ނިއުޒީލެންޑްގެ ދެ މިސްކިތަކަށް ބަޑިން ހަމަލާދީ އެތައް ބަޔަކު މަރާލާއިފި
15 މާރިޗު 2019 | ހުކުރު 07:23ހަމަލާ ދިނީ ކަނާތު ފިޔައިގެ ހަރުކަށި ފިކުރުގެ ބައެއްކަމަށް ތުހުމަތުކުރޭ
ހަމަލާއާއި ގުޅިގެން ހަތަރު މީހަކުވަނީ ހައްޔަރުކޮށްފައި
ނިއުޒީލެންޑްގެ ކްރައިސްޓްޗަރޗްގެ ދެ މިސްކިތަކަށް ބަޑިހިފައިގެން ތިބި ބަޔަކު ހުކުރު ދުވަހު ވަދެ، ބަޑީގެ ހަމަލާތަކެއްދީ އެތައް ބަޔަކު މަރާލައިފި އެވެ.
ބޮޑުވަޒީރު ޖެސިކާ އާޑެން ވިދާޅުވީ ހަމަލާތަކުގައި 40 މީހަކު މަރާލާފައިވާކަމަށާއި، 20 މީހަކަށް އެކިވަރުގެ ޒަހަމްތައް ލިބިގެން ފަރުވާދެމުން އަންނަކަމަށެވެ. އަދި އެތަންތަނުގެ ހާލަތު ގާތުން ބަލަމުންދާކަމަށާއި، މިވަގުތު އޮތީ ބަދަލުވަމުންދާ ހާލަތެއްގައިކަމަށް ބޮޑު ވަޒީރު ވިދާޅުވި އެވެ.
ބޮޑުވަޒީރުވަނީ މިއީ އެ ގައުމުގައި "ކަޅު ދުވަހެއް"ގެ ގޮތުގައި ސިފަ ކުރައްވާފައެވެ.
ފުލުހުންގެ ކޮމިޝަނަރ މައިކް ބުޝް ވިދާޅުވީ ހަމަލާއާއި ގުޅިގެން ތުހުމަތުކުރެވޭ ހަތަރު މީހަކު ފުލުހުން ހައްޔަރުކޮށްފައިވާކަމަށެވެ. ނަމަވެސް ކޮމިޝަނަރ ވިދާޅުވީ ހަމަލާގެ ބިރުވެރިކަން މުޅިން ފިލާ ދިޔައީކަމަށް އަދި ނުނިންމާ ކަމަށެވެ.
ޓީވީއެންޒެޑްގެ ރިޕޯޓަރ ސަމް ކްލާކްވަނީ ހަމަލާދޭން ފެށި ވަގުތު، މަސްޖިދު އަލް ނޫރުގައި ތިބި އެތައް ބަޔަކާ ވާހަކަދައްކާފައެވެ. އަލް ޖަޒީރާގައި އޭނާ ބުނެފައިވަނީ އޮޓަމެޓިކް ބަޑި ހިފައިގެން ހުރި ފިރެހެނަކު މިސްކިތަށް ވަދެ ހަމަލާ ދޭން ފެށީކަމަށެވެ.
"ބަޑިއެއް ހިފައިގެން ކަޅު ހެދުމެއްލައިގެން ހެލްމެޓް އަޅައިގެން ހުރި އެ މީހާ މިސްކިތުގެ ފަހަތުން އައިސް އަޅުކަމުގައި ތިބި މީހުންނަށް ހަމަލާދޭން ފެށީ." ކްލާކް ބުންޏެވެ.
ފުލުހުން ބުނެފައިވަނީ ދެވަނަ ހަމަލާ ދީފައިވަނީ ލިންވުޑް މިސްކިތުގައި ހުކުރު ނަމާދަށް ތިއްބާކަމަށެވެ. މި ހަމަލާގެ ތަފްސީލެއް ފުލުހުން އަދި ހާމައެއް ނުކުރެއެވެ.
އާއްމުކޮށް ސުލްހަވެރި ގައުމެއްގެ ގޮތުގައި ފާހަގަވާ ޕެސިފިކްގެ މި ގައުމުގައި ދިން ހަމަލާތަކަށްފަހު ވަނީ މިސްކިތްތަކާއި ސްކޫލްތައް ބަންދުކޮށްފައެވެ.
