އެމްބީއޭ ޗެމްޕިއަންޝިޕް: ޓީރެކްސް މައްޗަށް ކުރި ހޯދާ ކިންގްސް ބީސީ ފައިނަލަށް

އެމްބީއޭ ޗެމްޕިއަންޝިޕްގެ ފައިނަލަށް ކިންގްސް ބީސީ ގޮއްސިއެވެ.

ކިންގްސް ބީސީ މުބާރާތުގެ ފައިނަލުގެ ޖާގައެއް ކަށަވަރުކުރީ ސެމީ ފައިނަލުގައި ޓީރެކްސް ބީސީ ބަލިކޮށްގެންނެވެ.

މި މެޗު ކިންގްސް ބީސީ ކާމިޔާބުކުރީ 88 ޕޮއިންޓް, 81 ޕޮއިންޓުންނެވެ.

ހޯމަދުވަހު ސޯޝަލް އިންޑޯގައި ކުޅުނު މިމެޗުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނިގެންދިޔައެވެ.

މެޗުގެ ފުރަތަމަ ކުއާޓާގައި ކިންގްސްއިން 26 ޕޮއިންޓް ކާމިޔާބުކުރިއިރު ޓީރެކްސްއަށް ކާމިޔާބުކުރެވުނީ 21 ޕޮއިންޓެވެ.

ދެވަނަ ކުއާޓާ ފެށިގެން ދެ ޓީމުގެ ފަރާތުން ވަރުގަދަ ކުޅުމެއް ފެނިގެންދިޔައިރު މި ކުއާޓާ ކާމިޔާބުކުރީ ޓީރެކްސް އިންނެވެ. މި ކުއާޓާގައި ކިންގްސް އިން 20 ޕޮއިންޓް ކާމިޔާބުކުރިއިރު ޓީރެކްސް ވަނީ 22 ޕޮއިންޓް ކާމިޔާބުކޮށްފައެވެ.

ތަޖުރިބާކާރު ގިން ކުޅުންތެރިންތަކެއް ހިމެނޭ ކިންގްސް ބީސީ ވަނީ ތިންވަނަ ކުއާޓާ ކާމިޔާބުކޮށް ލީޑް ނަގާފައެވެ. މި ކުއާޓާ ކިންގްސް ބީސީ ކާމިޔާބުކުރީ 20 ޕޮއިންޓް، 17 ޕޮއިންޓުންނެވެ.

މެޗުގެ ފަހު ދެ ކުއާޓާގައި ސްކޯކުރުމުގައި ޓީރެކްސް ފެއިލްވެ، ކުޅުން ދައްވި ވަގުތުގެ ބޭނުންހިފާ ކިންގްސް މެޗު ކާމިޔާބުކުރިއެވެ. މެޗުގެ ފަހު ކުއާޓާގައި ކިންގްސް ބީސީ ވަނީ 22 ޕޮއިންޓް ކާމިޔާބުކޮށްފައެވެ. މި ކުއާޓާގައި ޓީރެކްސް އަށް ކާމިޔާބުކުރެވުނީ 21 ޕޮއިންޓެވެ.

މެޗުގެ ފުރިހަމަ ވަގުތު ހަމަވިއިރު ނަތީޖާއަކީ ކިންގްސް ބީސީ 88، ޓީރެކްސް ބީސީ 81 އެވެ.

މެޗުގެ މޮޅު ކުޅުންތެރިއަކަށް ހޮވުނީ ކިންގްސް ބީސީގެ އަހުމަދު ފިރާޝްއެވެ.

މި ދެ ޓީމަކީ ވެސް ތަޖުރިބާކާރު ގިނަ ކުޅުންތެރިންތަކެއް ހިމެނޭ ދެޓީމެވެ.