މިނިވަން މުއައްސަސާތަކާ ބެހޭ ކޮމިޓީގެ މުގައްރިރުކަމުން ރޮޒެއިނާ ވަކިކުރަން ހުށައަޅައިފި
26 ފެބުރުއަރީ 2019 | އަންގާރަ 03:27ވަކިކުރުމަށް ހުށަހަޅާފައިވަނީ ކުރީގެ ރައީސް އަބްދުﷲ ޔާމީނާ މެދު ބޭއިންސާފުން ކަންކުރަމުން ގެންދާކަމަށް ބުނެ
އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް
ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގެ މުގައްރިރު ކަމުން އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވަކިކުރުމަށް އިދިކޮޅު ޕީޕީއެމުން އެދިއްޖެއެވެ.
މަޖިލީހުގެ އަމީން އާމަށް އެޑްރެސްކޮށް، ކޮންގްރެސް ކޯލިޝަނުން ފޮނުވާފައިވާ ސިޓީގައި ބުނެފައިވަނީ، މުގައްރިރު ރޮޒެއިނާ އާދަމް އެކަމަނާގެ ޒިންމާ ފުރުހަމައަށް އަދާނުކުރައްވާތީ، އިތުބާރު ގެއްލިފައިވާ ކަމަށެވެ.
ރޮޒެއިނާ މުގައްރިރުކަމުން ވަކިކުރުމަށް ހުށައަޅުއްވާފައިވަނީ އެ ކޮމިޓީގައި ތިއްބަވާ ކެލާ ދާއިރާގެ މެންބަރު އަލީ އާރިފާއި، ހޯރަފުށީ ދާއިރާގެ މެންބަރު މުހައްމަދު އިސްމާއިލާއި، ގައްދޫ ދާއިރާގެ މެންބަރު އަހުމަދު ރަޝީދާއި ނައިފަރު ދާއިރާގެ މެންބަރު އަހުމަދު ޝިޔާމްއެވެ.
ރޮޒައިނާ އެމަޤާމުން ވަކިކުރުމަށް ހުށަހަޅާފައިވަނީ ކުރީގެ ރައީސް އަބްދުﷲ ޔާމީނާ މެދު ބޭއިންސާފުން ކަންކުރަމުން ގެންދާ ކަމަށް ބުނެ، އެކްޓިން ކޮމިޝަނަރ އޮފް ޕޮލިސް މުހައްމަދު ހަމީދާއި ޕްރޮސެކިއުޓަރ ޖެނެރަލް އައިޝަތު ބިޝާމް ކޮމެޓީއަށް ހާޒިރުކުރުމަށް ހުށަހެޅުމުން އެކަން ކުރިއަށް ނުގެންދެވޭނެ ކަމަށް ރޮޒައިނާ ކަނޑައެޅުއްވުމުންނެވެ.
ހޯމަ ދުވަހު އިދިކޮޅު ފަރާތްތަކުން ބޭއްވި ނޫސްވެރިންގެ ބައްދަލު ވުމެއްގައި ފޮނަދޫ ދާއިރާގެ މެމްބަރު އަބުދުއްރަހީމް އަބުދުﷲ ވިދާޅުވީ އެކްޓިން ސީޕީ ހަމީދު އާއި ޕީޖީ ބިޝާމް ކޮމެޓީއަށް ހާޒިރުކުރުމުގެ މައްސަލަ ކުރިއަށް ނުގެންދިއުމަށް ނިންމެވީ ކޮމެޓީގެ މުޤައްރިރު ރޮޒައިނާ ކަމަށެވެ.
އިތުބާރު ނެތް ކަމަށް ހުށައެޅި މައްސަލައިގައި މެންބަރު ރޮޒެެއިނާ ވިދާޅުވީ، ބިރުދައްކާ، އިތުބާރު ނެތް ކަމަށް ނެގިއަސް ގާނޫނުއަސާސީއާއި މަޖިލިސް ގަވާއިދާއި، އުސޫލްތަކާއި ޚިލާފްކަމެއް އޭނާ ލައްވާ ނުކުރެވޭނެ ކަމަށެވެ.
"ޝަރީއަތުގައި އޮތް މައްސަލައަކާއި ގުޅިގެން މަޖިލީހުގައި މައްސަލައެއް ކުރިއަށް ނުގެންދޭ މީގެކުރިން ވެސް" ރޮޒެއިނާ ވިދާޅުވިއެވެ.
