މަޖިލިސް އިންތިހާބު ފަސްކޮށްދޭން ޕްރޮގްރެސިވް ކޯލިޝަނުން އެދެފި
އިންތިހާބު ފަސްކުރަން ޖެހޭ ސަބަބެއް ނެތް ކަމަށް އީސީން ވަނީ ބުނެފައި
ޕީޕީއެމް އާއި ޕީއެންސީ އިން އާދިއްތަ ދުވަހު ބޭއްވި ނޫސްވެރިންގެ ބައްދަލުވުގެ ތެރެއިން: -ފޮޓޯ ރާއްޖެއެމްވީ
ކުރިއަށް ރައްޔިތުންގެ މަޖިލިސް އިންތިހާބު ބޭއްވޭނެ މާހައުލެއް ނެތް ކަމަށް ބުނެ އިންތިހާބު ފަސްކޮށް ދޭން ޕްރޮގްރެސިވް ކޯލީޝަނުން އިލެކްޝަންސް ކޮމިޝަނުގައި އެދެފި އެވެ.
ޕީޕީއެމް އާއި ޕީއެންސީ އިން އާދިއްތަ ދުވަހު ބޭއްވި ނޫސްވެރިންގެ ބައްދަލުވުގައި ޕީޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ އިންތިހާބު ބޭއްވޭ މާހައުލެއް ނެތް ކަމަށް ބުނެ އިލެކްޝަނަށް ހުށައެޅި ސިޓީގައި ފާހަގަކޮށްފައިވާނެ އެއް ސަބަބަކީ ކުރީގެ ރައީސް އަބްދުﷲ ޔާމިން ހައްޔަރުކޮށްފައި ހުރުން ކަމަށެވެ.
"އަޅުގަނޑުމެންގެ މި ގައުމުގައި ރައްޔިތުންގެ ތާއީދު އެންމެ ބޮޑު ބޭފުޅަކީ ރައީސް ޔާމީން.އެހެންވީމަ އެމަނިކުފާނު އަޅުގަނޑުމެންނާއެކީ ނެތި ޖަލުގައި އެކަނިވެރިކާއެކު އޮންނަވަން ޖެހިވަޑައިގަތުމަކީ އަޅުގަނޑުމެން ޕާޓީ އަށް، އަޅުގަނޑުމެންގެ ކޯލިޝަނަށް ލިބޭ ނިކަމެތި ކަމެއް. އަޅުގަނޑުމެންގެ މެމްބަރުންގެ ކެމްޕެއިނަށް ވެސް އޭގެއިން ނޭދެވޭ އަސަރުތަކެއް ކުރަމުންދާ ކަމެއް، އެއީ އެއްކަންތައް،" އަބްދުއްރަހީމް ވިދާޅުވި އެވެ.
އިންތިހާބު ފަސްކުރަން ޖެހޭ އަނެއް ސަބަބެއް ގޮތުގައި އޭނާ ވިދާޅުވީ ޕީޕީއެމްގެ ނައިބު ރައީސާއި މިހާރު ޖިނާއީ ދެ ދައުވާއެއް ރައްދުވާ ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރު އާޒިމާ ޝަކޫރުގެ ޕާސްޕޯޓް ހިފަހައްޓާފައި އޮތުމާއި ބައެއް އެހެން މީހުންގެ ޕާސްޕޯޓް ހިފަހައްޓަން އުޅޭ ކަމުގެ އަޑުއެތައް ފެތުރިފައިވުން ކަމަށެވެ.
ޕީޕީއެންސީ އަދި ޕީޕީއެމްގެ ކެންޑިޑޭޓުންނަށް އެމްޑީޕީން ބިރު ދައްކަމުން ދިއުން ވެސް އިންތިހާބު ފަސްކޮށްދޭން އެދުނު ސަބަބުތަކުގެ ގޮތުގައި ފާހަގަކޮށްފައިވާނެ ކަމަށް އޭނާ ވިދާޅުވިއެވެ. އެ ގޮތުން ޕީޕީއެމް ޕާލަމެންޓްރީ ގުރޫޕްގެ ލީޑަރު އަހްމަދު ނިހާން ހުސެއިން މަނިކު ޖަލަށް ލާނެ ކަމަށް އެމްޑީޕީގެ އާންމު މެމްބަރުން ބުނަމުންދާ ކަމަށް ވެސް އަބްދުއްރަހީމް ވިދާޅުވިއެވެ.
"ރޭގައި ނިހާން ޕޮލިހަށް ހާޒިރުކުރީ ބަޔާނެއް ނަގަން. ހާޒިރުކުރީމަ އެ ދާއިރާގައި ހުރި އެމްޑީޕީގެ ކެންޑިޑޭޓާއި އެ ކެންޑިޑޭޓަށް ތާއިދުކުރާ ސަޕޯޓަރުން އަޅުގަނޑުމެންގެ ސަޕޯޓަރުންގެ ގޭގެއަށް ޒިޔާރަތްކޮށް، މަގުމަތިން ބައްދަލުކޮށް، ނިހާންގެ ދުވަސް ދިޔައީ އޭ، ނިހާނަށް ދެން ޖަހާނީ ވާނުވާއޭ، އިންތިހާބު އަންނަންވާއިރު ނިހާންގެ ނަމެއް ނޯންނާނެ އޭ ބުނެ އަޑު ފެތުރުން އެއީ ބިރުދެއްކުން. އަދި ހަމަ އެކަނި ތިނަދޫ ދެކުނު ދާއިރާގައި އެކަންޏެއް ނޫން އެކަން ހިނގަމުން ދަނީ. އަޅުގަނޑުމެންގެ ވަރަށް ގިނަ ކެންޑިޑޭޓުން ކުރިމަތިލާފައި ތިބި ދާއިރާތަކުގައި އެކަން އެބަ ކުރިއަށް ދޭ،" އަބްދުއް ރަހީމް ވިދާޅުވި އެވެ.
އިންތިހާބު ފަސްކޮށްދޭން ޕްރޮގްރޮސިވް ކޯލިޝަނުން އެދުނު ނަމަވެސް އިލެކްޝަންސް ކޮމިޝަނުގެ ރައީސް އަހްމަދު ޝަރީފު ވިދާޅުވެފައި ވަނީ އިންތިހާބު ބޭއްވުމަށް ކަނޑައަޅާފައިވާ ތާރީހް ފަސްކުރަން ޖެހޭ ގާނޫނީ ސަބަބެއް ނެތް ކަމަށެވެ.
ރައްޔިތުންގެ މަޖިލިސް އިންތިހާބު ބޭއްވުމަށް އިލެކްޝަންސް ކޮމިޝަނުން ނިންމާފައި އޮތީ އަންނަ އޭޕްރީލް މަހުގެ 6 ވަނަ ދުވަހު އެވެ.
