ކަލަންޑަރ އިއުލާންކުރާނީ އަންނަ ހަފްތާގައި ކްލަބްތަކާ މަޝްވަރާކުރުމަށް ފަހު: އެފްއޭއެމް
މިއަހަރުގެ ފުޓުބޯޅަ ސީޒަން ފަށާނީ އަންނަ ޖޫން މަހު
އެފްއޭއެމްގެ އިދާރާ
މި އަހަރުގެ ފުޓުބޯޅަ ސީޒަން ކަލަންޑަރ އިއުލާންކުރާނީ އަންނަ ހަފްތާގައި ކްލަބްތަކާ މަޝްވަރާކުރުމަށް ފަހު ކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން އެފްއޭއެމްގެ ޖެނެރަލް ސެކެޓްރީ ހުސެއިން ޖަވާޒް ވިދާޅުވީ، މިއަހަރުގެ ފުޓުބޯޅަ ސީޒަން ކަލަންޑަރ އިއުލާންކުރާނީ އަންނަ ހަފްތާގައި ކްލަބްތަކާއެކު ބާއްވާ މަޝްވަރާ އަށް ފަހު ކަމަށެވެ.
ކްލަބްތަކާ އެކު ކުރިޔަށް ގެންދިޔަ މަޝްވަރާ އަށް ފަހު މި އަހަރުގެ ފުޓުބޯޅަ ސީޒަން އަންނަ ޖޫން މަހު ބޭއްވުމަށް ނިންމާފައިވާއިރު، ކަލަންޑަރ އެފްއޭއެމް އިން އަދި ހާމައެއް ނުކުރެއެވެ. އަދި ކްލަބްތަކާ ވެސް އެފްއޭއެމް އިން ކަލަންޑަރ ހިއްސާކޮށްފައެއް ނުވެއެވެ.
ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ޖޫން މަހު ސީޒަން ފެށުމަށް ނިންމީ މާޒިޔާ ސްޕޯޓްސް އެންޑް ރެކްރިއޭޝަން ފިޔަވާ، އެހެން ހުރިހާ ކްލަބެއްގެ ތާއީދާ އެކުގައެވެ.
އަހަރު ފެށުމުގެ ކުރިން ފުޓުބޯޅަ ސީޒަން ކަލަންޑަރ ނުލިބުމަކީ ކްލަބްތަކުން އަބަދުވެސް ކުރަމުން އަންނަ ޝަކުވާއެކެވެ. ނަމަވެސް ފުޓުބޯޅަ ސީޒަން ކަލަންޑަރ އެފްއޭއެމުން އަބަދުވެސް އިއުލާންކުރަނީ އެންމެ ފަހު ވަގުތެވެ.
އެފްއޭއެމް އިން އިންތިޒާމުކޮށްގެން މިއަހަރު އެންމެ ފުރަތަމަ ބާއްވާފައިވަނީ ޔޫތު ޗެމްޕިއަންޝިޕް ފުޓުބޯޅަ މުބާރާތެވެ.
އެފްއޭއެމުން އިއުލާންކޮށްފައިވާ ގޮތުން މިއަހަރު ސީޒަން ފަށާނީ ޗެރިޓީ ޝިލްޑް މެޗުންނެވެ. އެގޮތުން މިއަހަރު ޗެރިޓީ ޝިލްޑް މެޗު ހޯމް އެންޑް އަވޭ އުސޫލަށް ބަދަލުކޮށް، އެ މެޗުގައި ބައްދަލުކުރާނީ މިނިވަން ޗެމްޕިއަންޝިޕްގެ ޗެމްޕިއަން ތ.ތިމަރަފުށި އަދި ލީގު ޗެމްޕިއަން ޓީސީ ކަމަށް އެފްއޭއެމުން ވަނީ ކަނޑައަޅާފައެވެ.
