633 ނަރުހުން ހޯދުމަށް އިއުލާން ކޮށްފި
18 ފެބުރުއަރީ 2019 | ހޯމަ 04:13ނަރުހުން ހޯދުމަށް އިއުލާން ކޮށްފައިވަނީ އިއްޔެ
ނަރުހުންގެ ދުވަސް ފާހަގަ ކުރުމަށް ބޭއްވި ހަފްލާގެ ތެރެއިން
އަތޮޅުތެރޭގައި މަސައްކަތް ކުރުމަށް 633 ނަރުހުން ހޯދުމަށް ހެލްތު މިނިސްޓްރީން އިއުލާން ކޮށްފި އެވެ. މިނިސްޓްރީ އޮފް ހެލްތުން ކުރި އިއުލާންގައި ބުނެފައިވަނީ، އަތޮޅުތެރޭގެ ހޮސްޕިޓަލްތަކާއި ސިއްހީ މަރުކަޒުތަކުގައި މަސައްކަތް ކުރުމަށް ބިދޭސީ ނަރުހުންގެ ބަދަލުގައި ދިވެހި ނަރުހުން ބޭނުންވާ ކަމަށެވެ. އެމަގާމަށް ކުރިމަތިލުމަށް ނާރސިންގގެ ރޮނގަކުން ދިވެހިރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލް 5 ނުވަތަ 6 ގެ ސަނަދެއް ހާސިލްކޮށްފައިވާ ފަރާތަކަށް ވާން ޖެހެއެވެ. ނަރުހުންގެ ގޮތުގައި ނަގާ ފަރާތްތަކަށް މުސާރައިގެ ގޮތުގައި މަހަކު 9060 ރުފިޔާގެ މުސާރައެއް ލިބޭނެ ކަމަށާއި އަދި އިތުރުން ސާރވިސް އެލެވެންސްތައް ވެސް ލިބޭނެކަމަށް އިއުލާންގައި ބުނެފައި ވެއެވެ.
އެ ވަޒީފާއަށް އެދޭ ފޯމް މި މިނިސްޓްރީގެ ކައުންޓަރުންނާއި ހޮސްޕިޓަލު ނުވަތަ މަރުކަޒުތަކުން ލިބެން ހުންނާނެ ކަމަށާއި އެ މިނިސްޓްރީގެ އިދާރާގެ ވެބްސައިޓް އިން މި ފޯމް ޑައުންލޯޑުވެސް ކުރެވޭނެ ކަމަށް ހެލްތު މިނިސްޓްރީން ބުނެއެވެ. މަޤާމަށް އެދި ހުށަހަޅަންހޭ ތަކެތި ހުށަހަޅާނީ 04 މާރިޗު 2019 ވާ ބުދަ ދުވަހުގެ 13:30ގެ ކުރިން ވަޒީފާއަށް އެދޭ ހޮސްޕިޓަލެއް ނުވަތަ މަރުކަޒަކަށެވެ.
