އޮސްޓްރޭލިއާ އާއެކު ކުޅު ކްރިކެޓް މެޗެއްގައި އިންޑިއާގެ ޓީމުން އަސްކަރީ ތޮފި ބޭނުން ކޮށްފައިވާތީ އެ ކަމަކީ ކުޅިވަރުގެ ތެރެއަށް ސިޔާސީ ކަންކަން ވެއްދުން ކަމަށް ބުނެ އެ ގައުމާ ދެކޮޅަށް ފިޔަވަޅު އެޅުމަށް އިންޓަރނޭޝަނަލް ކްރިކެޓް ކަައުންސިލް(އައިސީސީ)އަށް ޕާކިސްތާނުން ގޮވާލައިފިއެެވެ.

އިންޑިއާގެ އިރުމަތީގެ ސިޓީއެއް ކަމަށްވާ ރަންޗީގައި ހުކުރު ދުވަހު އޮސްޓްރޭލިއާއާ ބައްދަލުކޮށް ބަލިވި ވަންޑޭ އިންޓަރނޭޝަނަލް  މެޗުގައި އިންޑިއާގެ ޓީމް ތިބީ އަސްކަރީ ކެމަފްލާޖް ސްޓައިލުގެ ތޮފިއަޅައިގެންނެވެ.

އިންޑިއާގެ ކްރިކެޓް ބޯޑް، ބީސީސީއައިއިން ވަނީ، އިންޑިއާގެ ބެލުމުގެ ދަށުގައި އޮތް ކަޝްމީރުގެ ޕުލްވަމާގައި ފެބްރުއަރީ މަހުގެ 14 ވަނަ ދުވަހުދިން ޖާނުން ފިދާވުމުގެ ހަމަލާގައި މަރުވި ޕެރަމިލިޓަރީ ސިފައިންގެ 42 މީހުންނާ އެކުގައި ތިބި ކަމުގެ ރަމްޒެއްގެ ގޮތުން އެ ގައުމުން އެ މެޗުގައި ބޭނުން ކުރާނީ އެ ޓީމު އާއްމުކޮށް ބޭނުންކުރާ ނޫ ކުލައިގެ ހެޑްގިއަރގެ ބަދަލުގައި އެ ތޮފި ކަން އިއުލާނު ކޮށްފައެވެ.

އިންޑިއާއިން އެ ހަމަލާގެ ތުހުމަތު ޕާކިސްތާނުގެ މައްޗަށްކުރާއިރު އެ ގައުމުން އެކަން ދޮގުކުރެއެވެ.

"ދުނިޔެއަށް ފެނިއްޖެ އިންޑިއާގެ ކްރިކެޓް ޓީމުން އެމީހުންގެ އަމިއްލަ ތޮފީގެ ބަދަލުގައި އަސްކަރީ ތޮފި އަޅައިގެން ތިބިތަން.އައިސީސީއަށް މިތަނެއް ނުފެނޭތޯ؟" ޕާކިސްތާނުގެ ފޮރިން މިނިސްޓަރ ޝާހް މަހުމޫދު ޤްރައިޝީ ހޮނިހިރު ދުވަހު ވިދާޅުވިއެވެ.

"އަޅުގަނޑުމެންނަށް ފެންނަ ގޮތުގައި މިކަން ޕާކިސްތާނުގެ ކްރިކެޓް ބޯޑު(ޕީސީބީ)ން ފެންމަތިކުރުމުގެކުރިން އައިސީސީން ފާހަގަކުރުމަކީ އެތަނުގެ ޒިންމާއެއް" މިނިސްޓަރ ވިދާޅުވި ކަމަށް ޕާކިސްތާނުގެ މީޑިއާތަކުގައި ރިޕޯޓް ކޮށްފައިވެއެވެ.