ރައްޔިތުންގެ މަޖިލީހުގެ އިންތިޚާބަށް ތައްޔާރުވުމުގެ ގޮތުން އެމްޑީޕީން ބާއްވަމުން އަންނަ ކެމްޕެއިން އިވެންޓްތަކުގެ ތެރެއިން، ސްރީ ލަންކާގައި އިވެންޓެއް އޮންނާނެ ކަމަށް އެ ޕާޓީން ބުނެފިއެވެ.

އެޖެންޑާ 19 ގެ ނަމުގައި ސްރީ ލަންކާގައި ބާއްވާ ކެމްޕެއިން ޖަލްސާ އޮތީ 13 މާރޗްވާ ބުދަ ދުވަހުގެ ރޭ ހަތެއް ޖަހާއިރު، ޝަރަހަން ބަންކުއެޓް ހޯލް (ކަޅުބޯވިލާ) ގައެވެ.

މި ޖަލްސާގައި އެމްޑީޕީގެ ރައީސް މުހައްމަދު ނަޝީދާ އެކު ސަރުކާރުގެ ވަޒީރުން ބައިވެރިވެ ވަޑައިގަންނަވާނެއެވެ.

މި ޖަލްސާގައި ސްރީ ލަންކާގައި ދިރިއުޅޭ ވީހާ ވެސް ގިނަ ރައްޔިތުން ބައިވެރިވުމަކީ އެމްޑީޕީގެ ވަރަށް ބޮޑު އެދުމެއް ކަމަށް އެ ޕާޓީން ވަނީ ބުނެފައެވެ.

ރައްޔިތުންގެ މަޖިލީހުގެ އިންތިޚާބުގެ ކެމްޕެއިން އެމްޑީޕީން ފޯރިޔާއާ އެކު ފަށާފައިވާއިރު، ހަފްތާ ބަންދުގައި އޮންނަ ދަތުރުފުޅުތަކުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ގެންދަވަނީ ބައިވެރިވެވަޑައިގަންނަވަމުންނެވެ.

ނިމިދިޔަ ހަފްތާ ބަންދުގައި ރައީސް ސޯލިހާއި، ރައީސް މުހައްމަދު ނަޝީދު އެކުގައި ވަނީ އައްޑޫ ސިޓީއަށް ދަތުރުފުޅެއް ކުރައްވާފައެވެ. މި ދަތުރުފުޅުގައި ރައްޔިތުންގެ މަޖިލީހުގެ އިންތިޚާބުގައި ވާދަކުރައްވާ އައްޑޫސިޓީ ހަތް ދާއިރާގެ ހަތް ކެނޑިޑޭޓުންނާއި، އަދި އެ ކެނޑިޑޭޓުންގެ ސަޕޯޓަރުންނާ ވަނީ ބައްދަލުކުރައްވާފައެވެ.

މި ހަފުތާގެ ބަންދުގައި ވެސް ރައީސް ސޯލިހް ތިން އަތޮޅަކަށް ވަޑައިގަންނަވާނެއެވެ. ރައީސް ސޯލިހް ވަޑައިގަންނަވާނީ ވ. ޅ. އަދި ނ. އަތޮޅުގައެވެ.