ސައުދީގެ ޖަލުތަކުން އިންޑިއާގެ 850 ރައްޔިތުން މިނިވަންކުރަނީ

ސައުދީ އަރަބިއާގެ ޖަލުތަކުގައި ތިބި އިންޑިއާ ރައްޔިތުންގެ ތެރެއިން 850 މީހުން މިނިވަން ކުރުމަށް އެޤައުމުން ނިންމައިފިއެވެ.

ސައުދީއިން މިގޮތަށް ނިންމީ އެ ޤައުމުގެ ވަލީ އަހުދު މުޙައްމަދު ބިން ސަލްމާން މި ހަފްތާގައި އިންޑިއާއަށް ކުރެއްވި ދަތުރުފުޅުގެ ތެރެއިން، އިންޑިއާގެ ބޮޑުވަޒީރު ނަރެންދްރަ މޯދީ އެފަދައިން އެދިވަޑައިގަތުމުންނެވެ.

ސައުދީ އަރަބިއާއަކީ އިންޑިއާއިން ބޭރުގައި އިންޑިއާގެ އެންމެ ގިނަ ރައްޔިތުން ޖަލަށް ލެވިފައިވާ ޤައުމެވެ. މީހުން މެރުމާއި، މީހުން ވަގަށް ނެގުމާއި، ރިޝްވަތު ދިނުމާއި، ރަލާއި މަސްތުވާ ތަކެތީގެ މައްސަލަތަކުގައި މި އަހަރުގެ ޖަނަވަރީ މަހުގެ ނިޔަލަށް އިންޑިއާގެ 2224 ރައްޔިތަކު ވަނީ ސައުދީގެ ޖަލުތަކަށް ލެވިފައެވެ.

ސައުދީ އަރަބިއާގައި ދިރިއުޅޭ ބިދޭސީންގެ ތެރެއިން އެންމެ ބޮޑު އިންސައްތައެއް ހިއްސާ ކުރަނީވެސް އިންޑިއާގެ ރައްޔިތުންނެވެ. އެގޮތުން ސައުދީގައި އިންޑިއާގެ 2.7 މިލިއަން ރައްޔިތުން ދިރިއުޅެމުންދާއިރު މީގެ ތެރޭގައި ގިނައިން ހިމެނެނީ އިމާރާތް ކުރުމާއި، ގެވެށި ޚިދުމަތްތަކާއި، އަދި އެކި ވިޔަފާރިތަކުގައި ލޭބަރުންގެ ވަޒީފާ އަދާކުރާ މީހުންނެވެ.

ސައުދީގެ ޖަލުތަކުން އިންޑިއާގެ 850 ރައްޔިތުން މިނިވަން ކުރަން ނިންމިއިރު، އޭޝިއާއަށް މިހާރު ކުރައްވަމުން ގެންދަވާ ދަތުރުފުޅުގައި ޕާކިސްތާނަށް ވަޑައިގެން، ނިމިގެންދިޔަ ހަފްތާގެ ހޯމަ ދުވަހު ވަލީ އަޙުދު މުޙައްމަދު ބިން ސަލްމާން ވަނީ ސައުދީ ޖަލުތަކުގައި ތިބި ޕާކިސްތާނަށް ނިސްބަތްވާ 2100 ގައިދީން މިނިވަން ކުރުމަށްވެސް ނިންމަވާފައެވެ.

މި ދަތުރުފުޅުގައި ޕާކިސްތާނާއި އެކު 20 ބިލިއަން އެމެރިކާ ޑޮލަރުގެ ވިޔަފާރީގެ އެއްބަސްވުންތަކުގައި ސޮއިކޮށްފައިވާއިރު، ވަލީ އަހުދު މުޙައްމަދު ވަނީ އިންޑިއާ އާއި އެކު 100 ބިލިއަން އެމެރިކަ ޑޮލަރުގެ ވިޔަފާރި ޤާއިމްކުރެއްވުމުގެ ނިޔަތް ހާމަކުރައްވާފައެވެ.

ސައުދީ ސަރުކާރުން މަރާލާފައިވާ ނޫސްވެރިޔާ ޖަމާލް ޚާޝޮގްޖީ ގެ މަރާއި، ޔަމަނުގައި ސައުދީން ހިންގަމުންދާ ޖަރީމަތަކުގެ ފޯކަސް ގެއްލުވާލުމަށް ވަލީ އަޙުދު ކުރައްވާ ދަތުރުފުޅެއްގެ ގޮތުގައި ގިނަ ބަޔަކު ދެކޭ މި ދަތުރުފުޅުގައި ވަލީ އަޙުދު މުޙައްމަދު ވަނީ ޗައިނާއަށްވެސް ވަޑައިގެންފައެވެ.