްވި ޚާއްޞަ ޙަފްލާގައި ނޫސްވެރިންނަށް މައުލޫމާތު ދެއްވަމުންނެވެ.
ސަލީމް ވިދާޅުވީ ވަރަށް ދަތިހާލުގައި ވަރަށް ނިކަމެތި ގޮތެއްގައި އުޅެމުންދިޔަ ބައެއްގެ ހާލަތު ފެންނަމުންދިޔަ ދަނޑިވަޅެއްގައި އެމީހުންނަށް ބޭނުންވާ ޒަރޫރީ ކަންތައްތަކެއް ފުރިހަމަ ކުރުމަށް ގާތްގަނޑަކަށް 30 ގަޑިއިރުގެ ތެރޭގައި 5.16 މިލިއަން ރުފިޔާ ލިބިގެންދިޔަ ދިއުމަކީ ދިވެހިންގެ ހިތުގައި މުސްލިމުންނާ ދޭތެރޭގައި އޮތް އޯގާތެރިކަމާއި ރަހުމާއި ހަމްދަރުދީ ކިތައްމެ ރަނގަޅަކަށްވެސް ފެނިގެން ދިޔަ ކަމެއް ކަމަށް ޤަބޫލުކުރައްވާ ކަމަށެވެ.
ނިސްބަތުން ބަލާއިރު ކުޑަ ވަގުތުކޮޅެއްގެ ތެރޭގައި މިހޯދުނު ފައިސާއަކީ ރޮހިންޖާ މުސްލިމުންގެ ހާލަތަށް ކޮންމެވެސް ވަރެއްގެ ބަދަލެއް ގެނެވިގެންދާނެ އެހީ ވެގެންދާނެކަމަށް ޤަބޫލު ކުރައްވާ ކަމަށްވެސް ސަލީމް ވިދާޅުވިއެވެ.
ރާއްޖެ ޓީވީގެ އެމްޑީ ވިދާޅުވީ މިއެހީ ފޯރުކޮށްދެވޭނީ ކަނޑައެޅިފައިވާ ވަކި ދާއިރާތަކަކަށް ކަމަށާއި ވީ އެންމެ އަވަހަކަށް ފައިސާ ރައްދުކުރުމަކީ ރާއްޖެ ޓީވީގެ ވަރަށް ބޮޑު އެދުމެއް ކަމަށެވެ. އަދި ދިވެހި ރެޑްކްރެސެންޓާއި ފައިސާ ހަވާލުކުރީވެސް އެބޭނުމުގައިކަމަށް ސަލީމް ވިދާޅުވިއެވެ.
"މިވަނީ މިއެހީ ބޭނުން ކުރަން ވަކި ދާއިރާތަކެއް ކަނޑައަޅާފައި. ފެނާ ފާޚާނާގެ ކަންތައްތަކާއި ކާބޯތަކެއްޗާ ބޭސްފަރުވާ ކަމަށް އަޅުގަނޑުމެން މިވަނީ ކަނޑައަޅާފައި. ވަރަށް ބޮޑަށް ބޭނުންވޭ ވަރަށް އަވަހަށް މިއެހީ ޙައްޤުވާ ފަރާތްތަކަށް ފޯރުކޮށްދިނުމަށް.ރާއްޖެ ޓީވީން މެދުވެރިވެގެން މިފަންޑު އެއްކުރިއެއް ކަމަކު މިފައިސާ ހަވާލު ކުރާނީ ދިވެހި ރައްޔިތުންގެ ނަމުގައި. މިއެހީއާއެކީގައި އަޅުގަނޑު ޤަބޫލްކުރާނީ މީ ދިވެހިން ދުނިޔެއަށްދިން މެސެޖެއްގެ ގޮތުގަ. އެއީ އަޅުގަނޑުމެން މިތިބީ ހަމަ ކުޅިބަލަން އިށީނދެ މަޑުން ތިބޭ ގޮތަކަށް ނޫނޭ. އަޅުގަނޑުމެންނަށް ވެވުނު ކޮންމެކަމެއް ސުލްހަވެރިކަމާއެކު މިތިބީ ކޮށްދޭށޭ. އެހީގެ ގޮތުންވިއަސް އެންމެ ފުރަތަމަ އެހީވާ ޤައުމެއްގެ ގޮތުގައި ދިވެހިން ހިމެނިގެން ދިއުމަކީ އަޅުގަނޑަށް ހީވަނީ ރާއްޖެއަށް ލިބޭ ވަރަށް ބޮޑު ޝަރަފެއްހެން. އެއުފަލުގައި އަޅުގަނޑުމެންނަށްވެސް ކޮންމެވެސް ދައުރެއް އަދާކުރެވުނީތީ ވަރަށް ބޮޑަށް ހިތްހަމަޖެހިފައި އަޅުގަނޑުމެން މިތިބީ" ސަލީމް ވިދާޅުވިއެވެ.
ސަލީމް ވިދާޅުވީ ރާއްޖެޓީވީން އިސްނަގައިގެން ކުރިއަށްގެންދިޔަ މި މަސައްކަތުގައި ރައްޔިތުން ފައިސާގެ އެހީ ދީފައިވަނީ ވަރަށް ލޯބިން ކަމަށާއި އޭގެ ތެރޭގައި ކުޑަކުޑަ ކުދިން ތެމިގެންނާއި ހިނގާ އުޅެން ދަތި ފަރާތްތައް ޓެކްސީތަކުގައި އަދި ރަށްރަށުގައި ތިއްބެވި ފަރާތްތައް ސިޓީއާއެކުވެސް ފައިސާ ފޮނުވައިދީފައިވާކަން ސަލީމް ފާހަގަ ކުރެއްވިއެވެ.
