ވައުދުތައް ފުއްދޭނީ ކޯލިޝަންގެ މެމްބަރުން ގުޅިގެން މަސައްކަތް ކޮށްގެން: އިންތި
މެމްބަރުން އެކަތިގަނޑަކަށް ވެގެން މަސައްކަތް ކުރުން މުހިއްމު ކަމަށް އިންތި ވިދާޅުވި
މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ
މި ސަރުކާރުގެ ވައުދުތައް ފުއްދޭނީ ސަރުކާރު ކޯލިޝަންގެ ތެރޭގައި ހިމެނޭ ރައްޔިތުންގެ މަޖިލީހުގެ މެމްބަރުން ގުޅިގެން މަސައްކަތް ކޮށްގެން ކަމަށް އެމްޑީޕީ ޕާލިމެންޓްރީ ގުރޫޕްގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.
ސަރުކާރު ކޯލިޝަން އަށް ނިސްބަތްވާ 47 މެމްބަރުން ރައްޔިތުންގެ މަޖިލީހުގައި ތިއްބަވައެވެ.
ރާއްޖެ ޓީވީގެ ފަލަސުރުހީ ޕްރޮގްރާމްގައި އިންތި ވިދާޅުވި، ހިޔާލު ތަފާތުވުންތައް ނައްތާލައި ކޯލިޝަންގެ ހިމެނިވަޑައިގަންނަވާ މެމްބަރުން އެކަތިގަނޑަކަށް ވެގެން މަސައްކަތް ކުރުން މުހިންމު ކަމަށެވެ.
''އަޅުގަނޑު ދެކޭ ގޮތުގައި މިއޮތް މުއްދަތު ތެރޭގައި ގުޅިފައިވާ ޕާޓީތައް ގުޅިގެން މަސައްކަތް ކުރުން. ގުޅިގެން މަސައްކަތް ކޮށްގެން އަޅުގަނޑު ޔަގީން ކުރަނީ މި ސަރުކާރުގެ ވައުދު ނެގެހެއްޓުމަށް ސަރުކާރުގެ ވައުދު ފުއްދުމަށް.'' އިންތި ވިދާޅުވިއެވެ.
މާފަންނު އުތުރު ދާއިރާގެ މެމްބަރު އިންތި ވިދާޅުވީ، ޗުއްޓީ އަށް ފަހު މެމްބަރުން މަޖިލީހަށް ނިކުންނަވާއިރު ކޯލިޝަންގެ ހުރިހާ ޕާޓީއެއް ވެސް އެކުގައި މަސައްކަތް ކުރެވޭނެ ކަމަށް ގަބޫލުފުޅު ކުރައްވާ ކަމަށެވެ.
ހޯމަ ދުވަހު ބާއްވާ ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ދެ ވަނަ ޖަލްސާ އަށް ޕީޕީއެމްއަށް ނިސްބަށްވެ ވަޑައިގަންނަވާ ހުޅުދޫ ދާއިރާގެ މެންބަރު މުޙައްމަދު ޝާހިދު ހުށަހަޅުއްވަން ހަމަޖެހިފައިވާ އިންތިޚާބުތަކާ ބެހޭ ޢާންމު ޤާނޫނު އަށް އިޞްލާޙު ގެނައުމުގެ ބިލަށް އިޝަރާތް ކުރައްވާ އިންތި ވިދާޅުވީ، ޕީޕީއެމްގެ ފަރާތުން ރައްޔިތުންނަށް ފައިދާ ކުރާނެ ގޮތަށް ބިލެއް ހުށައަޅުއްވާފާނެ ކަމަށް ގަބޫލުފުޅު ނުކުރައްވާ ކަމަށެވެ.
''މިއީ އެއްވެސް އުސޫލެއް ހަމައެއް ގެންގުޅުއްވާ ބައެއް ނޫން. މިއަދުވެސް އެބޭފުޅުން ރައްޔިތުންގެ މަޖިލީހަށް ހުށައަޅުއްވާނެ ކަމަށް އަޅުގަނޑުމެން ދެކިގެން ނުވާނެ ރައްޔިތުންނަށް ފައިދާ ކުރަވަނިވި ހަމަތަކާއި އުސޫލުތަކާއި އެއްގޮތްވާ ގޮތުގެ މަތިން އެއްޗެއް '' އިންތި ވިދާޅުވިއެވެ.
ކުރިޔަށް އޮތް ރައްޔިތުންގެ މަޖިލީހުގެ އިންތިހާބު ފަސް ކުރުމަށް ޕްރޮގްރެސިވް ކޯލިޝަން އިން މަސައްކަތް ކުރިޔަސް އިންތިހާބު ފަސްކުރުމުގެ ފުރުސަތު ނުދޭނެ ކަމަށާއި، ތާރީހަށް ބަދަލު އައުމަކީ ކުރިއްސުރެ ދުރާލާ ތައްޔާރުވަމުން އަންނަ ޕާޓީތަކަށް ވެވޭ ބޭއިންސާފެއް ކަމަށް އިންތި ވިދާޅުވިއެވެ.
އިންތި ވިދާޅުވީ، އެމްޑީޕީ އަކީ އިންތިހާބުތަކަށް ވާދަކުރާ ހިތްވާ ޕާޓީއެއް ކަމަށާއި، އިލެކްޝަން ކޮމިޝަނުން އިންތިހާބު ބާއްވަން ކުރިން ކަނޑައަޅާފައިވާ ތާރީހަށް އެ ޕާޓީ އޮތީ ވަރަށް ފުރިހަމަ އަށް ތައްޔާރަށް ކަމަށެވެ.
މި އަހަރު އޭޕްރިލް މަހުގެ ހަ ވަނަ ދުވަހު ބާއްވަން ހަމަޖެހިފައިވާ ރައްޔިތުންގެ މަޖިލިސް އިންތިހާބު ބޭއްވޭނެ މާހައުލެއް ނެތް ކަމަށް ބުނެ އިންތިހާބު ފަސްކޮށް ދޭން ޕްރޮގްރެސިވް ކޯލީޝަނުން އިލެކްޝަންސް ކޮމިޝަނުގައި އެދިފައިވާ ކަމަށް އެ ޕާޓީން ބުނެފައިވަނީ އަންގާރަ ދުވަހު ބޭއްވި ނޫސް ކޮންފަރެންސެއްގައެވެ.
ނަމަވެސް އިންތިހާބު ބޭއްވުމަށް ކަނޑައަޅާފައިވާ ތާރީހް ފަސްކުރަން ޖެހޭ ގާނޫނީ ސަބަބެއް ނެތް ކަމަށް އީސީގެ ރައީސް އަހްމަދު ޝަރީފު ވަނީ ވިދާޅުވެފައެވެ.
