ކޯޕަރޭޓް މޯލްޑިވްސް އެކެޑަމީ އިން އިންތިޒާމްކޮށްގެން ހޮނިހިރު ދުވަހު ބޭއްވި މާކެޓާސް ފޯރަމް ކާމިޔާބުކަމާއެކީ ނިންމާލައިފިއެވެ.

މިއީ އެ އެކަޑަމީގެ ފަރާތުން ބޭއްވި ދެވަނަ ފޯރަމެވެ.

މާކެޓިންގ ދާއިރާގައި ހަރަކާތްތެރިވާ 200 އަށް ވުރެ ގިނަ ފަރާތްތަކާ އެކު ފެށި މި ފޯރަމް ޝަރަފުވެރި ކޮށްދެއްވާފައި ވަނީ ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަންއެވެ. ފޯރަމްގައި ވާހަކަ ދައްކަވަމުން މިނިސްޓަރު ވިދާޅުވީ މި ފޯރަމަކީ ދާއިރާތަކުން މީހުން ބިނާ ކުރުމަށް މުހިންމު ފޯރަމެއް ކަމަށާއި ޒަމާން ތަރައްޤީވަމުން އަންނަ ވަރަކަށް މާކެޓިންގްގައި ބޭނުންކުރާ އުކުޅުތައް ވެސް މިހާރު ތަފާތު ކަމަށެވެ.

މި ފޯރަމްގައި ރާއްޖެ އާއި ރާއްޖެއިން ބޭރުގެ ތަޖުރިބާކާރުންނާއި ކީ-ނޯޓް ސްޕީކަރުން ބައިވެރިވެ، ދާއިރާގެ އެކި ކަންކަމާ ގުޅޭ ގޮތުން މަޝްވަރާތައް ކޮށްފައިވާއިރު ޕެނަލްގައި ޖުމްލަ ފަސް ފަރާތަކުން ވަނީ ވާހަކަ ދައްކަވާފައެވެ. މިއަހަރުގެ ފޯރަމްގެ ތީމްއަކީ "ޑިޖިޓަލް މާކެޓިންގ" އެވެ.

މޯލްޑިވްސް މާކެޓާސް ފޯރަމަކީ މާކެޓިންގ ދާއިރާގައި ހަރަކާތްތެރިވާ މީހުންނަށް އަމާޒު ކޮށްގެން ދާއިރާގެ މަސައްކަތްތައް ހަރުދަނާ ކުރުމަށް ކޯޕަރޭޓް މޯލްޑިވްސްގެ ދަށުން ހިންގާ ކޯޕަރޭޓް މޯލްޑިވްސް އެކެޑަމީން ކުރިއަށް ގެންދާ ފޯރަމެކެވެ.