މިއަދަކީ މަޖިލިސް އިންތިހާބަށް ރީރަޖިސްޓްރީ ކުރެވޭ ފަހު ދުވަސް!

މިއަދަކީ ކުރިޔަށް އޮތް ރައްޔިތުންގެ މަޖިލިސް އިންތިހާބުގައި ވޯޓުލުމަށް ރީރެޖިސްޓްރީ ވުމުގެ ފަހު ދުވަހެވެ.

އިލެކްޝަންސް ކޮމިޝަންގެ ރައީސް އަހްމަދު ޝަރީފް ކުރެއްވި ޓްވީޓެއްގައި ވިދާޅުވީ ރީރެޖިސްޓްރީ ކުރުމުގެ ފުރުސަތު ހޮނިހިރު ދުވަހުގެ 3:00 ގެ ނިޔަލަށް ހަމަވާނެ ކަމަށެވެ.

މީގެ އިތުރުން މިދިޔަ އަހަރުގެ ރިޔާސީ އިންތިހާބުގައި ޖަލުތަކާއި، ވޯޓުފޮށި ނުބަހައްޓަން ނިންމި ރިސޯޓުތަކުގައި ވޯޓުލީ މީހުން، އެ މީހުންގެ ދާއިމީ ރަޖިސްޓްރީ އަށް ބަދަލު ކުރެވިފައިވާ ކަމަށް ވެސް އިލެކްޝަންސް ކޮމިޝަނުން ވަނީ ބުނެފައެވެ. ރައްޔިތުންގެ މަޖިލީހުގެ އިންތިހާބުގައި ރީ-ރެޖިސްޓްރީ ކުރަން ޖެހެނީ، ރިޔާސީ އިންތިހާބުގައި ވޯޓުލީ ތަން ނޫން އެހެން ތަނެއްގައި ވޯޓުލާ ނަމަައެވެ.

އަންނަ އެޕްރިލް 6 ވަނަ ދުވަހު ބާއްވަން ހަމަޖެހިފައިވާ މަޖިލިސް އިންތިހާބުގައި ބަހައްޓާނީ 507 ފޮށްޓެވެ. މި ފަހަރުގެ އިންތިހާބުގައި 264،589 (ދެ ލައްކަ ފަސްދޮޅަސް ހަތަރު ހާސް ފަސްސަތޭކަ އަށްޑިހަނުވައެއް) މީހުންނަށް ވޯޓުލުމުގެ ހައްގު ލިބިގެން ވެއެވެ.