އަލްހާން އޭސީސީ އަށް ހާޒިރުކޮށް ބަޔާން ނަގައިފި
ވޯޓު ހޯދަން ނުވަތަ އެހެން އެއްވެސް ފަރާތަކަށް ވޯޓު ނުދިނުމަށް ރިޝްވަތު ހުށައަޅާފައި ނުވާނެ: އަލްހާން
އަލްހާން ފަހުމީ
ހެންވޭރު އުތުރު ދާއިރާއަށް ޖުމްހޫރީ ޕާޓީގެ ޓިކެޓްގައި ކުރިމަތިލައްވާފައިވާ ކެންޑިޑޭޓް އަލްހާން ފަހުމީ އެންޓި ކޮރަޕްޝަން ކަމިޝަން (އޭސީސީ) އަށް ހާޒިރުކޮށް ބަޔާން ނަގައިފިއެވެ.
އޭސީސީ އަށް ހާޒިރު ވާން އަލްހާނަށް ޗިޓު ފޮނުވާފައި ވަނީ ބުރާސްފަތި ދުވަހުގެ މެންދުރުގެ ވަގުތެއްގައެވެ.
ރާއްޖެ.އެމްވީ އަށް މައުލޫމާތުދެމުން އަލްހާން ވިދާޅުވީ، އޭސީސީ އަށް ހާޒިރު ކޮށްފައިވަނީ އޭނާ އިންތިޒާމް ކޮށްގެން ބޭއްވި ފުޓްބޯޅަ މުބާރަތާއި ރާޒުވާ މުބާރާތުގައި ދިން އިނާމުތަކާއި ގުޅިގެން ކަމަށެވެ. އެހެން ނަމަވެސް ވޯޓު ހޯދަން ނުވަތަ އެހެން އެއްވެސް ފަރާތަކަށް ވޯޓު ނުދިނުމަށް ރިޝްވަތު ހުށައަޅާފައި ނުވާނެ ކަމަށް އަލްހާން ވިދާޅުވިއެވެ.
އަދި އެ މުބާރާތަކީ ރާއްޖޭގެ ހުރިހާ ޒުވާނުންނަށް ހުޅުވާލައިގެން ކުރިޔަށް ގެންދިޔަ މުބާރާތެއް ކަމަަށް އޭނާ ވިދާޅުވިއެވެ.
'' ރާއްޖޭގެ ހުރިހާ އެންމެންނަށް ބައިވެެރިވެވޭ ގޮތަށް އެ ދެ މުބާރާތް ވެސް އަޅުގަނޑު ހުޅުވައިލީ. އޭގާ ހުންނާނެ އިއުލާންތަކާއި ހުރިހާ އެއްޗެއް. ޓީމް ތަކުން ބައިވެރިވި ތަރުތީބުން އެ މީހުން ސްލޮޓްތައް ދީ އެގޮތަށް ހަދާފައިވެސް ހުންނާނީ'' އަލްހާން ވިދާޅުވިއެވެ.
ގާނޫނުގައި ބުނާ ގޮތުން ތާއީދު ހޯދުމަށް ކޮށްގެން ނުވާނެ ކަންތައްތަކުގެ ތެރޭގައި ކެމްޕެއިން ކުރުމުގައި ކެންޑިޑޭޓަކު ކުރިމަތިލައިގެން އުޅޭ ދާއިރާގެ ވޯޓުލުމުގެ ހައްގު ލިބިގެންވާ ކޮންމެ މީހަކަށް 2000ރ. ގެ މަގުން ހިސާބު ކުރުމުން ޖެހޭ އަދަދަށް ވުރެ އިތުރަށް ކެންޕެއިނަށް ޚަރަދު ކުރުމާ އަދި އެއްވެސް އިންތިޚާބީ ހައްގެއް ފައިދާ ވަކިފަރާތަކަށް ލެންބުމަށްޓަކައި ނުވަތަ ވަކި ގޮތަކަށް އެފަދަ ހައްގެއްގެ ބޭނުމެއް ކުރީތީ އެއްވެސް އެއްޗެއް ޝުކުރެއްގެ ގޮތުން ނުވަތަ ހަދިޔާއެއްގެ ގޮތުން ނުވަތަ އެ ނޫން ވެސް ގޮތަކުން ފަރުދަކަށް ނުވަތަ ޖަމާއަތަކަށް ދީގެން ނުވާނެ ކަމަށް ކަމަށް ބުނެފައި ވެއެވެ.
