ދުންފަތުގެ ބާވަތްތަކުގައި ލޭބަލްޖެހުމުގައި ބޭނުންކުރަން ޖެހޭ މަންޒަރު އާއްމުކޮށްފި

ދުންފަތުގެ ބާވަތްތައް ޕެކެޓްކޮށް ލޭބަލްޖެހުމާބެހޭ ގަވައިދުގައިވާ ގޮތުން ހިމަނަންޖެހޭ ނަމޫނާ މަންޒަރުތަކާއި އިންޒާރުތައް ހެލްތް ޕްރޮޓެކްޝަން އެޖެންސީއިން އާއްމުކޮށްފިއެވެ.

ކުރިޔަށް އޮތް މޭ މަހުގެ 31ވަނަ ދުވަހު އަމަލުކުރަން ފަށަން ޖެހޭ ގަވައިދުގައި ވާގޮތުން ދުންފަތުގެ ހުރިހާ ބާވަތްތަކެއް ޕެކެޓްކޮށް ލޭބަލްކުރުމުގައި އެޗްޕީއޭއިން އާއްމު ކޮށްފައިވާ ސިއްހަތުގެ އިންޒާރުތަކާއި މަންޒަރުތައް ހިމަނަންޖެހެއެވެ.

ރާއްޖެއަށް އެތެރެކޮށް ވިއްކާ ދުންފަތުގެ ބާވަތްތަކުގައި މި މަންޒަރުތަކާއި އިންޒާރުތައް ހިމަނަން ނިންމީ 2004ވަނަ އަހަރުން ފެށިގެން ޖަހަމުންގެންދާ "އާދައިގެ" އިންޒާރުތަކުގެ ސަބަބުން އެކަށީގެންވާ ބަދަލެއް ނައުމުގެ ސަބަބުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ވިދާޅުވެފައެވެ. ވޭތުވެ ދިޔަ އަހަރުތަކުގައި ދުންފަތުގެ އިސްތިއުމާލުކުރާ މިންވަރު އިތުރުވެފައިވާ ކަމަށްވެސް ރައީސް ވިދާޅުވިއެވެ.

ދުންފަތް ކޮންޓްރޯލް ކުރުމުގެ ގާނޫނު 2010ގައި ފާސްކޮށްފައިވާ އިރު އެ ގާނޫނުގެ ދަށުން ހަދަން ލާޒިމުކުރާ "ދުންފަތް ކޮންޓްރޯލް ކުރުމާބެހޭ އާންމު ގަވާއިދު" ވެސް އޮތީ، 2012ވަނަ އަހަރު އެކުލަވާލާފައިވެއެވެ. ނަމަވެސް ތަފާތު ސަބަބުތަކާހުރެ، އެ ގަވާއިދު ތަންފީޒުކޮށްފައެއް ނުވެއެވެ. އޭގެފަހުން 2017ވަނަ އަހަރުވެސް އެ ގަވާއިދަށް ބައެއް އިސްލާހުތައް ގެނެސް، ތަންފީޒު ކުރުމަށްޓަކައި ރައީސް ޔާމިނުގެ ސަރުކާރަށް ހުށަހެޅި ނަމަވެސް، އެ ގަވާއިދު އޮތީ ގެޒެޓްނުކޮށް ބާއްވާފައެވެ.

ދުންފަތުގެ ނުރައްކަލާމެދު އާންމުން ހޭލުންތެރިކުރުމަކީ ސަރުކާރުގެ ފުރަތަމަ 100 ދުވަހުގެ ތެރޭގައި ފުއްދުމަށް ކަނޑައަޅާފައިވާ ވައުދެކެވެ. އަދި، ދުންފަތުގެ ބާވަތްތަކުގައި ތަސްވީރުން ދެވޭ ސިއްޙަތުގެ އިންޒާރު ޖެހުން ލާޒިމު ކުރުމާއި، ދުންފަތުގެ ބާވަތްތައް ވިއްކޭނެ އެންމެ މަދު މިންވަރު ކަނޑައެޅުމަކީ ދުންފަތް ކޮންޓްރޯލް ކުރުމާބެހޭ ޤާނޫނާއި، ރާއްޖެ ސޮއިކޮށްފައިވާ ދުންފަތް ކޮންޓްރޯލް ކުރުމާބެހޭ ބައިނަލްއަޤުވާމީ މުޢާހަދާ ލާޒިމު ކުރާ ކަންކަމެވެ.