ޔޫތު ޗެމްޕިއަންޝިޕް: ގްރީން ބަލިކޮށް ޓީސީ ފައިނަލަށް

ޔޫތު ޗެމްޕިއަންޝިޕްގައި ކްލަބް ގްރީން ސްޓްރީޓްސް ބަލިކޮށް ޓީސީ ސްޕޯޓްސް ކްލަބް ފައިނަލަށް ދަތުރުކޮށްފިއެވެ.

ހޮނިހިރު ދުވަހު ހަވީރު ކުޅުނު ސެމީ ފައިނަލުގެ ފުރަތަމަ މެޗުގައި ގްރީންގެ މައްޗަށް ޓީސީން ކުރިހޯދީ 1-2 ގެ ނަތީޖާއަކުންނެވެ.

މެޗު ފެށިގެން ހަތަރުވަނަ މިނެޓުގައި ޓީސީން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ޒަޔާން ނަސީރެވެ. މި ލަނޑަށްފަހުވެސް ރަނގަޅަށް ކުޅުނީ ޓީސީންނެވެ.

އެގޮތުން ޓީސީން ވަނީ 10 ވަނަ މިނެޓުގައި މެޗުގެ ލީޑު ފުޅާކޮށްފައެވެ. މި ލަނޑުވެސް އެޓީމަށް ކާމިޔާބުކޮށްދިނީ ޒަޔާން ނަސީރެވެ.

ފުރަތަމަ ހާފް ނިމުނީ 0-2 ގެ ނަތީޖާއިން ގްރީންގެ މައްޗަށް ޓީސީ ކުރީގައި އޮވެގެންނެވެ.

ދެވަނަ ހާފް ފެށިގެން މާގިނައިރުތަކެއް ނުވަނީސް ގްރީން އިން ވަނީ ނަތީޖާގެ ފަރަގު ކުޑަކޮށްފައެވެ. މި ލަނޑު 49 ވަނަ މިނެޓުގައި ކާމިޔާބުކޮށްދިނީ އަހުމަދު ރަސްލާން ހަމީދުއެވެ.

މެޗުގެ މޮޅު ކުޅުންތެރިޔަކަށް ހޮވިފައިވަނީ ޓީސީގެ އައްޒާމް އަބްދުﷲއެވެ.

ފައިނަލުގައި ޓީސީއާ ދެކޮޅަށް ނިކުންނާނީ ހޮނިހިރު ދުވަހުގެ ރޭ ދަ ގޭންގް އާއި ކްލަބް އީގަލްސް ބައްދަލުކުރާ މެޗުން މޮޅުވާ ޓީމެކެވެ.