ސިރިސެނާ އަޅުގަނޑުގެ މިސާލު ބަލައިގެންފި: ޑުޓާޓެ
21 ފެބުރުއަރީ 2019 | ބުރާސްފަތި 02:46މަސްތުވާތަކެއްޗާ ދެކޮޅަށް ޑުޓާޓެ ކުރައްވާ ހަނގުރާމަ އަށް ވަނީ ފާޑުކިޔުން އަަމާޒުވެފައި
ރައީސް ސިރިސޭނާ މިދިޔަ މަހު ރަސްމީ ދަތުރުފުޅެއްގައި ފިލިޕީންސަށް ވަޑައިގެންފައިވޭ
މަސްތުވާތަކެތީގެ މައްސަލައިގައި ޝާމިލްވާ ފަރާތްތަކަށް މަރުގެ އަދަބު ދީގެން، މަސްތުވާ ތަކެތީގެ ވަބާ ނައްތަވާލައްވާނެ ކަމަށް ސްރީލަންކާގެ ރައީސް މައިިތިރިޕާލާ ސިރިސޭނާ ވައުދުވެ ވަޑައިގެންނެވި ކަމަށް ފިލިޕީންސްގެ ރައީސް ރޮޑްރިގޯ ޑުޓާޓެ އަންގާރަ ދުވަހު ވިދާޅުވެއްޖެއެވެ.
ރައީސް ސިރިސޭނާ މިދިޔަ މަހު ރަސްމީ ދަތުރުފުޅެއްގައި ފިލިޕީންސަށް ވަޑައިގެންފައިވާއިރު މަސްތުވާތަކެއްޗާ ދެކޮޅަށް ޑުޓާޓެ ކުރައްވާ ހަނގުރާމަ އަށް ވަނީ ތައުރީފްކުރައްވާފައެވެ. ނަމަވެސް ޑުޓާޓެގެ އެ ކެމްޕެއިނަކީ، ސަބަބެއް ބުނުމަކާ ނުލައި މަސްތުވާތަކެތީގެ ތުުހުމަތުކުރެވޭ އެތައް ހާސް ބަޔަކު މަރާފައިވާ ކެމްޕެއިނަކަށް ވާތީ ބައިނަލްއަގްވާމީ މުޖުތަމައު އިން ކުށްވެރިކުރަމުންދާ ކެމްޕެއިނެކެވެ.
ފިލިޕީންސްގެ ޑަވާއޯ ސިޓީގައި ވާހަކަ ދައްކަވަމުން ޑުޓާޓެ ވިދާޅުވީ ސްރީލަންކާގެ ރައީސް ވެސް އެމަނިކުފާނު ކަންތައްކުރެއްވި ގޮތަށް މަސްތުވާތަކެތި ބޭނުން ކުރާ ފަރާތްތައް މަރާނެ ކަމަށް ވިދާޅުވެފައިވާ ކަމަށެވެ.
ރައީސް ސރިސޭނާ ވަނީ މަސްތުވާތަކެއްޗާ ދެކޮޅަށް މަސައްކަތްކުރެއްވުމަށް އަސްކަރިއްޔާ ނެރުއްވަން ގަސްތުކުރައްވަމުން ގެންދަވާ ކަމަށާއި އެ މަގުން ފިލިޕީންސަށް ކާމިޔާބު ހޯދިފައިވާ ކަމަށް ވިދާޅުވެފައެވެ. އަދި މަސްތުވާތަކެތީގެ ވިޔަފާރިކުރާ ފަރާތްތަކަށް މަރުގެ އަދަބު ދިނުމަށް އެ ގައުމުގެ ކެބިނެޓުން ވަނީ ރުހުން ދީފައެވެ.
