ދެ ނައިބު ރައީސުން މަގާމުން ދުރުކުރީ ހަވާލުކުރެވިފައިވާ ޒިންމާތައް އަދާނުކުރާތީ: މެމްބަރު އަބްދުލްގަފޫރު
25 ފެބުރުއަރީ 2019 | ހޯމަ 07:36ޓެކްސްގެ ފައިސާއިން އިނާޔަތްތައް ހަމަޖައްސާއިރު، ހަރަދު ކުރެވޭނީ ވަކި މިންގަނޑަކަށް
މަޖިލީހުގެ ކުޅުދުއްފުށި އުތުރު ދާއިރާގެ މެމްބަރު އަބްދުލްގަފޫރު މޫސާ
ރައްޔިތުންގެ މަޖިލީހުން ދެ ނައިބު ރައީސުން މަގާމުން ދުރުކުރީ ހަވާލުކުރެވިފައިވާ ޒިންމާތައް އަދާނުކުރައްވާތީ ކަމަށް ރައްޔިތުންގެ މަޖިލީހުގެ ކުޅުދުއްފުށި އުތުރު ދާއިރާގެ މެމްބަރު އަބްދުލްގަފޫރު މޫސާ ވިދާޅުވެއްޖެއެވެ.
ރައީސުލްޖުމްހޫރިއްޔާގެ ނައިބުކަން ކުރައްވައިފައިވާ މީހަކަށް ދޭންޖެހޭ ރައްކާތެރިކަމުގެ ބިލު ހުޅަހެޅުމުން ބަހުސް ކުރައްވަމުން މެންބަރު އަބްދުލްގަފޫރު ވިދާޅުވީ ނައިބުންނަށް އިނާއަތާއި ރައްކާތެރިކަން ދިނުމަށް މަޖިލީހަށް ހުށަހެޅުމުން ސުވާލު އުފެދޭ ކަމަށެވެ.
އަބްދުލްގަފޫރު ވިދާޅުވީ ފަސް އަހަރުގެ ޓާމެއްގެ ތެރެއިން ތިން އަހަރު ދުވަހު އެމަގާމުގައި ހުންނަވައިފިނަމަ ދައުލަތުން އިނާއަތާއި ރައްކާތެރިކަން ދިނުމަށް ނިންމާފައިވާ ކަމަށެވެ. ނަމަވެސް މިދިޔަ ފަސް އަހަރު ނައިބް ރައީސްކަން ކުރެއްވި ތިން ބޭފުޅުން އެބަތިއްބެވި ކަމަށާއި، މިހުރިހާ ބޭފުޅުންނަށް ދައުލަތުން އިނާޔަތާ ރައްކާތެރިކަން ދެވޭނެތޯ މިއީ އުފެދޭ ސުވާލެއް ކަމަށެވެ.
އަބްދުލްގަފޫރު ވިދާޅުވީ ދެނައިބު ރައީސުން މަޖިލީހުން މަގާމުން ދުރުކުރީ ހަވާލުކުރެވޭ ޒިންމާއާ ވާޖިބު އަދާ ނުކުރެވޭތީ ކަމަށާއި، އެބޭފުޅުންނަށް އިތުރު އިނާއަތް ދިނުމަށް ހުށަހެޅުމުން ސުވާލު އުފެދޭ ކަމަށެވެ. އަދި ރައްޔިތުންގެ ޓެކްސްގެ ފައިސާއިން އިނާއަތްތައް ހަމަޖައްސާއިރު، ހަރަދުކުރެވޭނީ ވަކި މިންގަނޑަކަށް ކަމަށް އޭނާ ވިދާޅުވިއެވެ.
"ކިހިނެތްތޯ އުމުރަށް މާލީ ރައްކާތެރިކަމާއި، މާލީ އިނާއަތާއި، މިހުރިހާ ކަމެއްދީގެން އަޅުގަނޑުމެން މިހުރިހާ ބޭފުޅުން ގެންގުޅޭނީ. ފަސް އަހަރު ދުވަހުގެ ޓާމެއްގެ ތެރޭގައި އިނާއަތް ދޭންޖެހޭ ހަތަރު ބޭފުޅުން އެބަތިބި. މިހާރު ވެސް އަހަރެއްގެ މައްޗަށް 15 މިލިއަން 20 މިލިއަން ރުފިޔާ ދައުލަތުގެ ފައިސާއިން އެބަ ހަރަދުވޭ. މިދައްކަނީ ތިން ލައްކަ މީހުން ދިރިއުޅޭ ގައުމެއްގެ ވާހަކަ. މިއީ މިގައުމަށް ކުރެވޭނެ ކަމައްތޯ މިއީ ކުރެވޭނެ ސުވާލެއް." އަބްދުލްގަފޫރު ވިދާޅުވިއެވެ.
އަބްދުލްގަފޫރު ވިދާޅުވީ ގައުމަށް ޚިދުމަތް ކޮށްދެއްވި ބޭފުޅުންނަށް ކޮންމެވެސް ވަރެއްގެ އިނާއަތާ ރައްކާތެރިކަން ދިނުން އެއީ ގޯހެއް ނޫން ކަމަށާއި، ނަމަވެސް ވަކި އުސޫލުތަކެއް ހުންނަން ޖެހޭ ކަމަށެވެ. އޭނާ ވިދާޅުވީ ކަމެއް ހުށަހެޅިގެން ކަމެއް ފާސް ކުރާއިރުގައި އެއީ އެންމެ ރަނގަޅު ގޮތްތޯ ވިސްނާލަން ޖެހޭ ކަމަށެވެ.
"ނައިބް ރައީސްއަށް ވުރެ މަތިން ރައީސުލްޖުމްހޫރިއްޔާ މިހުންނަވަނީ. އެހެން ނަމަވެސް ރައީސުލްޖުމްހޫރިއްޔާ ވެސް ތިން އަހަރު ދުވަހު ފަސް އަހަރުގެ ޓާމެއްގެ ތެރެއިން ތިން އަހަރު ފުރިހަމަ ނުކުރާ ކަމަށްވަންޏާ އެއްވެސް އިނާއަތެއް ނޯވޭ މަޖިލީހުގައި. އެއްވެސް މާލީ އިނާއަތެއް ނޯވޭ. އެއްވެސް ރައްކާތެރިކަމެއް ނޯވޭ. އެހެންވީމަ މިހުރިހާ ކަމަކަށް އަޅުގަނޑުމެން ރިޔާއަތް ކުރަންޖެހޭ އެބަޖެހޭ މިކަން ފާސް ކުރާއިރު." އަބްދުލްގަފޫރު ވިދާޅުވިއެވެ.
ބައެއް ނައިބު ރައީސުން ނިކަމެތިހާލުގައި ދިރިއުޅުމުން ގެންދާ ކަމަށް ބައެއް މެންބަރުން ފާހަގަކުރައްވައިފައިވާތީ އެކަމަށް އިޝާރަތް ކުރައްވާ އަބްދުލްގަފޫރު ވިދާޅުވީ ނިކަމެތިކަމާއި، އަރާމުގައި ދިރިއުޅެމުންގެންދާ މީހުން އޮޅިފައިނުވާ ކަމަށެވެ.
އަބްދުލްގަފޫރު ވިދާޅުވީ ބައެއް ރައްޔިތުން ދިރިއުޅެމުން ގެންދަނީ ވަރަށް ނިކަމެތިކޮށް ކަމަށާއި، ރައްޔިތުންނަށް ނުދޭ އެއްޗެއް ރައްޔިތުން ހޮވާ ވެރިންނަށް ދިނުމާމެދު އިތުރު ވިސްނުމަކަށްދާން ޖެހޭ ކަމަށެވެ.
ރައީސުލްޖުމްހޫރިިއްޔާގެ ނައިބުކަން ކޮށްފައިވާ މީހަކަށް ދޭންޖެހޭ ރައްކާތެރިކަމުގެ ބިލު ހުޅަހަޅާފައިވާއިރު، ކުރީގެ ރައީސް އަބްދުﷲ ޔާމީންގެ ވެރިކަމުގައި ތިން ނައިބު ރައީސްއަކު ވަނީ އައްޔަން ކުރައްވާފައެވެ. ޔާމީން ވެރިކަމުގެ ފުރަތަމަ ނައިބް ރައީސްއަކީ މުހައްމަދު ޖަމީލު އަހުމަދުއެވެ. އޭނާގެ އިތުބާރު ނެތްކަމުގެ ވޯޓު މަޖިލީހުގައި ނަގައި ވަކިކުރެއްވީ 22 ޖުލައި 2015 ގައެވެ. އެއަށް ފަހު ނައިބް ރައީސް ކަމަށް އައްޔަން ކުރެއްވި އަހުމަދު އަދީބު މަގާމުން ދުރުކުރެއްވީ 5 ނޮވެންބަރު 2015 ގައެވެ. އަދީބަކީ ރާއްޖޭގައި އެންމެ ކުރު މުއްދަތަކަށް ނައިބު ރައީސްކަން ކުރެއްވި ބޭފުޅާ އަށެވެ. އެއީ 107 ދުވަހެވެ. އަދި އެންމެފަހުން އައްޔަން ނައިބް ރައީސް ކަމަށް އައްޔަން ކުރެއްވި އަބްދުﷲ ޖިހާދެވެ. ޔާމީންގެ ވެރިކަން ނިމެންދެން ޖިހާދު ނައިބުގެ މަގާމުގައި ހުންނެވިއެވެ.
އޭގެތެރެއިން އަދީބަކީ ޖަލު ހުކުމެއް ތަންފީޒް ކުރައްވާ ބޭފުޅެއްކަމުން، އެމަނިކުފާނަށް މި ބިލްގެ ތެރެއިން އިނާޔަތެއް ލިބިވަޑައެއްނުގަންނަވާނެ އެވެ. ޔާމީންގެ ދައުރުގެ ތިން ނައިބު ރައީސްގެ އިތުރުން އެއީ ކުރީގެ ނައިބް ރައީސް އަދި ރައީސް ޑރ. މުހައްމަދު ވަހީދު ހަސަން މަނިކު، މުހައްމަދު ވަހީދުއްދީން ވަނީ ނައިބް ރައީސްކަން ކުރައްވާފައެވެ. މިހާރު ނައިބް ރައީސްގެ މަގާމުގައި ހުންނެވި ފައިސަލް ނަސީމުއާއެކު ޖުމްލަ ރާއްޖޭގައި 6 ނައިބު ރައީސުން އެބަތިއްބެވިއެވެ.
