ވަގު މުއާމަލާތްތައް ހިންގި އިރު، ޑޮލަރު ގަނެ ވިއްކުމުގެ ހުއްދަ އެސްއޯއެފްގައި ނެތް: އޭސީސީ
ބޮޑު ޚިޔާނާތް ފަޅާއެރީ 2014 ވަނަ އަހަރު ހިންގި އެކުންފުނީގެ ޚާއްސަ އޮޑިޓް ރިޕޯޓަކަށް ފަހު
އެސްއޯއެފްގެ ބޭންކް ސްޓޭޓްމެންޓެއްގެ ފޮޓޯއެއް
އޭއެމްއެމްޕީއާރުސީގެ ޚިޔާނާތުގެ ވަގު މުއާމަލާތްތައް ހިންގިއިރު، ޑޮލަރު ގަނެ ވިއްކުމުގެ ހުއްދައެއް އެސްއޯއެފްގައި ނެތް ކަމަށް އެންޓި ކަރަޕްޝަން ކޮމިޝަން އޭސީސީން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން އޭސީސީގެ އޮފިޝަލަކު ވިދާޅުވީ، އެ ކުންފުނިން ޑޮލަރުގެ މުއާމަލާތްކުރުމުގެ ހުއްދަ ނަގާފައި ވަނީ އެ މުއާމަލާތްތައް ހިންގިކަން ފަޅާއެރިތާ އަހަރަކަށް ވުރެ ވެސް ފަހުން 13 ޖެނުއަރީ 2015 ގައި ކަމަށެވެ. އެ ޚިޔާނާތް ފަޅާއެރީ 2014 ވަނަ އަހަރުއެވެ. މި ބޮޑު ޚިޔާނާތް ފަޅާއެރީ 2014 ވަނަ އަހަރު ހިންގި އެ ކުންފުނީގެ ޚާއްސަ އޮޑިޓް ރިޕޯޓަކަށް ފަހުގައެވެ. އޭސީސީން މި މައްސަލަ ބަލަން ފެށިކަން ހާމަކުރީ 2015 ގައެވެ.
ސީސީން ބުނި ގޮތުގައި އެސްއޯއެފްގެ ޑޮލަރު ވިއްކުމުގެ ހުއްދަ ފަހުން ބާތިލުކުރީ، 21 ޖޫން 2016 ވަނަ އަހަރުއެވެ.
ފަޅުތަކާއި ފަޅު ރަށްތައް ވިއްކައިގެން އެމްއެމްޕީއާރުސީ އަށް ލިބެންޖެހޭ އެތައް މިލިއަން ޑޮލަރެއް ވަން އެސްއޯއެފް ކުންފުނިން 155 މީހެއްގެ އެކައުންޓަށް ބޮޑެތި އަދަދުތަކުން ފައިސާ ޖަމާކޮށްފައިވާކަން އޭސީސީން ބުރާސްފަތި ދުވަހު އާއްމުކުރި ތަހުގީގް ރިޕޯޓުން އެނގެން އޮވެއެވެ. އޭގައި ނަން ހިމެނޭ ބައެއް ފަރާތްތަކުން ބުނަމުން ދަނީ އެއީ ސައްހަ ގޮތުގައި ހިންގި ޑޮލަރު ގަނެ ވިއްކުމުގެ މުއާމަލާތެއް ކަމަށެވެ. ނަމަވެސް އެސްއޯއެފް އަށް އެއްވެސް ފައިދާއެއް ނުވާ ގޮތަށް ބޭންކް ރޭޓް (15.42ރ.) އިން ކުރި އެތައް މިލިއަން ޑޮލަރުގެ އެ ވިޔަފާރި ކޮށްފައި ވަނީ ޑޮލަރު ގަނެ ވިއްކުމުގެ އެއްވެސް މާލީ ހުއްދައެއް އެ ކުންފުންޏަށް ލިބިފައި ނުވަނީހެވެ.
އެމްއެމްޕީއާރުސީ މެދުވެރިކޮށް ހިންގާފައިވާ ބިޔަ ބޮޑު ވައްކަމުގެ އަދަދު 1.4 ބިލިއަން ޑޮލަރަށް އަރައެވެ.
