މޯލްޑިވްސް ކަސްޓަމްސް ސާރވިސްއިން 32 ގްރާމްގެ ކޮކެއިން އަތުލައިގެންފިއެވެ. 

އެކަމާ ގުޅޭގޮތުން ކަސްޓަމުން ނެރުނު ބަޔާނެއްގައި ބުނެފައިވަނީ، ކޫރިއަރ މެދުވެރިކޮށް ނެދަރލޭންޑުގެ މަގުން ރާއްޖެއަށް އެތެރެކުރަން އުޅުނު 32 ގްރާމުގެ މަސްތުވާތަކެތި އަތުލައިގެންފައިވާ ކަމަށާއި، އޭގެ މަގުމަތީ އަގު 96000 ރުފިޔާއަށް އަރާނެ ކަމަށެވެ. 

ކަސްޓަމުން ނެރުނު ބަޔާނުގައި އިތުރަށް ބުނެފައިވަނީ، ކަސްޓަމުން އަތުލައިގަތް ޕާރސަލް ބަލައި ފާސްކުރިއިރު މަސްތުވާތަކެތި ކަމަށް ޝައްކު ކުރެވޭ 32 ގްރާމުގެ ހުދު ކުލައިގެ ކުނޑިތަކެއް ފެނިފައިވާ ކަމަށާއި، އެތަކެތި ކަސްޓަމުން ބަލައި ފާސްކުރިއިރު މަސްތުވާތަކެތީގެ ބާވަތެއް ކަމަށްވާ ކޮކޭންއަށް ޕޮޒިޓިވް ވެފައިވާ ކަމަށެވެ. 

އަތުލައިގަނެވުުނު މަސްތުވާތަކެތި ފުލުހުންނާ ހަވާލު ކުރެވިފައިވާއިރު، އެ މައްސަލަ ތަހުޤީޤު ކުރަމުންދާ ކަމަށް ބަޔާނުގައި ބުނެފައިވެއެވެ. 

މަސްތުވާތަކެތީގެ މައްސަލަތައް އިތުރުވެފައިވާއިރު، މަސްތުވާތަކެތީގެ މައްސަލަތައް ފިޔަވައި އެހެން މައްސަލަތައް މިދިޔަ އަހަރު ދަށްވެފައިވާ ކަމަށާއި، މިދިޔަ އަހަރު ފުލުހުންނަށް ހުށަހެޅި މައްސަލަތަކުގެ ތެރެއިން އެންމެ ގިނައީ މަސްތުވާތަކެތީގެ މައްސަލަތައް ކަމަށް ފުލުހުންގެ ތަރުޖަމާނު ޗީފް އިންސްޕެކްޓާ އޮފް ޕޮލިސް އިޒްމިއާ ޒާހިރު ވިދާޅުވެފައިވެއެވެ.