ރުކުމާ އަމިއްލަ ގޮތުން އިންތިޚާބުގައި ވާދަކުރަން ފޯމް ހުށަހަޅުއްވައިފި
ޕްރައިމަރީގައި ނާކާމިޔާބުވެވަޑައިގަތުމުން، ޕާޓީން ވަކިވެ އަމިއްލަ ގޮތުން އިންތިޚާބުގައި ވާދަކުރެއްވުމަކީ ވަރަށް ބޮޑު ބޭވަފާތެރި ކަމެއް ކަމަށް ވެސް ރައީސް ނަޝީދު ވަނީ ވިދާޅުވެފައި
ރުކުމާ(ވ) އަދި ހެންވޭރު ދެކުނު ދާއިރާގެ އެމްޑީޕީގެ ކެންޑިޑޭޓް އަނދުން ހުސައިން
އެމްޑީޕީގެ ޕްރައިމަރީގައި ނާކާމިޔާބުވެވަޑައިގެންނެވި ހެންވޭރު ދެކުނު ދާއިރާގެ މެމްބަރު މުހައްމަދު އަބްދުލްކަރީމް (ރުކުމާ) އަމިއްލަ ގޮތުން އިންތިޚާބުގައި ވާދަކުރައްވަން ފޯމު ހުށަހަޅުއްވައިފިއެވެ.
މުހައްމަދު އަބްދުލްކަރީމް ވާދަކުރައްވަނީ މިހާރު ވެސް އޭނާ ތަމްސީލް ކުރައްވާ، އަދި ޕްރައިމަރީގައި ނާކާމިޔާބުވެވަޑައިގެންނެވި ހެންވޭރު ދެކުނު ދާއިރާއަށެވެ. ޕްރައިމަރީ ކާމިޔާބު ކުރައްވައި، އެ ދާއިރާގެ އެމްޑީޕީގެ ޓިކެޓްގައި ހޯއްދެވީ މަޝްހޫރު ވިޔަފާރިވެރިޔާ ހުސެއިން ޝަހީމް (އަނދުން ހުސެއިން) އެވެ.
އެމްޑީޕީން ވަކިވެވަޑައިގަތުމަށް ފަހު މުހައްމަދު އަބްދުލްކަރީމް އަމިއްލަ ގޮތުން އިންތިޚާބުގައި ވާދަކުރެއްވީ، ޕްރައިމަރީގައި ބަލިވާ ކެންޑިޑޭޓުންނަށް އިންތިޚާބުގައި ވާދަ ނުކުރެވޭނެ ކަމަށް ސިޔާސީ ޕާޓީތަކުގެ ގާނޫނަށް ގެނެސްފައިވާ އިސްލާހު، ސުޕްރީމް ކޯޓުން ބާތިލް ކުރުމުންނެވެ.
އެމްޑީޕީ އިން ހޮނިހިރު ދުވަހު ކުރިއަށް ގެންދިޔަ ޕޯސްޓަރު ހަރުކުރުމާއި ބިލްބޯޑު ހަރުކުރުމުގެ ހަރަކާތުގައި ހެންވޭރު ދެކުނަށް ނިސްބަތްވާ ރައްޔިތުންނާ މުޚާތަބުކުރައްވައި ވާހަކަ ދައްކަވަމުން ކުރީގެ ރައީސް ރައީސް މުހައްމަދު ނަޝީދު ވިދާޅުވީ މާލޭގެ ގޮނޑިތައް އެމްޑީޕީން ކާމިޔާބުކުރުން މުހިންމު ކަމަށެވެ. އެމްޑީޕީން ބޭއްވި އެތެރޭގެ އިންތިހާބުގައި ހެންވޭރު ދެކުނު ދައިރާގެ ޓިކެޓް ކާމިޔާބު ކުރެއްވީ އަނދުން ހުސައިން ކަމަށާއި ޕާޓީގެ ހުރިހާ މެމްބަރުން ވެސް ވޯޓް ދޭންވީ އަމިއްލަ ގޮތުން ކުރިމަތިލާ ކެންޑިޑޭޓަކަށް ނޫން ކަމަށް ވިދާޅުވިއެވެ.
ޕްރައިމަރީގައި ނާކާމިޔާބުވެވަޑައިގަތުމުން، ޕާޓީން ވަކިވެ އަމިއްލަ ގޮތުން އިންތިޚާބުގައި ވާދަކުރެއްވުމަކީ ވަރަށް ބޮޑު ބޭވަފާތެރި ކަމެއް ކަމަށް ވެސް ރައީސް ނަޝީދު ވިދާޅުވި އެވެ.
