ތުޅާދޫ ރައްޔިތުން އެދޭ ކަންތައްތައް ކޮށްދިނުމަށް ސަރުކާރުން އަބަދުވެސް އިސްކަންދޭނެ: ރައީސް

ބ. ތުޅާދޫ ރައްޔިތުން އެންމެ އެދޭ ގޮތަށް ކަންތައް ކޮށްދެއްވުމަށް ސަރުކާރުން އަބަދު ވެސް އިސްކަން ދެއްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވީ، ބ. ތުޅާދޫ ކައުންސިލް މެމްބަރުންނާއި ބައްދަލުކުރައްވާ ދެއްކެވި ވާހަކަފުޅުގަ އެވެ.

މިއަދު މެންދުރު ފަހު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި، ތުޅާދޫގެ މިހާރުގެ ހާލަތާއި އެރަށު ރައްޔިތުން އެންމެ ބޮޑަށް ބޭނުންވެފައިވާ ކަންކަމާ ބެހޭ މައުލޫމާތު ކައުންސިލްގެ ފަރާތުން ރައީސުލްޖުމްހޫރިއްޔާއާ ހިއްސާ ކުރެއްވިއެވެ. އެގޮތުން ރަށުގެ ދަތުރުފަތުރުގެ ނިޒާމު އިތުރަށް ހަރުދަނާ ކުރުމާ ބެހޭގޮތުން ފުޅާ ދާއިރާއެއްގައި މަޝްވަރާ ކުރެއްވިއެވެ. އަދި، ތުޅާދޫ ރައްޔިތުން ގިނަ އަދަދަކަށް ރަށުން ބޭރަށް ހިޖުރަ ކުރަމުންދާކަން ފާހަގަ ކުރައްވައި، ރަށުގައި މުހިންމު އުމްރާނީ ވަސީލަތްތައް ޤާއިމުކުރުމުން އެކަމަށް ހައްލެއް ލިބިގެންދާނެކަން ކައުންސިލުން މި ބައްދަލުވުމުގައި ފާހަގަ ކުރެއްވި ކަމަށް ރައީސް އޮފީހުން ބުންޏެވެ.

މީގެ އިތުރުން، ތުޅާދޫއަށް އިޤްތިޞާދީ ގޮތުންނާއި އުމްރާނީ ގޮތުން ތަރައްޤީ ގެނައުމުގައި ކުރިއަށް ދެވިދާނެ ރޮނގުތަކާ ބެހޭގޮތުން ރައީސުލްޖުމްހޫރިއްޔާއާއި ތުޅާދޫ ކައުންސިލްގެ މެންބަރުން މަޝްވަރާ ކުރެއްވިއެވެ. އަދި، ޒުވާނުންނަށް އެކިއެކި ފުރުސަތުތައް ފަހިކޮށްދިނުމާ ބެހޭގޮތުން ވެސް ޚިޔާލު ބަދަލު ކުރެއްވިކަމަށް ވެސް ރައީސް އޮފީހުން ބުންޏެވެ. މިބައްދަލުކޮށްލެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ސަރުކާރުގެ ތަރައްޤީގެ ޕްލޭންގެ މައްޗަށް އަލިއަޅުއްވައިލެއްވިއެވެ. އަދި، ރަށްރަށުގައި ތަރައްޤީގެ މަޝްރޫޢުތައް ކުރިއަށް ގެންދެވުމުގައި އެ ރަށެއްގެ ރައްޔިތުން އެންމެ އެދޭ ގޮތަށް ކަންތައް ކޮށްދެއްވުމަށް ސަރުކާރުން އަބަދު ވެސް އިސްކަން ދެއްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސް އިބްރާހިމް މުހައްމަދު ސޯލިހް ގެންދަވަނީ ކޮންމެ ދުވަހަކު ވެސް ކައުންސިލްތަކާއި ބައްދަލުކޮށް، ރަށްރަށުގެ ހުރި މައްސަލަތައް އޮޅުން ފިލުއްވަމުންނެވެ. ރައީސް ސޯލިހަކީ ލާމަރުކަޒީ ނިޒާމް ހަރުދަނާ ކުރައްވާނެކަމުގެ ވައުދާއެކު ވެރިކަމަށް ވަޑައިގެންނެވި ބޭފުޅެކެވެ.