އިންތިޚާބުތަކާ ބެހޭ އާންމު ގަނޫނަށް ރައްޔިތުން ހޭލުންތެރިއެއް ނޫން: އޭސީސީ
12 މާރިޗު 2019 | އަންގާރަ 16:12އިންތިޚާބުތަކާ ބެހޭ އާންމު ގަނޫނަށް އިސްލާހު ގެނައީ މިދިޔަ އަހަރުގެ އޭޕްރީލް މަހު
އެންޓިކޮރަޕްޝަން ކޮމިޝަން
އިންތިޚާބުތަކާ ބެހޭ އާއްމު ގަނޫނަށް ރައްޔިތުން ހޭލުންތެރި ވެފައި ނުވާ ކަމަށް އެންޓިކޮރަޕްޝަން ކޮމިޝަން (އޭސީސީ)ގެ ސީނިއަރ އެޑިއުކޭޝަން އޮފިސަރ މުހައްމަދު ޝާކިރު ވިދާޅުވެއްޖެއެވެ.
ރާއްޖެޓީވީއާ ވާހަކަ ދައްކަވަމުން ޝާކިރު ވިދާޅުވީ ކެންޑިޑޭޓުންނާއި އެ ކެންޑިޑޭޓުންނަށް ސަޕޯރޓްކުރާ ފަރާތްތަކުންނާއި އަދި އާއްމު ރައްޔިތުން ވެސް އިންތިޚާބުތަކާ ބެހޭ އާއްމު ގަނޫނަށް އަހުލުވެރި ވާންޖެހޭ ކަމަށެވެ. އަދި އެއީ ފަރުދީ ޒިއްމާއެއް ކަމަށް އޭނާ ވިދާޅުވިއެވެ.
މިދިޔަ އަހަރުގެ ޖުލައި މަހު ވުޖޫދުވި އެ ގާނޫނަށް އެއް އަހަރު ވެފައި ނުވާއިރު އެ ގާނޫނަށް އާންމުން ހޭލުންތެރި ވެފައިވާ މިންވަރު ކުޑަކަން ފާހަގަ ކުރައްވާ ޝާކިރު ވިދާޅުވީ ޚާއްސަކޮށް މިދިޔަ އަހަރުގެ އޭޕްރީލް މަހު އިންތިޚާބު ތަކާއި ބެހޭ އާންމު ގަނޫނަށް ގެނެވުނު އިސްލާހުގެ ދަށުން އިންތިޚާބުތަކުގައި ފައިސާ ޚަރަދު ކުރުމާއި އެހީތެރިވުމާއި ޝުކުރު ވެރިވުމުގެ ގޮތުން އެއްޗިހި ދިނުމާއި މިފަދަ ކަންކަމަށް މި އިސްލާހުގެ ސަބަބުން ހުއްޓުމެއް ގެނުވާފައިވާ ކަމަށެވެ.
އެހެންކަމުން ގާނޫނު ސަރުކާރުގެ ގެޒެޓްގައި ޝާއިރުކުރާ ދުވަހުން ފެށިގެން އެ ގަނޫނުގައި ހިމެނޭ އެންމެހާ ކަންކަން އާންމުންނަށް އެނގެންޖެހޭ ކަމަށް އޭނާ ވިދާޅުވިއެވެ.
އޭސީސީން އާންމު ރައްޔިތުން ހޭލުންތެރި ކުރުމަށްޓަކައި ގިނަ މަސައްކަތްތަކެއް ކުރަމުން ދާކަން ފާހަގަ ކުރައްވާ ޝާކިރު ވިދާޅުވި އޭސީސީން މިހާރު ބަލަމުންދާ މައްސަލަތަކުގައި ވެސް މައްސަލައިން ރެކުމަށްޓަކައި ބައެއް ފަރާތްތަކުގެ ޖަވާބަކީ "ތީ ތިމަންނަމެންނަށް އެނގޭ ކަމެއް ނޫނޭ" ބުނުން ކަމަށެވެ. ނަމަވެސް އެއީ ކޮރަޕްޝަނުން ނުވަތަ ރިޝްވަތުގެ އަމަލުން މީހާ ސަލާމަތް ވެވޭނެ އުޒުރެއްގެ ގޮތުގައި ގާނޫނީ ހަމަތަކުގެ މަތިން ބަލައި ގަނެވޭނެ ކަމެއް ނޫން ކަމަށް އޭނާ ވިދާޅުވިއެވެ.
މީގެ އިތުރުން ވެސް ޝާކިރު ވިދާޅުވީ ކޮރަޕްޝަނުގެ އަމަލުތަކަކީ ގާނޫނުލް އުގޫބާތުގައި ވެސް ހަރުކަށި އަދަބުތަކެއް ކަނޑައެޅިފައިވާ އަމަލްތަކެއް ކަމަށާއި ގާނޫނުތަކުގެ ތެރެއިން އެފަރާތަކަށް ފިޔަވަޅު އެޅިގެން ދާނެ ކަމަށެވެ.
