ފީއަލީގައި ކޮންމެ ދުވަހަކު ވެސް ޑެންގީ ހުމަށް ދެ މީހަކު ފޮޒިޓިވްވޭ: ކައުންސިލް
26 ފެބުރުއަރީ 2019 | އަންގާރަ 15:58ގިނައިން ޑެންގީއަށް ޕޮޒިޓިވް ވަނީ ކުޑަ ކުދިން
ފ. ފީއަލީގެ މަގެއް
ފ. ފީއަލީ ކޮންމެ ދުވަހަކު ވެސް ޑެންގީ ހުމަށް ދެ މީހަކު ފޮޒިޓިވްވާ ކަމަށް އެ ރަށުގެ ކައުންސިލުން ބުނެފިއެވެ.
ރާއްޖެއެމްވީ އަށް މައުލޫމާތު ދެމުން ފީއަލީ ކައުންސިލްގެ ނައިބު ރައީސް މޫސާ އަހްމަދު ވިދާޅުވީ ޑެންގީ ހުން ކޮންޓްރޯލްވެފައި އޮތުމަށް ފަހު، މި މަހުގެ 19 އިން ފެށިގެން ޑެންގީ ހުން ވަރަށް ބޮޑަށް ފެތުރެމުން އަންނަ ކަމަށެވެ.
އެގޮތުން ކުޑަކުދިންނާއި، ބޮޑެތި މީހުން ޑެންގީ އަށް ޕޮޓިވްވާއިރު، ގިނައިން މިހުމަށް ޕޮޒިޓިވް ވަނީ ކުޑަ ކުދިން ކަމަށެވެ. އަދި ދުވާލަކު ދެ މީހުން ހުމަށް ޕޮޒިޓިވް ވެގެން ރިޕޯޓު ކުރާ ކަމަށެވެ.
މޫސަ ވިދާޅުވީ ޑެންގީ ހުން ޖެހިގެން މި މަހުގެ 22 ވަނަ ދުވަހު މާލެ ގެނައި 6 އަހަރުގެ ފިރިހެން ކުއްޖާ އިތުރު ފަރުވާއަށް އިންޑިއާއަށް މާދަމާ ފުރާނެ ކަމަށް އާއިލާއިން މައުލޫމާތު ދީފައިވާ ކަމަށެވެ.
މީގެ އިތުރުން މޫސަ ވިދާޅުވީ މަދިރި އާލާވާ ތަންތަން ނައްތާލުމުގެ މަސައްކަތް ކުރަމުން އަންނައިރު، ގިނަ އަދަދެއްގެ ފުޅިތަކާއި ދަޅުތައް ނައްލެވޭނެ ގޮތެއް ނެތް ކަމަށާއި، މި މައްސަލާގައި ރަށުގެ ރައްޔިތުން ވަރަށް ބޮޑަށް ކަންބޮޑުވުންފާޅު ކުރަމުން އަންނަ ކަމަށެވެ.
ފީއަލީގައި ނުރައްކާތެރި މިންވަރަށް ޑެންގީ ހުން ފެތުރު މި މަހުގެ 8 ވަނަ ދުވަހު ހަ ކުއްޖަކު އެމަޖަންސީގައި އިތުރު ފަރުވާއަށް ވަނީ މާލެ ގެނެސްފައެވެ. އަދި މިކުދިންގެ ތެރެއިން ދެކުއްޖަކު އިތުރު ފަރުވާއަށް ރާއްޖޭން ބޭރަށް ވެސް ގެންދިޔައެވެ. މިހާރު މި ކުދިންގެ ހާލު ރަނގަޅު ކަމަށް މައުލޫމާތު ލިބެއެވެ.
އެ ދުވަސްވަރު އެރަށުގެ ސްކޫލު ވެސް ވަގުތީ ގޮތުން ބަންދުކުރިއެވެ.
ފީއަލި ކައުންސިލުން ބުނީ ޑެންގީ ހުން ކޮންޓޯލް ކުރުމަށް ކޮންމެ ދުވަހަކު އެރަށު ތެރެ ފޮގް ކުރުމުގެ މަސައްކަތް ކުރަމުން އަންނަ ކަަމަށެވެ.
