ބާ ކޮމިޝަން ބިލު މަޑުޖައްސާލީ ލަތީފާ ގާސިމްގެ މަގާމު ގެއްލޭ ގޮތަށް އޮތުމުން: ރިޔާޒު
8 މާރިޗު 2019 | ހުކުރު 08:49ބިލު އަލުން ކޮމެޓީއަށް ފޮނުވީ މަޝްވަރާކޮށްފައި
ޖޭއެސްސީގެ މެމްބަރު ލަތީފާ ގާސިމް
ބާ ކޮމިޝަން އުފެއްދުމަށް ރައްޔިތުންގެ މަޖިލީހަށް ހުށަހެޅި ގާނޫނީ ހިދުމަތުގެ ބިލު މިހާރު އޮތީ ޖުޑީޝަލް ސާވިސް ކޮމިޝަން (ޖޭއެސްސީ)ގެ މެމްބަރެއްގެ މަގާމު ގެއްލޭ ގޮތަށް ކަމަށް ޖޮއިންޓް ޕާލަމެންޓްރީ ގްރޫޕުގެ ލީޑަރު އަބްދުﷲ ރިޔާޒު ވިދާޅުވެއްޖެއެވެ.
ރިޔާޒު ވިދާޅުވީ ގާނޫނީ ހިދުމަތުގެ ބިލު އޮތް ގޮތުން ޖޭއެސްސީން މަގާމު ގެއްލެނީ ގާނޫނީ ވަކީލުންގެ ފަރާތުން އެ ކޮމިޝަނަށް އައްޔަން ކުރައްވާފައިވާ މެމްބަރު ލަތީފާ ގާސިމްގެ ކަމަށެވެ.
ގާނޫނީ ވަކީލުންގެ މެދުގައި ނެގި ވޯޓަކުން އެ ކޮމިޝަންގެ މެމްބަރު ކަމަށް ލަތީފާ އައްޔަން ކުރީ 2014 ވަނަ އަހަރުގެ ނޮވެމްބަރު މަހުއެވެ. އޭނާގެ މަގާމުގެ މުއްދަތު ހަމަވާނީ މިއަހަރުގެ ނޮވެމްބަރު މަހުއެވެ.
ރިޔާޒު ވިދާޅުވީ އޭނާގެ މަގާމު ގެއްލޭ ގޮތަށް ބާ ކޮމިޝަންގެ ބިލު އޮތުމުން، އެ މައްސަލަ ލަތީފާ މަޖިލީހަށް ހުށަހެޅުއްވުމުން، ކޯލިޝަން ޕާޓީތައް ހިމެނޭ ޖޮއިންޓް ޕާލަމެންޓްރީ ގްރޫޕުގައި މަޝްވަރާ ކުރި ކަމަށެވެ. އެ މަޝްވަރާތަކަށް ފަހު، ފާސްކުރުމަށް އެޖެންޑާކޮށްފައިވާ ގާނޫނީ ހިދުމަތުގެ ބިލު އަނބުރާ ކޮމެޓީއަށް ފޮނުވާފައިވާ ކަމަށް އަބްދުﷲ ރިޔާޒު ވިދާޅުވިއެވެ.
"ގާނޫނުއަސާސީގައި ޓާމް ކަނޑައެޅިފައި ހުރި މަގާމެއްގައި ހުންނެވި ޖުޑީޝަލް ސާވިސް ކޮމިޝަންގެ މަގާމު ގެއްލޭ. އެއީ ހަމަ ވަކީލުންގެ ފަރާތުން ޖޭއެސްސީއަށް އިންތިހާބުކޮށްފައި ހުންނަވާ ބޭފުޅެއްގެ މަގާމު. އެބޭފުޅާ އެ ކޮންސާން ރައްޔިތުންގެ މަޖިލީހަށް ހުށަހަޅުއްވާފައި އޮތް. ހުށަހެޅުއްވީމަ މަޖިލީހުގެ ރިޔާސަތުން އެކަން ޕާލަމެންޓްރީ ގްރޫޕުތަކުގެ ލީޑަރުންނަށް ފޮނުއްވެވި. އަޅުގަނޑުމެން ބެލިން. އަޅުގަނޑުމެން ބަހުސް ކުރިން. ޖޮއިންޓް ޕާލަމެންޓްރީ ގްރޫޕުގައި އަޅުގަނޑުމެން އެ މަޝްވަރާ ކުރިން. މަޝްވަރާ ކުރީމަ އަޅުގަނޑުމެންނަށް ވެސް ގަބޫލު ކުރެވުނު އަސްލު ކޮންސްޓިޓިއުޝަނަލް މައްސަލައެއް އެބަ އުޅޭކަން،" ރިޔާޒު ވިދާޅުވިއެވެ.
ޖޭއެސްސީއަކީ 10 މެމްބަރުންގެ މައްޗަށް އެކުލެވޭ ކޮމިޝަނެކެވެ. އެ ކޮމިޝަންގައި ހިމެނިވަޑައިގަންނަވަނީ މަޖިލީހުގެ ރައީސް ގާސިމް އިބްރާހިމާއި ސުޕްރީމް ކޯޓުގެ ފަނޑިޔާރު އަބްދުﷲ އަރީފާއި ހައި ކޯޓުގެ ފަނޑިޔާރު އަބްދުލް ރައޫފު އިބްރާހިމާއި ގާޒީ މުހައްމަދު އީސާފުޅާއި ގާނޫނީ ވަކީލު އަބްދުލް ހަންނާން އަހުމަދާއި ދިއްގަރު ދާއިރާގެ މެމްބަރު ފާރިސް މައުމުނާއި ރައީސުލްޖުމްހޫރިއްޔާގެ މެމްބަރު މަސްތޫރު ހުސްނީ އާއި ސީއެސްސީގެ ރައީސް ޑރ. އަލީ ޝަމީމާއި ގާނޫނީ ވަކީލު ލަތީފާ ގާސިމްގެ އިތުރުން ބަންޑާރަ ނައިބު އިބްރާހިމް ރިފްއަތުއެވެ.
