ރަށްފެހި ޕްރޮގްރާމްގެ ދަށުން ސްޓެލްކޯގެ ހުރިހާ ބްރާންޗެއްގައި ގަސް އިންދުމުގެ ޕްރޮގްރާމް މިއަދު ކުރިއަށް ގެންދިއުމަށް އެ ކުންފުނިން ނިންމައިފިއެވެ.

މި ޕްރޮގްރާމް މުބާރާތެއްގެ ގޮތުގައި ކުރިއަށް ގެންދިޔުމަށް ހަމަޖެހިފައިވާއިރު ޕްރޮގްރާމް ތިލަފުށީގައި ފަށާނީ 02:00 ގައެވެ. އަދި ގަސް އިންދުމުގެ ޕްރޮގްރާމް ހަވީރު 05:00 ނިންމާ، ޖަޖުންގެ ޕެލަނަކުން ވަނަ ވަނަ އަށްދާ ޓީމް ހޮވުމަށް ވަނީ ނިންމާފައެވެ.

ރާއްޖެއެމްވީއަށް މައުލޫމާތު ދެއްވަމުން ސްޓެލްކޯގެ މެނޭޖިންގ ޑައިރެކްޓަރ ހަސަން މުގުނީ ވިދާޅުވީ މި ޕްރޮގްރާމް އަކީ އެއްފަހަރު ގަހެއް އިންދާފައި ދޫކޮށްލާނެ ޕްރޮގްރާމެއް ނޫން ކަމަށާއި މި ޕްރޮގްރާމް ދެމެހެއްޓެނެވި ގޮތެއްގައި ކުރިއަށް ގެންދާނެ ކަމަށެވެ.

"ހުރިހާ މުވައްޒަފުން ވެގެން މިކަންތައް ކުރިއަށްގެންދާނެ، މީގައި ފާހަގަކޮށްލަންޖެހޭ ކަމަކީ ގަހެއް އިންދާލާފައި ދޫކޮށްލާނީކީ ނޫންކަން، އަޅުގަނޑުމެން މުޅި އަހަރުގެ ތެރޭގައި ގަހަށް ވާނުވާ ބަލަމުންދާނަން، އަންނަ އަހަރު ވެސް އަޅުގަނޑުމެން ޕްލޭންކުރަން ހަމަ އެ ތާރީހުގައި ގަސް އިންދުމުގެ ޕްރޮގްރާމް ކުރިއަށް ގެންދަން" މުގުނީ ވިދާޅުވިއެވެ.

މި ޕްރޮގްރާމް ސްޓެލްކޯގެ ހުރިހާ ބްރާންޗެއްގައި އެއްވަގުތަކު ކުރިއަށް ގެންދިޔުމަށް ހަމެޖެހިފައިވާއިރު ސްޓެލްކޯގެ 1000 މުވައްޒަފުން ޕްރޮގްރާމްގައި ބައިވެރިވާނެއެވެ.

ރަށްފެހި ޕްރޮގްރާމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރުގެ ފުރަތަމަ 100 ދުވަހުގެ ވައުދުތަކުގެ ތެރޭގައި ހިމެނޭ މުޅި ރާއްޖޭގައި ގަސް އިންދުމުގެ ޕްރޮގްރާމެކެވެ. މި ޕްރޮގްރާމްގެ ދަށުން ރަށްރަށުގެ ހުސްބިންތަކާއި މަގުތަކުގައި 4،000 ގަސް އިންދުމަށް ވަނީ ހަމަޖެހިފައެވެ.