ގެއްލުން ލިބުނު ރަށްތަކުން 48 ގަޑިއިރު ތެރޭގައި ޑެމޭޖް އެސެސްމެންޓް ފޮނުވުމަށް އިލްތިމާސްކުރަން : ޑިޒާސްޓަރ މެނޭޖްމަންޓް
27 ފެބުރުއަރީ 2019 | ބުދަ 07:31ޑެމޭޖް އެސެސްމެންޓް ހަދާ ކޮންމެ ފަހަރަކު ސަރުކާރުގެ ފަރާތުން ބަދަލު ނުދެވޭނެ
ޑެޕިއުޓީ ޗީފް އެގްޒެކިއުޓިވް އުމަރު މޫސާ ފިކުރީ
ދެކުނުގެ އަތޮޅުތަކަށް ކުރަމުންދާ ވިއްސާރައިގައި ފެންބޮޑުވެ ގެއްލުން ލިބުނު ރަށްތަކުން 48 ގަޑިއިރު ތެރޭގައި ޑެމޭޖް އެސެސްމެންޓް ފޮނުވުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން އިލްތިމާސް ކޮށްފިއެވެ.
ދެކުނު އަތޮޅުތަކަށް ކުރަމުންދާ ވިއްސާރައާ ގުޅިގެން ލިބުނު ގެއްލުންތަކުގެ މައުލޫމާތު މީޑިއާއަށް ހިއްސާކުރުމަށް ބުދަ ދުވަހުގައި ބޭއްވި ނޫސްވެރިންގެ ބައްދަލުވުމުގައި އެންޑީއެމްއޭގެ ޑެޕިއުޓީ ޗީފް އެގްޒެކިއުޓިވް އުމަރު މޫސާ ފިކުރީ ވިދާޅުވީ ވީހާ ވެސް އަވަހަކަށް ގެއްލުން ލިބިފައިވާ ރަށްތަކުގެ ކައުންސިލުން އެމައުލޫމާތުތައް ގުޅައި ލޮގް ކޮށް ރިކޯޑް ބެލެހެއްޓުމަކީ ވަރަށް މުހިންމު ކަމެއް ކަމަށާއި އޭގެ ސަބަބުން ކުރިޔަށް އޮތް ތަނުގައި ކުރިޔަށް ގެންދާ ތަރައްގީގެ މަޝްރޫއުތަކުގެ ޕްލޭން ހެދުމުގައި މިހާރު ލިބެމުންދާ ފަދަ ގެއްލުންތައް ކުޑަކުރުމަށް މަގު ފަހިވެގެންދާނެ ކަމަށެވެ.
ތަރައްގީގެ އެކި މަޝްރޫއުތަކާއި ގުޅިގެން ލިބޭ ގެއްލުންތައް ފާހަގަކުރައްވާ މޫސާ ފިކުރީ ވިދާޅުވީ ބިންހިއްކާ ރަށުގަޔާއި އެއާރޕޯޓް އަޅާ ރަށްތަކުގެ އިތުރުން މަގުތައް ހަދާ ރަށްތަކުގައި ފެންބޮޑުވުމުގެ މައްސަލަތައް ވަރަަށް ބޮޑަށް ދިމާވާ ކަމަށާއި ޑްރެއިނޭޖް ނޭޅުމުގެ ސަބަބުން ވެސް މިކަހަލަ ކަންތައް ދިމާވާކަމަށެވެ.
މީގެއިތުރުން މޫސާ ފިކުރީ ވިދާޅުވީ ޑެމޭޖް އެސެސްމެންޓް ހެދުމުގެ ބޭނުމަކީ ޑިޒާސްޓަރ ލޮސް ޑާޓާ ބޭސް އަށް ހުރިހާ މައުލޫމާތު އަޕްޑޭޓްކުރުން ކަމަށެވެ. އެގޮތުން ޑެމޭޖް އެސެސްމެންޓް ހަދާ ކޮންމެ ފަހަރަކު ސަރުކާރުގެ ފަރާތުން ބަދަލު ނުދެވޭނެ ކަމަށާއި އެހީތެރިކަން ފޯރު ކޮށްދެނީ ވަކި ޝަރުތުތަކެއް ފުރިހަމަވުމުން ކަމަށެވެ. އަދި އެހީތެރިކަން ފޯރުކޮށްދޭއިރު ލިބިފައިވާ ގެއްލުންތަކުގެ ބަދަލު 100 އިންސައްތަ ފޯރުކޮށްނުދޭ ކަމަށާއި އެހީތެރިކަން ފޯރިކޮށްދެނީ ގެއްލުމުން ރައްޔިތުން އަރައިގަނެ ދިރިއުޅުން އާންމު ހާލަތަށް ރުޖޫއު ކޮށްދިނުމަށް ކަމަށެވެ.
މޫސުން ގޯސްވުމުގެ ސަބަބުން އަންގާރަ ދުވަހު މެޓް އޮފީހުން ވަނީ މ. އަތޮޅުން ފެށިގެން ގދ. އަތޮޅުގެ ރަށްތަކަށް ޔެލޯ އެލާރޓް ނެރެފައެވެ.
