ބްރެޒިލްގެ އިރު ދެކުނުގެ ސްކޫލެއްގައި ފުރާވަރުގެ ދެ ކުއްޖަކު ބަޑިން ހަމަލާދީ މަދުވެގެން ފަސް ދަރިވަރުންނާއި އެއް މުވައްޒަފަކު މަރާލައިފި ކަމަށް ފުލުހުން ބުނެފިއެވެ.
ސުޒާނޯގެ ސްކޫލެއްގައި މި ހަމަލާ ދީފައިވަނީ ބްރެޒިލް ގަޑިން ހެނދުނު 9:30 ހާއިރު ކުދިން ބްރޭކަށް ނުކުމެ ތިއްބައެވެ.
ހާދިސާގައި އިތުރު އެތައް ބަޔަކުވަނީ ޒަޚަމްވެފައެވެ. ހަމަލާ ދިނުމަށް ފަހު ހަމަލާދިން ދެމީހުން އެމީހުންގެ އަމިއްލަގަޔަށް ބަޑިޖަހައި މަރުވެފައިވާ ކަމަށް ފުލުހުންވަނީ ބުނެފައެވެ.
ހަމަލާދިން މީހުނާއި ހަަމަލާގައި މަރުވި މީހުންގެ ވަނަވަރު އަދި ހާމަކޮށްފައެއް ނުވެއެވެ.
ބްރެޒިލްގައި ބަޑީގެ ހަމަލާތައް އާއްމު ނަމަވެސް މިބާވަތުގެ ބަޑީގެ ހަމަލާތައް ޢާއްމެއް ނޫނެވެ.
ހާދިސާ ހިނގި ސްކޫލަކީ ޕްރައިމަރީ އަދި ސެކަންޑްރީ ދަރިވަރުންގެ ސްކޫލެކެވެ.
ފުލުހުން ބުނެފައިވަނީ މި ހާދިސާގެ މަގުސަދަކީ ކޮބައިކަން އަދި ސާފުނުވާ ކަމަށެވެ.