އެފްއޭ ކަޕް: ފަހަތުން އަރައި ސްވަންސީ ބަލިކޮށް ސިޓީ ސެމީއަށް

އެފްއޭ ކަޕްގައި ފަހަތުން އަރައި ސްވަންސީ ސިޓީ ބަލިކޮށް މެންޗެސްޓާ ސިޓީ ސެމީއަށް ދަތުރުކޮށްފިއެވެ.

ހޮނިހިރު ދުވަހުގެ ރޭ ކުޅުނު މެޗު ސްވަންސީއާ ވާދަކޮށް ސިޓީން މެޗު ކާމިޔާބުކުރީ 2-3 ގެ ނަތީޖާއަކުންނެވެ.

ސްވަންސީ ދަނޑުގައި ކުޅުނު މި މެޗު ފެށިގެން ސިޓީގެ ފަރާތުން މޮޅު ކުޅުމެއް ފެނިގެންދިޔަ ނަމަވެސް ފުރަތަމަ ލަނޑު ޖަހައި ލީޑު ނެގީ ސްވަންސީންނެވެ. މި ލަނޑު 20 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކުރީ ގްރިމޭސްއެވެ.

މި ލަނޑާ އެކު ސްވަންސީން ވަނީ ކުޅުން އިތުރަށް ވަރުގަދަކޮށްފައެވެ. އެގޮތުން 29 ވަނަ މިނެޓުގައި އެޓީމުން ވަނީ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ސެލީނާއެވެ.

ދެވަނަ ހާފް ފެށިގެން ސިޓީން އެޓީމުގެ ކުޅުން ވަރުގަދަކޮށްފައިވާއިރު، 69 ވަނަ މިނެޓުގައި ވަނީ ނަތީޖާގެ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ބެނާޑޯ ސިލްވާއެވެ.

ސިޓީން މެޗުގެ ނަތީޖާ ހަމަހަމަކުރީ 78 ވަނަ މިނެޓުގައެވެ. މި ލަނޑަކީ ސިޓީއަށް ލިބުނު ޕެނަލްޓީ ސާޖިއޯ އަގުއެރޯ ކުރިޔަށް ފޮނުވާލުމުން، އެ ޕަނަލްޓީ ދިފާއުކުރުމުގެ ތެރޭގައި ސްވަންސީގެ ކީޕަރު ނޯޑްފެލްޓްގެ އަތުން ބައިކޮޅަށް ވަތް ލަނޑެކެވެ. މި ލަނޑަށް ފަހު ވެސް ސިޓީގެ ފަރާތުން ގިނަ ހަމަލާތަކެއް ވަނީ ފެނިގެންގޮސްފައެވެ.

މެޗުން ސިޓީ މޮޅުވި ލަނޑު 88 ވަނަ މިނެޓުގައި ކާމިޔާބުކުރީ ސާޖިއޯ އަގުއެރޯއެވެ. މި ލަނޑު އޭނާ ކާމިޔާބުކުރީ ބެނާޑޯ ސިލްވާގެ އެހީތެރިކަމާ އެކުގައެވެ.

މީގެ ކުރިން އެފްއޭ ކަޕް ފަސް ފަހަރު ހޯދާފައިވާ ސިޓީން ސެމީގެ ޖާގަ ކަށަވަރުކޮށްފައިވާއިރު، އެ ޓީމަށް އެންމެ ފަހުން މި މުބާރާތް ކާމިޔާބުކުރެވުނީ 2010 ވަނަ އަހަރުގެ ސީޒަނުގައެވެ.

އެފްއޭ ކަޕްގެ ފައިނަލެއް މީގެ ކުރިން ކުޅެފައިނުވާ ސްވަންސީ އަށް މި މުބާރާތުގައި އެންމެ ދުރަށް ދެވުނީ ސެމީ ފައިނަލާ ހިސާބަށެވެ. އެއީ 1926 ވަނަ އަހަރުގެ ސީޒަނުގައެވެ. އެ ފަހަރު އެޓީމު ވަނީ 0-3 ގެ ނަތީޖާއަކުން ސެމީގައި ބޮލްޓަން އަތުން ބަލިވެފައެވެ.