ކުޑަކުއްޖަކު ލިޔުނު ސިޓީއަކަށް ކުއަންޓާސް އެއަރލައިންގެ ސީއީއޯ ޖަވާބު ފޮނުވުމުން ގިނަ ބައެއްގެ ސަމާލުކަން
13 މާރިޗު 2019 | ބުދަ 03:02އެ ކުއްޖާ އުފަައްދާ އެއަރލައިނަށް ކިޔަނީ "ޢޯޝޭނިއާ އެކްސްޕްރެސް"
ކުއަންތާސް އެއަރލައިންގެ ފްލައިޓެއް
ދިހަ އަހަރުގެ ކުޑަކުއްޖަކު އަމިއްލަ އެއަރލައިނެއް ފަށަން އެހީތެރިވެދިނުމަށް އެދި އޮސްޓްރޭލިއާގެ އެއްމެ ދުވަސްވީ އެއަރލައިން، ކުއަންތާސް އެއަރލައިންގެ ސީއީއޯ އެލެން ޖޮއިސް ފޮނުވި ސިޓީއަށް އޭނާ ޖަވާބުދާރީ ވުމުން ގިނަ ބަޔެއްގެ ސަމާލުކަން ލިބިއްޖެއެވެ.
އެލެކްސް ޖަކޯ ނަމަކަށް ކިޔާ އޮސްޓްރޭލިއާގެ ފިރިހެން ކުއްޖާ ފޮނުވި ސިޓީގައި އޭނާ ލިޔެފައިވަނީ، އޭނާއަކީ މިހާރު ވެސް "އޯޝޭނިއާ އެކްސްޕްރެސް" ނަމަކަށް ކިޔާ އަލަށް އުފައްދާ އެއަރލައިންގެ ސީއީއޯކަމަށެވެ. އޭނަގެ ވާހަކަ ސީރިއަސްކޮށް ނެގުމަށް އެ ކުއްޖާ ވަނީ ޖޮއިސް ކައިރީ އެދިފައެވެ. ބޭނުން ކުރާނެ ފްލައިޓުގެ ވައްތަރުތަކާއި ނަންބަރުތަކާ އަދި ކޭޓަރިންގެ އިންތިޒާމު ހަމަޖައްސާނެ ގޮތްތައް ބަލަމުންދާ ކަމަށް ވެސް އެ ކުއްޖާ ބުންޏެވެ.
މީގެ އިތުރުން ޖަކޯ ބުނީ މިހާރުވެސް އޭނާގެ ކުންފުންޏަށް ސީއެފްއޯއަކާއި އައި.ޓީގެ އިސް މީހަކާއި މެއިންޓެނަންސްގެ އިސް މީހަކު ވެސް ހޯދާފައިވާ ކަމަށެވެ. އޭނާ ޖޮއިސް ކައިރީ އަހަން ބޭނުންވީ މެލްބަރންއިން ލަންޑަނަށް ކުރާ 25 ގަޑި އިރުގެ ދަތުރުގައި މީހުންނަށް ހަމަޖެހިލައިގެން ނިދޭނެ ކަހަލަ އިންތިޒާމަކާއި ބެހޭގޮތުން ކަމަށް ޖަކޯ ލިޔެފައިވެއެވެ. އަދި މި ދަތުރަށް ކުއަންތާސް އެއަރލައިން ފަދައިން އޭނާ ވެސް ބޭނުންކުރަން ނިންމާފައި ވަނީ އެއަރބަސްގެ A350 މަރުކާގެ މަތިންދާ ބޯޓު ކަމަށް ވެސް ޖަކޯ ބުނެފައިވެއެވެ.
މި ސިޓީގެ ޖަވާބުގައި ކުއަންތާސްގެ ސީއީއޯ ޖޮއިސް ބުނީ ވާދަވެރި ކުންފުނިތަކަށް އާއްމު ގޮތެއްގައި އެހީތެރިވެ ނުދިނަސް، މި ފަހަރު އެއަރލައިންގެ ލީޑަރު ނަސޭހަތް ދޭން އެދުމުން އެކަން ދޫކޮށްލެވެން ނެތް ކަމަށެވެ. އަދި ޖޮއިސްއަކީ އެއް އިރެއްގައި ހަމަ ތިހެން ހުވަފެން ބެލި ކުޑަކުއްޖެއް ކަމަށް ވެސް އޭނާ ވަނީ ބުނެފައެވެ. އަދި އެއަރލައިނެއް އޮޕަރޭޓް ކުރާ އިރު އެއްމެ މުހިންމީ ފަސިންޖަރުންގެ ސަލާމަތާއި ރައްކާތެރިކަން ކަމަށް ވެސް އޭނާ ވަނީ ބުނެފައެވެ. އަދި ކުއަންތާސްއިން ވެސް މިހާރު އެ 25 ގަޑި އިރުގެ ފްލައިޓްގައި ދަތުރުކުރާ މީހުން އަރާމުކޮށްލާނެ ގޮތެއް ހޯދަމުންދާ ކަމަށް ވެސް އޭނާ ބުންޏެވެ.
ޖޮއިސް ވަނީ އޭނާއާއި އެކު ކުއަންތާސް އެއަރލައިންސްގެ އޮޕަރޭޝަންސް ސެންޓަރަށް އައިސް ހިޔާލު ބަދަލުކުރަމަށް ޖަކޯއަށް ދައުވަތު ދީފައެވެ. ޖަކޯއާ ޖޮއިސްއަށް މީސް މީޑިއާގައި ގިނަ ބަޔަކު ވަނީ ތައުރީފްކޮށްފައެވެ. ހާއްސަކޮށް ކުޑަކުޑަ ޖަކޯގެ ތަސައްވުރަށް ގިނަ ބަޔަކު ވަނީ ތައުރީފް އޮއްސާލާފައެވެ.
ކުއަންތާސް އެއަރލައިނަކީ އޮސްޓްރޭލިޔާގެ އެއްމެ ދުވަސްވީ އެއަރލައިނެވެ. އަންނަ އަހަރު ސަތޭކަ އަހަރު ފުރޭ އެއަރލައިނަކީ ދުނިޔޭގެ ތިންވަނައަށް އެއްމެ ދުވަސްވީ އެއަރލައިނެވެ. އަދި އެއީ އޮސްޓްރޭލިއާގެ އެއަރލައިންތަކުގެ ތެރެއިން އެއްމެ ގިނަ ފްލައިޓް އޮފަރޭޓް ކުރާ އެއަރލައިނެވެ.
