އެމްޑިޕީއަށް މަޖިލީހުގެ މެޖޯރިޓީ ނުލިބިއްޖެނަމަ ސަރުކާރު ހުއްޓޭނެ: ރައީސް ނަޝީދު
އެމްޑީޕީއަށް މަޖިލީހުގެ މެޖޯރިޓީ ނުލިބިއްޖެނަމަ ރައީސް ސޯލިހުގެ ސަރުކާރަށް އެކިކަހަލަ ހުރަސްތައް ކުރިމަތި ކުރާނެ ކަމަށް ވިދާޅުވި
އެމްޑީޕީގެ އެޖެންޑާ 19 އައްޑޫ ބޮޑު ޖަލްސާގައި ރައީސް ނަޝީދު ވާހަކަފުޅު ދަައްކަވަނީ
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ސަރުކާރު ހިންގާ ކޯލިޝަންގެ މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ބޮޑު އަޣުލަބިއްޔަތެއް ނުލިބިއްޖެނަމަ، ސަރުކާރު ހުއްޓުމަކަށް އަންނާނެ ކަމަށް އެ ޕާޓީގެ ރައީސް އަދި ކުރީގެ ރައީސުލްޖުމްހޫރިއްޔާ މުޙައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ޓިކެޓުގައި މަޖިލީހުގެ މައްޗަންގޮޅީ މެދު ދާއިރާއަށް ވާދަވެސް ކުރައްވާ ނަޝިދު ވިދާޅުވީ، އެމްޑީޕީއަށް މަޖިލީހުގެ މެޖޯރިޓީ ނުލިބިއްޖެނަމަ ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހު ސަރުކާރަށް އެކި ކަހަލަ ހުރަސްތައް ކުރިމަތި ކުރާނެ ކަމަށެވެ.
"ރައީސް ވިދާޅުވި ފަދައިން އެމްޑިޕީގެ އަޣުލަބިއްޔަތެއް މަޖިލީހުގައި ނެތިއްޖެނަމަ، ސަރުކާރު ހުއްޓޭނެ. ވަޒީރުން ވަކިކުރާނެ، ޕްރޮޖެކްޓްތައް ހިންގުމަށް ފައިސާއަށް ދަތިކުރާނެ. ސަރުކާރު ބަލިކަށިކުރާނެ. އެހެންވީމާ، ސަރުކާރު ބަލިކަށިވެގެން ދިޔައިމާ، ސަރުކާރުގެ މުއައްސަސާތައް ސަރުކާރަށް އިތުބާރުކުރުން ކުޑަވެގެން ދާނެ. ސަރުކާރުގެ މުއައްސަސާތައް ސަރުކާރަށް އިތުބާރުކުރުން ކުޑަވެގެން ދިޔުމާ އެކުގާ، ފަނޑިޔާރުގެތަކުގެ އިތުބާރު ސަރުކާރަށް ގެއްލިގެންދާނެ. ފަނޑިޔާރު ގެތަކާއި އެކުގައި، އެހެންވީމާ ދެން، ފިތުނަވެރި ފަރާތްތަކަށް ސަރުކާރު ވައްޓާލާ ބަޣާވާތް ކުރަން އެދޭ ފަރާތްތަކަށް މަގު ފަހިވެގެން އެބަދޭ. މީ އަޅުގަނޑުމެން ދެކިފައިވާ ތަރުތީބެއް،" ނަޝީދު ވިދާޅުވިއެވެ.
އެ މަނިކުފާނުގެ ވެރިކަން 2012 ވަނަ އަހަރުގެ ފެބްރުއަރީ ހަތެއްގައި ބަޣާވާތަކުން ނިމުމަކަށް ގެނެވުނީ ވެސް މަޖިލީހުގެ އަޣުލަބިއްޔަތު އޭރު ސަރުކާރަށް ނެތުމުން ކަމަށް ނަޝީދު ވިދާޅުވި އެވެ. އެގޮތުން އޭރުގެ މަޖިލީހުން ސަރުކާރުގެ މިނިސްޓަރުން މަގާމުން ދުރުކޮށް، ޕްރޮޖެކްޓްތައް ހުއްޓުވަން ފެށުމާއި ގުޅިގެން ދައުލަތުގެ މުއްސަސާތަކުން ސަރުކާރަށް ކުރާ އިތުބާރު ގެއްލި، ފަނޑިޔާރުން ވެސް ސަރުކާރާ ދުރުވާން ފެށި ކަމަށް އެ މަނިކުފާނު ވިދާޅުވިއެވެ. ނަމަވެސް މިކަން ތަކުރާރުކުރަން ނުކުރޭނެ ކަމަށް އެ މަނިކުފާނު ވިދާޅުވިއެވެ.
"އަޅުގަނޑުމެންނަށް އެއް ހޮރަކުން، މޫމިނުން ގަޔަކަށް، ދެ ފަހަރަކު އިރާދަކުރެއްވިއްޔާ ކައްޓެއް ނުޖެހޭނެ. މިފަހަރު އަޅުގަނޑުމެން ނިކުމެ މިތިބީ މި ރާއްޖޭގެ ސިޔާސީ ހަގީގަތްތައް ވަރަށް ރަނގަޅަށް އެނގިތިބީ ތީވެ" ނަޝީދު ވިދާޅުވިއެވެ
ހުކުރު ދުވަހު އައްޑޫގައި ބޭއްވި ޖަލްސާގައި ވާހަކަ ދައްކަވަމުން ނަޝީދު ވިދާޅުވީ މި ސަރުކާރުން އައްޑޫ ސިޓީއަށް ކޮށްދޭން ނިންމަވާފައިވާ ކަންކަން ހަގީގަތަކަށް ހެދޭނެ ކަމާއި މެދު އެއްވެސް ޝައްކެއް ނެތް ކަމަށާއި، މަޖިލީހުގެ އަޣުލަބިއްޔަތު ލިބިއްޖެ ހާލަތެއްގައި މި ސަރުކާރުން އައްޑޫއަށް އޮތް ތަސައްވަރު ފުރިހަމަ ވާނެ ކަމުގެ ޔަގީންކަން އަރުވާ ކަމަށް ވެސް އެ މަނިކުފާނު ވިދާޅުވިއެވެ.
އައްޑޫ ސިޓީގެ ތަސައްވުރު އިއުލާން ކުރަން ބޭއްވި ހަފުލާގައި އެ މަނިކުފާނު ވިދާޅުވީ އެ ތަސައްވުރުގައިވާ ކަންކަން ދެ އަހަރުގެ ތެރޭގައި ނިންމޭ ވަރު ވާނެ ކަމަށެވެ.
އައްޑޫ ސިޓީއަށް މި ސަރުކާރުން އޮތް ތަސައްވުރުގައިވާ ކަންކަމަށް ސަރުކާރުން 5.6 ބިލިއަން ރުފިޔާގެ ހަރަދުކުރަން ވަނީ ނިންމާފައެވެ. އެގޮތުން އައްޑޫގެ އެއަރޕޯޓާއި ބަނދަރު ތަރައްގީ ކޮށް، ރައްޔިތުން މިހާރު އެދުމުންދާ ކަންކަމަށް ހައްލު ގެނެސް، މި ސަރުކާރުގެ އަމާޒަކީ އައްޑޫގެ އާބާދީ އަނބުރާ އައްޑޫ ސިޓީއަށް ދިރިއުޅުން ބަދަލުކުރުން ކަމަށް ވަނީ ހާމަކޮށްފައެވެ.
