"މީ ލޯތްބަކީ" ބުރާސްފަތި ދުވަހުގެ ރޭ އައްޑޫގައި އަޅުވަނީ

އެޕްރީލް މަހުގެ 5 ވަނަ ދުވަހު އޮލިމްޕަހުގައި ނެރުނު ދިވެހި ފިލްމު "މީލޯތްބަކީ" އައްޑޫގައި ބުރާސްފަތިދުވަހުގެރޭ އަޅުވާނެ ކަމަށް ފިލްމުގެ ޕްރޮޑިއުސަރ މުހައްމަދު އަލީ(މޮގާ) ބުނެފިއެވެ.

ހައުސް ފުލް 18 ވަރަކަށް ޝޯ ދެއްކުމަށްފަހު ޑާކްރެއިން އެންޓަޓެއިންމަންޓުން "މީ ލޯތްބަކީ" އައްޑޫ ގައި ބުރާސްފަތި ދުވަހާއި ހުކުރު ދުވަހު އަޅުވާއިރު ފުވައްމުލަކު، ނައިފަރު އަދި ކުޅުދުއްފުށީގައި ހުކުރު ދުވަހު އަޅުވާ ގޮތަށް ވަނީ ހަމަޖެހިފައެވެ.

ހަމައެއާއެކު އެ ފިލްމުގެ ވަދާއީ ޝޯތައް މާލޭގައި މިމަހުގެ 10 އިން 13 އަށް ދައްކާނެއެވެ.

އަށާރަ އަހަރުން މަތީގެ މީހުންނަށް ހާއްސަ "މީ ލޯތްބަކީ" އަކީ ޑައިރެކްޓަރ އަލީ ޝީފާއު(ޗިއްޕެ) އާއި އައިޝަތު ފުއާދު ތައުފީގުގެ ސްކްރީން ޕްލޭއަކަށް ޗިއްޕެ ޑައިރެކްޓް ކޮށްފައިވާ ރޮމެންޓިކް ކޮމެޑީ ފިލްމެކެވެ.

މީ ލޯތްބަކީގައި މަޝްހޫރު ގިނަ ފަންނާނުންތަކެއް ފެނިގެންދާއިރު ލީޑް ރޯލުން ފެނިގެންދާނީ ޖުމައްޔިލް އަދި އައްޒަ އެވެ.

ޑާކް ރެއިންގެ އެންމެ ފަހުން ބެލުންތެރިންނަށް ފެނިފައިވާ ފިލްމަކީ "ވާށޭ މަށާއެކީ" އެވެ. އަމިއްލަ ރާގުގެ ލަވަތައް މި ފިލްމުގައި ހިމެނޭއިރު ފިލްމުގެ ލަވަތައް ކިޔަދީފައިވަނީ ޑީ ޓިއުން ބޭންޑާއި، އީކުއޭޓީކް ވައިބް އަދި ސްކޯސްއޮފް ފްލެއާސް ބޭންޑުންނެވެ.

މި ފިލްމުގެ ޝޫޓިންތައް ނަގާފައިވަނީ މާލެ، ހުޅުމާލެ އަދި ވިލިނގިލީގައެވެ.

މި ފިލްމަކީ މިހާތަނަށް އޮލިމްޕަހުގައި އެންމެ ގިނަ ހައުސްފުލް ޝޯތަކެއް އަޅުވާފައިވާ އެއް ފިލްމެވެ.މީ ލޯތްބަކީ އަކީ މިއަހަރު މިހާތަނަށް އޮލިމްޕަހުގައި އަޅުވާ ތިންވަނަ ފިލްމެވެ.