އީސީ މެމްބަރު ކަމަށް ބޭފުޅަކު އައްޔަން ކުރަން މަޖިލީހުން މިއަދު ވޯޓަށް އަހާނެ

އިލެކްޝަންސް ކޮމިޝަން (އީސީ)އިން މި މަހު ހުސްވާ މެމްބަރުކަމުގެ މަގާމަށް ބޭފުޅަކު ހޮއްވެވުމަށް ރައްޔިތުންގެ މަޖިލީހުގެ މިއަދުގެ ޖަލްސާގައި ވޯޓަށް އަހާނެއެވެ.

އީސީގެ މެމްބަރު ކަމަށް ކުރިމަތިލި 16 ބޭފުޅުންނާ މިނިވަން މުއައްސަސާތަކުގެ ކޮމެޓީން ހޯމަ ދުވަހު ވަނީ އިންޓަވިއުކޮށްފައެވެ. އިންޓަވިއު ކުރުމަށްފަހު، އެ ބޭފުޅުންނަށް ލިބިވަޑައިގެންނެވި މާކްސް ހިމެނޭ ކޮމެޓީ ރިޕޯޓް މަޖިލީހުން އާންމެއް ނުކުރެއެވެ.

މަޖިލީހުގެ އަންގާރަ ދުވަހުގެ ޖަލްސާގައި ކޮމެޓީ ރިޕޯޓު މަޖިލީހުގެ ތަޅުމަށް ހުށަހަޅައި ވޯޓަށް އަހާނެއެވެ. މާކްސް ލިބިވަޑައިގެންނެވި ތަރުތީބުން އެ ބޭފުޅުންގެ ނަންތަކަށް ވޯޓަށް އަހާނީ މެންދުރުފަހު 1:30ގައެވެ.

އީސީގެ މެމްބަރު ކަމަށް ކުރިމަތިލެެއްވި ބޭފުޅުންނާ އިންޓަވިއު ކުރެއްވުމަށްފަހު، މާކްސް ދީފައި ވަނީ ތައުލީމީ ފެންވަރާއި މަސައްކަތުގެ ތަމްރީނާއި މަސައްކަތުގެ ތަޖުރިބާ އާއި ލީޑާޝިޕާއި ނަޒާހަތްތެރިކަމަށް ބެލުމަށްފަހުގައެވެ. މިނިވަން މުއައްސަސާތަކުގެ ކޮމެޓީން ކަނޑައަޅާފައިވާ ގޮތުން އިލެކްޝަންސް ކޮމިޝަންގެ މެމްބަރު ކަމަށް އައްޔަން ކުރެއްވުމަށް އެކަށީގެންވާ ބޭފުޅެއް ކަމަށް ކޮމެޓީން ނިންމަނީ 75 ޕަސެންޓަށް ވުރެ މަތިން މާކްސް ލިބިވަޑައިގެންނެވުމުންނެވެ.

އިލެކްޝަންސް ކޮމިޝަނަށް ބޭފުޅަކު އައްޔަން ކުރައްވަނީ އެ ކޮމިޝަންގެ މެމްބަރަކަށް މިހާރު ހުންނެވި އިސްމާއިލް ހަބީބު އަބްދުއްރަހީމްގެ މަގާމުގެ މުއްދަތު މި މަހުގެ 13 ވަނަ ދުވަހު ހަމަވާތީއެވެ. ހަބީބު ވަނީ ދެ ވަނަ ދައުރަކަށް އެ ކޮމިޝަންގެ މެމްބަރުކަން ކުރިމަތިލައްވާފައެވެ. ނަމަވެސް އޭނާއަށް ވެސް ކޮމެޓީން މާކްސް ދެއްވި ގޮތުގެ ތަފްސީލެއް އަދި ހާމައެއް ނުކުރެއެވެ.