ރާއްޖެ އާއި އެމެރިކާއާ ދެމެދު އަންގާރަ ދުވަހު ސޮއި ކުރެވުނު ޑިވެލޮޕްމެންޓް އޮބްޖެކްޓިވް އެސިސްޓަންސް ގްރާންޓް އެއްބަސްވުމުގެ ދަށުން ރާއްޖެއަށް 20 މިލިއަން ޑޮލަރުގެ އެހީދޭން އެމެރިކާއިން ނިންމައިފިއެވެ.
ބުދަ ދުވަހު އޮތް ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުމް އެމެރިކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު އެލައިނާ ޓެޕްލިޒް ވިދާޅުވީ މި ފައިސާއަކީ ލިބިގެން ދާނީ ފަސް އަހަރުގެ ތެރޭގައި ބައިބަޔަށް ބަހާލައިގެން ކަމަށެވެ. އެގޮތުން މި އަހަރު ތިން މިލިއަން ޑޮލަރުގެ އެހީދޭން ވަނީ ނިންމާފައެވެ.
މި ފައިސާއަކީ ދައުލަތުގެ ފައިސާ މެނޭޖް ކުރުމަށާއި، ގާނޫނޫގެ ބާރު ނަގަހައްޓަން އަދި މި ނޫންވެސް އެހެން ދާއިރާތަކުން އެހީތެރިވެދިނުމުގެ ގޮތުން ދެވުނު ފައިސާއެއް ކަމަށް ވެސް ސަފީރު އެލައިނާ ވިދާޅުވިއެވެ. އަދި އެމެރިކާއިން އެހީތެރިވާން ބޭނުންވަނީ ދެ ގައުމަށް ފައިދާ ހުރި ކަންކަމުގައި އެކަނި ކަމަށާއި މި ކަންކަން ކަނޑައެޅޭނީ ދެ ގައުމުން ވެސް ހާސިލްކުރަން ބޭނުންވާ ލަނޑުދަނޑިތައް އެނގުމުން ކަމަށް ވެސް އޭނާ ވިދާޅުވިއެވެ.
ކުރިއަށް އޮތް ތަނުގައި ވެސް ދެ ގައުމުން އިތުރު އެއްބަސްވުންތަކެއްގައި ސޮއި ކުރާނެ ކަމަށް އުއްމީދު ކުރައްވާ ކަމަށް ވެސް އެލައިނާ ވިދާޅުވިއެވެ. ރާއްޖެއާއި އެމެރިކާއިން ވަނީ އަންގާރަ ދުވަހު ދަ ފުލްބްރައިޓް އެކެޑަމިކް އެކްސްޗޭންޖް ޕްރޮގްރާމްގެ އެމް.އޯ.ޔޫ ގައި އަދި އޭވިއޭޝަން ސެކިއުރިޓީ އެއްބަސްވުމެއްގައި ވެސް ސޮއިކޮށްފައެވެ. މި ދެ އެއްބަސްވުމުގައި ވެސް ރާއްޖޭގެ ފަރާތުން ސޮއިކުރެއްވީ ހާރިޖީ ވަޒީރު އަބްދުﷲ ޝާހިދެވެ.
މީގެ އިތުރުން ރައީސް އިބްރާހިމް މުހައްމަދު ސޯލިހު އުފެއްދެވި މަރުތަކުގެ މައްސަލަ ބަލާ ކޮމިޝަނުގައި އަދި ކޮރަޕްޝަން އެންޑް އެސެޓް ރިކަވަރީ ކޮމިޝަނުގައި އެމެރިކާގެ އެއްވެސް ބައިވެރިވުމެއް ނޯންނާނެ ކަމަށް ވެސް އެމެރިކާ ސަފީރު ވިދާޅުވިއެވެ. ނަމަވެސް ދުޅަހެޔޮ ދިމުގްރާތީ ނިޒާމަކަށް އާއްމުންގެ މަސްލަހަތު އޮންނަ މައްސަލަތަކުގައި ދެފުށް ފެންނަ ތަހުގީގުތަކެއް ކުރުން މުހިންމު ކަމަށް ވެސް އޭނާ ވިދާޅުވިއެވެ.
އެމެރިކާ ސަފީރުގެ މި ދަތުރުފުޅުގައި އިދިކޮޅުގައި ހަރަކާތްތެރިވާ ސިޔާސީ ފަރާތްތަކާ ބައްދަލު ކުރައްވަން ވެސް ވަނީ ހަމަޖެހިފައެވެ. ރައްޔިތުންގެ ވާހަކަތައް އަޑުއަހަން އެއްމެންގެ ހިޔާލުތައް ހުރިގޮތް އެނގެން މުހިންމުކަމަށް އެލައިނާ ވިދާޅުވިއެވެ.
މިއީ އެމެރިކާ ސަފީރު ރާއްޖެއަށް ކުރައްވާ ތިން ވަނަ ދަތުރުފުޅެވެ. އެކަމަނާ ފުރަތަމަ ރާއްޖެއަށް ވަޑައިގެންނެވީ ރައީސް ސޯލިހު ހުވާކުރެއްވުމުގެ ރަސްމިއްޔާތަށެވެ. ސަފީރުކަމުގެ ހުވާ އޮކްޓޫބަރު މަހުގެ ތެރޭގައި ހުވާކުރެއްވި އެލައިނާގެ މި ފަހަރުގެ ދަތުރުފުޅުގައި އޭނާ ވަނީ ޅަވިޔަނި އަތޮޅުގެ ތިން ރަށަކަށް ޒިޔާރަތްކޮށް އެ ރަށްތަކުގެ ކައުންސިލް މެމްބަރުންނާ މަޝްވަރާ ބައްދަލުވުންތަކެއް ބާއްވާފައެވެ.
ސަފީރުގެ މި ދަތުރުފުޅުގައި އެމެރިކާ އެމްބަސީގެ ތަރުޖަމާނު ނޭންސީ ވެންހޯރން އަދި ޕޮލިޓިކަލް އޮފިސަރު ތެރެވިސް ހޯލް ބައިވެރިވަޑައިގަންނަވައެވެ.
