ބޮޑުވަޒީރުކަމަށް އަމީރާ އުބޮލްރަތަނާގެ ނަން ހުށައެޅުއްވި މައްސަލައިގައި ތައި ރަކްސާ ޕާޓީ އުވާލަން ތައިލެންޑުގެ އިލެކްޝަންސް ކޮމިޝަނުން އެ ގައުމުގެ ކޮންސްޓިޓިއުޝަނަލް ކޯޓަށް ހުށައަޅައިފިއެވެ.
ބުދަ ދުވަހު ނެރުނު ބަޔާނެއްގައި އިލެކްޝަންސް ކޮމިޝަނުން ބުނެފައި ވަނީ، ތައި ރަކްސާ ޕާޓީ އުވާލަން ހުށައެޅީ އިންތިހާބުތަކާ ބެހޭ ގާނޫނާ އެ ޕާޓީން ހިލާފުވެފައިވުމުން ކަމަށެވެ. މި އަމަލަކީ އެ ގައުމުގެ ގާނޫނު އަސާސީއަށް ކުރިމަތި ކުރުވި ނުރައްކަލެއް ކަމަށް ވެސް އިލެކްޝަންސް ކޮމިޝަނުގެ ބަޔާނުގައި ބުނެފައި ވެއެވެ.
މީގެ ދެ ދުވަސް ކުރިން ތައި އިލެކްޝަންސް ކޮމިޝަނުން އުބޮލްރަތަނާގެ ނަންފުޅު އުނިކުރަން ނިންމީ، އެކަމަނާ އިންތިހާބުގައި ވާދަކުރެއްވުން ބަލައެއް ނުގަނެވޭނެ ކަމަށް ތައިލެންޑުގެ ރަސްގެފާނު އަދި އެކަމަނާގެ ބޭބޭފުޅު މަހާ ވަޖިރަލޮންކޯރން ވިދާޅުވުމާ ގުޅިގެންނެވެ. ނަމަވެސް ނަން އުނިކުރުމުގެ ކުރިން ތައި ރަކްސާ ޕާޓީ އިން ވެސް ވަނީ ރަސްގެފާނު ނުރުހުން ފާޅުކުރެއްވުމުން، އެ ކަމަނާގެ ނަން އަނބުރާ ގެންދަވާފައެވެ.
މި މައްސަލައާ ގުޅިގެން އަމީރާ އުބޮލްރަތަނާ ވަނީ މައާފަށް އެދިވަޑައިގެންފައެވެ. އަންގާރަ ދުވަހު އުބޮލްތަރަނާގެ އިންސްޓަގްރާމް ޕޭޖްގައި ލިޔުއްވި ޕޯސްޓެއްގައި ވިދާޅުވެފައި ވަނީ، އެ ކަމަނާ ނިކުންނެވީ ހެޔޮ ހިތުން ރައްޔިތުންނަށް ހިދުމަތްކުރެއްވުމުގެ ނިޔަތުގައި ކަމަށެވެ. އަދި އެކަމުގެ ސަބަބުން ފެންމަތިވީ މައްސަލަތައް އެއީ މި ޒަމާނުގައި ބަލައިގަނެވޭނެ ކަންކަން ނޫން ކަމުގައި ވެސް އަމީރާ ވިދާޅުވިއެވެ.
ތައި ރަކްސާ ޕާޓީ އުވާލަން އިލެކްޝަންސް ކޮމިޝަނުން މަސައްކަތް ފެށުމާ ގުޅިގެން ކުރިޔަށް އޮތް އާއްމު އިންތިހާބު ސައްހަ ވެދާނެ ކަމާ މެދު ވަނީ ސުވާލު އުފެދިފައެވެ. ތައި ރަކްސާ ޕާޓީއަކީ ކުރީގެ ބޮޑުވަޒީރު ތަކްޝިން ޝިނަވަތްރާ އަދި އޭނާގެ ކޮއްކޯފުޅު ޔިންގލަކް ޝިނަވަތްރާއާ ގުޅުން ހުރި ސިޔާސީ ޕާޓީއެކެވެ.
ތައިލެންޑުގެ ކުރިޔަށް އޮތް އާންމު އިންތިހާބު ވެގެން ދާނީ، ފަސް އަހަރުގެ އަސްކަރީ ވެރިކަމަށް ފަހު، އެ ގައުމުގައި ބޭއްވޭ ފުރަތަމަ އިންތިހާބަށެވެ. މި އިންތިހާބު ވެގެން ދާނީ އަލުން ޑިމޮކްރަސީ އަށް ގައުމު ރުޖޫއަކުރަން ލިބޭ ރަނގަޅު ފުރުސަތަކަށް ކަމަށް ވެސް މަޝްރަހު ދިރާސާކުރާ ފަރާތްތަކުން ވަނީ ބުނެފައެވެ. މި އިންތިހާބުގައި އަސްކަރީ ބަޢާވާތުގެ ވެރިޔާ އަދި ކުރީގެ ސިފައިންގެ ޖެނެރަލް ޕްރަޔުތް ޗަން-އޫޗާ ވެސް ކުރިމަތިލައްވައެވެ.
