ޕެލިކަންސްގެ ތަރި އެންތަނީ ޑޭވިސްއަށް އަނީޔާވެއްޖެއެވެ. 

ބުރާސްފަތި ދުވަހުގެރޭ ކުޅުނު މެޗުގެ ފުރަތަމަ ކުއާޓާގައި ވާތު ކޮނޑަށް ލިބުނު އަނިޔާއާއި ގުޅިގެން ޑޭވިސް އިތުރަށް މެޗުގައި ކުޅެފައެއްނުވެއެވެ. 

ޑޭވިސް ގެ ކޮނޑަށް އަނިޔާވެފައިވާކަން ޕެލިކަންސްއިންވެސް ވަނީ ކަށަވަރުކޮށްދީފައެވެ. 

އަނިޔާވެގެން ފޭބުމުގެ ކުރިން ޑޭވިސް ވަނީ ކުޅުނު 16 މިނެޓުތެރޭ 14 ޕޮއިންޓް ޓީމަށް ހޯދައިދީ، ހަތަރު ރީބައުންޑް ނަގައިދީ އަދި ދެ އެސިސްޓް ކޮށްދީފައެވެ.

ޑޭވިސް ވަނީ ނިމިގެންދިޔަ ޖަނަވަރީ މަހު އަތުގެ އިނގިއްޔަކަށް ލިބުނު އަނިޔާއަކާއި ގުޅިގެން ގިނަ ދުވަސްތަކެއް ވަންދެން ކުޅުމާއި ދުރުގައި ހުރެފައެވެ. އަނިޔާގާ ހުރުމުން އޭރު އޭނާއަށް ވަނީ އަށް މެޗު ގެއްލިފައެވެ. 

ޑޭވިސްގެ ކޮންޓްރެކްޓް ހަމަވާން ކައިރިވެފައިވަނިކޮށް ނިއު އޯލިންސް ޕެލިކަންސްއާ އެކު އިތުރަށް ހުންނަން ބޭނުންނުވާ ކަމަށް ޑޭވިސް މީގެ ކުރިން ވަނީ ބުނެފައެވެ.

ޓްރާންސްފާ މާކެޓްގައި ލޭކާސް، މިލްވޯކީ ބަކްސް އަދި ޓޮރޮންޓޯ ރެޕްޓޯސް ވަނީ ޑޭވިސްއަށް ޝައުގުވެރިވާ ކަމަށް ބުނެފައެވެ. އެހެންނަމަވެސް މިއިން އެއްވެސް ޓީމަކާ އެއްކޮށް މަޝްވަރާ ބައްދަލުވުމެއް ބާއްވާފައެއް ނުވެއެވެ.

ޖެނުއަރީ މަހު 28 ވަނަ ދުވަހު ޑޭވިސް ވަނީ އިތުރަށް ޕެލިކަންސް އަށް ކުޅެން ބޭނުން ނުވާ ކަމަށް ބުނެ އަމިއްލަ ގޮތުން އެހެން ޓީމެއް ހޯދުމަށް ހުށައަޅާފައެވެ. ޑޭވިސްގެ މިއަމަލާ ގުޅިގެން ނެޝަނަލް ބާސްކެޓްބޯލް އެސޯސިއޭޝަނުން ވަނީ 50،000 (ފަންސާސް ހާސް) ޑޮލަރުން ޑޭވިސް ޖޫރިމަނާ ކޮށްފައެވެ.