ކެނޑިޑޭޓުންނާއި ޕާޓީތަކަށް ވަގުތު ދިނުމުގެ އުސޫލު ރާއްޖެޓީވީން އާންމުކޮށްފި
7 މާރިޗު 2019 | ބުރާސްފަތި 04:14ރާއްޖެޓީވީ ވަގުތު ވިއްކުމަށް 3 ޕެކޭޖެއް ހިމެނޭ
ރާއްޖެޓީވީ އޮންއެއަރ ވަގުތު ވިއްކުން
ކުރިއަށް އޮތް މަޖިލިސް އިންތިހާބުގައި ވާދަކުރައްވާ ކެނޑިޑޭޓުންނާއި ޕާޓީތަކަށް ރާއްޖެޓީވީގެ "އޮންއެއަރ" ވަގުތު ވިއްކުމުގެ އުސޫލު އާންމުކޮށްފިއެވެ.
ބުދަ ދުވަހު ރާއްޖެޓީވީން އާންމުކުރި އުސޫލުގައި، ރާއްޖެޓީވީގެ އާންމު ޚަބަރު ގަޑިތަކާއި ޝެޑިއުލް ކޮށްފައިވާ ޕްރޮގްރާމް ތަކަށް ބުރޫ ނާރާނެހެން، އިންތިހާބާބެހޭ އާންމު ޤާނޫނުގެ 30 ވަނަ މާއްދާގައިވާ ފަދައިން ބްރޯޑްކާސްޓް ކޮމިޝަނުން އެކުލަވާލާފައިވާ އުސޫލާ އެއްގޮތަށް ރާއްޖެޓީވީން އެފަރާތްތަކަށް ފުރުޝަތު ދޭނެ ކަމަށް ބަޔާން ކޮށްފައިވެއެވެ.
އޭގެ އިތުރުން، ކެނޑިޑޭޓުން ނުވަތަ ޕާޓީތަކުން ރާއްޖެޓީވީ މެދުވެރިކޮށް ދައްކަން ބޭނުންވާ ކޮންޓެންޓުތައް ދެއްކުމަށް ތާވަލުކުރާ ދުވަހުގެ މަދުވެގެން 7 ދުވަސް ކުރިން ބްރޯޑްކާސްޓް ކުރެވޭ ފޯރމެޓެއްގައި ހަވާލުކުރަންޖެހޭއިރު، އޭގެ ތެރެއިން ކޮންޓެންޓެއް ނުދެއްކުމަށް ރާއްޖެޓީވީން ނިންމައިފިނަމަ އެކަން އެފާރަތަކަށް އަންގާނެ ކަމަށް ވެސް އުސޫލުގައި ބަޔާން ކޮށްފައިވެއެވެ. އަދި މި އުސޫލުން ވަގުތު ވިއްކާއިރު، ދައްކާ ކޮންޓެންޓްތަކަށް، އެފަރާތަކުން ފުރިހަމައަށް ޒިންމާވާން ޖެހޭނެ ކަމަށް ވެސް ބަޔާންކޮށްފައިވެއެވެ.
ރާއްޖެޓީވީ ވަގުތު ވިއްކުމަށް 3 ޕެކޭޖެއް ތައްޔާރުކޮށްފައިވާއިރު، "ރައްޔިތުންގެ ޕެކޭޖް" ގެ އަގަކީ 125،000 ރުފިޔާއެވެ. އަދި "ރިޔާސަތު ޕެކޭޖް" 95،000 ރުފިޔާއަށް ވިއްކާއިރު، "ބަރުލަމާނު ޕެކޭޖް" ވިއްކުމަށް ހަމަޖެހިފައިވަނީ 65،000 ރުފިޔާއަށެވެ. އެގޮތުން މީގެ ކޮންމެ ޕެކޭޖެއްގެ ދަށުން ވެސް ކެނޑިޑޭޓުންނާއި ޕާޓީތަކުން ހުށައަޅާ ކޮންޓެންޓުތައް ގެނެސްދެވޭނެ ގޮތްތައް އުސޫލުގައި ބަޔާން ކޮށްފައިވެއެވެ.
މި ޕެކޭޖްތަކުގެ އިތުރުން ރާއްޖެޓީވީއާއި އެ ފަރާތަކާމެދު ވިޔަފާރީގެ ގޮތުން އެއްބަސްވެވޭ ގޮތެއްގެ މަތިން ޕެކޭޖް ހެދުމަށް ވެސް ފުރުޝަތު ހުޅުވާލެވިފައިވެއެވެ.
އޭގެ އިތުރުން، ހަމަހަމަ ފުރުޝަތުތައް ދިނުމާއި، ކެނޑިޑޭޓަކަށް ދީފައިވާ ވަގުތު ކެންސަލް ކުރެވޭނެ ގޮތްތަކާއި، މެދުކަނޑާލަން ޖެހޭނެ ހާލަތްތައް ވެސް އުސޫލުގައި ބަޔާން ކޮށްފައިވެއެވެ.
